Көрсүһүүгэ Саха Өрөспүүбүлүкэтин Ил Дарханын эбээһинэһин быстах кэмҥэ толорооччу Айсен Николаев, Алдан оройуонун баһылыга Северин Поздняков кытыннылар.

 

Александр Жирков көрсүһүүнү саҕалыыр аан тылыгар олоҥхо ыһыаҕын суолтатын, инникитин саха норуота олоҥхотун, тойугун, төрүт үгэһин харыстаан үүнэр көлүөнэҕэ тириэрдэр ытык иэстээҕин бэлиэтээтэ. Ыһыах ыытылларыгар Ил Дархан эбээһинэһин быстах кэмҥэ толорооччу Айсен Николаевка көмөтүн иһин махтанна. Алдан оройуонун баһылыгар Северин Поздняковка, норуот депутатыгар Александр Дудниковка, Алдан оройуонун олохтоохторугар ылсыбыт үлэлэрин тиһэҕэр тириэрдибиттэрин, Олоҥхо ыһыаҕын түһүлгэтин төрүттээбиттэрин иһин үтүө тыллары анаата. Спикер кэлэр сылга Олоҥхо ыһыаҕа Нам улууһугар ыытылларын иһитиннэрдэ.

 

Саха Өрөспүүбүлүкэтин Ил Дарханын эбээһинэһин быстах кэмҥэ толорооччу Айсен Николаев Олоҥхо ыһыаҕын суолтата сыллата дириҥиирин, тэрээһинэ сайдарын, аан дойду араас муннуктарыттан ыалдьыттары түмэрин эттэ. Бу ыһыах өрөспүүбүлүкэбит култуурунай тэрээһиннэриттэн биир суолталаахтара буоларын, сыллата ыытыллыахтааҕын бэлиэтээтэ. Норуоппут үйэлэр тухары илдьэ кэлбит баай нэһилиэстибэтин илдьэ сылдьар, дьоҥҥо иһиттиннэрэр, кэпсиир олоҥхоһуттарга махтанна.

 

Олоҥхо Национальнай кэмитиэтин Бочуотунай грамоталарынан Саха Өрөспүүбүлүкэтин норуоттарын култуурунай нэһилиэстибэлэрин киинин салайааччыта Агафья Захарова, олоҥхоһут Николай Григорьев, маастар-педагогтар Мария Боппоенова, Айталина Верховцева, олоҥхону толорооччу Сусанна Лазарева, олоҥхону толорооччу, маастар-педагог, Уус Алдан улууһун олоҥхону толорооччулар бөлөхтөрүн салайааччыта Антонина Лугинова, «Удьурхай» олоҥхо толорооччулар бөлөхтөрүн салайааччыта Алексей Николаев, олоҥхону толорооччу, маастар-педагог, олоҥхону толорооччулар бөлөхтөрүн салайааччыта Зоя Стрекаловская, эбэҥкилии ньымньакааны толорооччу Анфиса Авелова бэлиэтэннилэр.

 

Саха Өрөспүүбүлүкэтигэр култуура уонна искусство сайдыытыгар кылаатын иһин Ил Түмэн Бэрэссэдээтэлин Махтал суругунан олоҥхоһут Герман Яковлев наҕараадаланна.

 

Көрсүһүү кыттыылаахтара Ил Түмэн Бэрэссэдээтэлэ,Олоҥхо иккис уон сылын бэлэмнээн ыытыыга Саха Өрөспүүбүлүкэтин Национальнай тэрийэр кэмитиэтин бэрэссэдээтэлэ Александр Жирковка Олоҥхо сайдыытыгар сүдү кылаатын иһин махтаннылар, үгүс өрүттээх үлэ ыытылларын бэлиэтээтилэр.

 

Алдан оройуонун баһылыга Северин Поздняков быйылгы Олоҥхо ыһыаҕа Ил Түмэн Бэрэссэдээтэлэ Александр Жирков өйөбүлүнэн, сүбэтинэн ыытыллыбытын бэлиэтээн эттэ, оройуон салалтатын, олохтоохторун ааттарыттан махтанна. «Биһиги, алданнар, тимир суолу тутабыт, поездтары көрсөбүт, маннык улахан таһымнаах култуурунай тэрээһини ыытар уопуппут суоҕа. Олоҥхо ыһыаҕа тэриллэригэр өйөөбүт, сүүрбүт-көппүт, сүбэлээбит, үлэлэспит бар дьоҥҥо махтанабыт. Инникитин саха норуотун героическай эпоһын олоҥхону өссө дириҥэтэн үөрэтиэхпит», - диэтэ.   

 

Бэлиэ түгэҥҥэ Саха Өрөспүүбүлүкэтин Ытык сүбэтин сэбиэтин бэрэссэдээтэлэ,Саха Өрөспүүбүлүкэтин бочуоттаах гражданина Люлия Григорьева, политическэй деятель, Саха Өрөспүүбүлүкэтин бочуоттаах гражданина Зоя Корнилова, профессор, филологическай наука дуоктара Василий Илларионов, Саха Өрөспүүбүлүкэтин норуоттарын култуурунай нэһилиэстибэлэрин киинин салайааччыта Агафья Захарова, норуот депутата Егор Жирков эҕэрдэ тыл эттилэр.  

Олоҥхоһут Николай Степанов-Ноорой сиэнэ Аксинья Степанова, Мэҥэ Хаҥалас улууһун ытык олоҥхоһуттарын түмсүүтүн салайааччыта Петр Тихонов,  олоҥхоһуттар Герман Яковлев, Николай Григорьев мустубут дьоҥҥо олоҥхолоон иһитиннэрдилэр. 81 саастаах эбэҥки норуотун ньымньакаанын толорооччу Дария Осенинаны сэргээн, сэҥээрэн иһиттилэр.   

Көрсүһүүгэ Юрий Борисов салайааччылаах олоҥхону толорор ыччаттар кытыннылар. Кинилэр уһуйааччылара ХИФУ профессора Галина Попова-Санаайа Ил Түмэн Бэрэссэдээтэлэ Александр Жирковка олоҥхону толорор эдэр ыччаты өйүүрүн иһин махтанна, сорох иитиллээччилэрэ номнуо маастар-педагог буоланнар, үлэлэрэ сыаналанан бүгүн наҕараадаламмыттарын иһитиннэрдэ, олоҥхо көлүөнэттэн көлүөнэҕэ бэриллэн иһэрин бэлиэтээтэ.