Ыһыах маанылаах ыалдьыттарынан Саха Өрөспүүбүлүкэтин баһылыгын эбээһинэһин быстах кэмҥэ толорооччу Айсен Николаев, Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Саха Өрөспүүбүлүкэтин сүрүн федеральнай инспектора Виктор Хохрин, Саха Өрөспүүбүлүкэтин судаарыстыбаннай сүбэһитэ Андрей Борисов, Саха Өрөспүүбүлүкэтин Конституционнай суутун бэрэссэдээтэлэ Александр Ким-Кимэн, Россия Федерациятын Федеральнай Мунньаҕын Федерациятын Сэбиэтин федеративнай тэриллиигэ, региональнай политикаҕа, бэйэни салайыныыга уонна Хотугу норуоттар дьыалаларын кэмитиэтин бэрэссэдээтэлин солбуйааччы Александр Акимов, Россия Федерациятын Федеральнай Мунньаҕын Судаарыстыбаннай Думатын депутата Федот Тумусов, Дьокуускай куорат баһылыгын эбээһинэһин толорооччу Петр Садовников, Дьокуускай куорат Думатын бэрэссэдээтэлэ Александр Саввинoв, өрөспүүбүлүкэ народнай депутаттара буоллулар. 

 

Ыһыах сиэригэр-туомугар Япония экономикатын, атыытын, промышленноһын миниистирэ, экономика эйгэтигэр Россияны кытары үлэлэһэр миниистир Хиросигэ Сэко, Япония наукатын миниистирэ Масадзи Мацуяма, Россия Федерациятын Федеральнай Сэбиэтин тас дойдулар дьыалаларыгар кэмитиэтин бэрэссэдээтэлэ Константин Косачев, Россия Федерациятын Федеральнай Мунньаҕын Судаарыстыбаннай Думатын депутата Иван Белеков, Россия Федерациятын Федеральнай Мунньаҕын Федерациятын Сэбиэтин чилиэннэрэ, федеральнай былаас ситэриилээх уорганнарын бэрэстэбиитэллэрэ кыттыыны ыллылар. 

 

Айылҕа барахсан уһун кыһына уурайан, кур мууһун уулларан, чээлэй солко сэбирдэҕин силигилии ситэрэн, мотуок солко мутукчатын муҥутуурдуу тупсаран Дьөһөгөйүн оҕотун сыһыы ахсын сырыырҕатан, кытыт биэ кымыһын кырылаччы ыаталаан уйгуну-быйаҥы дэлэтэн, төрүүр-ууһуур төлкөбүт түстэнэр бэлиэ түгэнэ тосхойдо. Түһүлгэ түөрт өттүттэн түптэ буруотунан ыраастаан, куһаҕан дьайы дьалбарыттылар. Күөх сайын кэлбитин уруйдаан кыталык кыргыттар кыҥкынас ырыаларынан кылыһахтаан тэлээрэ көтөн киирэн үҥкүүлээн дайдылар. Күн Өркөн улууһун оҕолоро, урааҥхайы утумнааччылар, сахалыы санаалаахтар самаан сайын аатыгар, тоҕой сэлэни туругурдан, араҕас чэчири айгылатан түһүлгэни төрүттээбитинэн бардылар. Күндээрэр халлаан күнүн уота чаҕылыйан, орто туруу бараан дойду унаар түптэтэ күөдьүйдэ, уйгулаах түһүлгэни олохтоору, эҕэрдэлээх ыһыаҕы ыһаары күн сирин дьоно күөх от дэйбиирдэннэ, үүнэр үтүө норуот үкэр күөх үктэллэннэ. 

 

Үрдүк мэҥэ халлаан үрүҥ тыыннаах тоҕус үтүө Айыыларыгар, Аан Ийэ дойду аламаҕай иччилэригэр алгыстаах тылларын тиэрдэ, бар дьон баараҕай баҕа санааларын, көрдөһөр күттүөннээх саҥаларын кута-сүрэ буолан үс Алгысчыт түһүлгэҕэ киирбитин ыһыах дьоно сүгүрүйэ көрүстүлэр. Үөһээ үрдүк айыыларбытыгар биир ситими олохтоһо Сахабыт сирин араас муннуктарыттан ыһыах түһүлгэтин алгысчыттара анаан-минээн, ааттаан-суоллаан кэллилэр. Мустубут дьон алгыс тыл иччитигэр, хомоҕой тыл хомуһунугар, өйдүүн-санаалыын кыттыһан, эттиин-сиинниин налыйан, ис сүрэхтэригэр иҥэринэн алгысчыт этиитин, айхалын хатылаан тэҥҥэ уруйдаатылар. 

 

Саргылаах ыһыахха айыы тылынан арчыламмыт саамал кымыс үрүҥ илгэтэ үрүлүйдэ, кырылыы кыынньар кыдьымахтаах кымыс айыы тыынынан арчыланна. Кымыс иһиитин сиэрэ-туома ыытылынна, күргүөм тойук дуораһыйда. 

 

Саха Өрөспүүбүлүкэтин Ил Түмэнин Бэрэссэдээтэлэ Александр Жирков Саха сирин олохтоохторун, ыалдьыттарын Үрүҥ Тунах ыһыаҕынан эҕэрдэлээтэ. “Биһиги норуоппут өбүгэлэрбит отуордаах олохторун устатыгар үйэлэр тухары харыстаан, бүөбэйдээн, энчирэппэккэ илдьэ кэлбит үгэстэрин үрдүктүк тутар. Былыр-былыргыттан, үтүмэн үгүс үйэлэртэн ыһыах сүрүн суолтата үрдүк айыыларга, сир-дойду иччилэригэр сүгүрүйүү буолар. Кинилэр бу күн орто дойду дьонугар уйгуну-быйаҥы, үөрүүнү-көтүүнү, или-эйэни, төрүөҕү ыыталлар”, - диэн бэлиэтээтэ.   

  

Россия Федерациятын Федеральнай Сэбиэтин тас дойдулар дьыалаларыгар кэмитиэтин бэрэссэдээтэлэ Константин Косачев: “Россия дьонунан-сэргэтинэн баай. Дойдубутугар араас култууралаах, сиэрдээх-туомнаах норуоттар доҕордуу сыһыаны тутан олороллор. Бүгүҥҥү ыалдьыттарбыт, дьоппуоннар, Саха сирин ыһыаҕын көрөн, култууратын билсэн Россия туһунан үтүө өйдөбүллээх буолалларыгар баҕарабыт”, - диэтэ. 

 

Япония экономикатын, атыытын, промышленноһын миниистирэ, экономика эйгэтигэр Россияны кытары үлэлэһэр миниистир Хиросигэ Сэко бастатан туран, маннык үтүө түһүлгэҕэ ыҥырбыттарын иһин махтанна. Россия уонна Япония сибээстэрэ кэнники кэмҥэ сайдыбыттарын, парламеннар икки ардыларыгар үлэлэһии икки дойду сыһыаннаһыыларыгар суолтата улаханын эттэ. Быйылгы сыл Россия уонна Япония сибээстэһиилэрин сылынан биллэриллибитин, араас тэрээһин ыытылларын, инникитин да үлэлэһэр былааннаахтарын иһитиннэрдэ.

  

Саха сирин баһылыгын эбээһинэһин быстах кэмҥэ толорооччу Айсен Николаев Туймаада хочотугар Үрүҥ Тунах ыһыах күнэ саҕаламмытынан итиитик-истиҥник эҕэрдэлээтэ. “Дьокуускай куорат Россияҕа инники күөҥҥэ таҕыста. Алта сыл устата үлэбэр өйөбүл буолбуккут иһин куорат олохтоохторугар махтанабын”, - диэтэ. Инникитин төрөөбүт дойдубут сайдарын туһугар бары бииргэ үлэлиэхпит, Саха сирин Россия бастыҥ региона оҥоруохпут диэн этэн туран, өрөспүүбүлүкэ олохтоохторугар дьолу-соргуну, ситиһиини баҕарда. 

 

Ыһыах дьоно күн эргиирин батыһа тоҥолохторуттан ылсан оһуохайга киирдилэр, күндээрэр халлааҥҥа күммүт чэмэлийэ тыган, ыһыах тыынын өрө көтөҕөн, сырдык алгыс быһыытынан үөрүүнү үксэттэ. 

 

Айыыларга анаммыт сиэллээх салама сэлэ чэчиргэ симэннэ, кэриэн айах кэккэлээтэ, чороон иһит чуоҕуста, кытыйа иһит кыттыста, сири иһит ыйанна. Күн сирин дьоно күүс-уох эбиннэ, үүнэр үтүө норуот үөрүү-көтүү үктэллэннэ, уйгулаах түһүлгэ олохтонно, эҕэрдэлээх ыһыах ыһылынна.