Саха Өрөспүүбүлүкэтин Ил Түмэн Судаарыстыбаннай Мунньаҕын наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева биир дойдулаахтарын бүгүҥҥү көрсүһүүнэн эҕэрдэлээтэ уонна тэрээһини көҕүлээбит «Ньырбакаан» түмсүүгэ, Алевтина Николаеваҕа махталын тириэртэ.

 

Норуот депутата тыа сиригэр кулууп үлэтэ нэһилиэк олоҕун көрдөрөрүн, кулууп үлэһиттэрэ дьону көҕүлээн сынньалаҥнарын туһалаахтык атааралларалларыгар сөптөөх усулуобуйаны тэрийэллэрин, бу сыралаах үлэттэн тахсарын, култуура үлэһитэ өй-санаа, духуобунай таһым өттүнэн атын дьонтон үрдүк кэрдиискэ турарын бэлиэтээтэ.

 

«Светлана Николаевна оҕо эрдэҕиттэн дьону көҕүлүүр дьоҕурдааҕа, сырдыкка-кэрэҕэ тардыһыытын күүһүнэн анал үөрэхтэнэн, үлэһит бастыҥа буолбута. Эдэр специалист Күндээдэҕэ ананан үлэлии тахсарыгар, ыччат тыа сиригэр тахсыытын хамсааһына саҥа саҕаланан эрэрэ. Күүстээх үлэ кэннэ кулуупка эдэрдиин-кырдьаҕастыын сынньалаҥнарын туһалаахтык атаараллара, концерт бэлэмнээн атын нэһилиэктэргэ гастроллуур идэлэммиттэрэ. Бу кэмҥэ Светлана Николаевна талаана, дьону кытта үлэлиир дьоҕура харахха быраҕыллыбыта. Кини нэһилиэккэ аан бастакы хору төрүттээбитэ. 1970 сыллаахха Күндээдэ кулуубугар оройуоҥҥа аан бастакынан «Туйгун үлэлээх кулууп» бочуоттаах аат иҥэриллибитэ», - диэн аҕынна.

 

Антонина Афанасьевна эдэркээн Светлана 1958 сыллаахха Дьокуускайдааҕы култуурунай-сырдатар училищеҕа үөрэнэ сылдьан «Лоокуут уонна Ньургуһун» драмаҕа Ньургуһун оруолун толорон Саха сирин ыччаттарын фестивалыгар лауреат буолбута элбэҕи этэрин кэпсээтэ. Кини олоххо дьулуура, бэриниилээх үлэтигэр ситиһиилэрэ, киһи быһыытынан дьоҥҥо-сэргэҕэ амарах, аһыныгас сыһыана, үрдүккэ, кэрэҕэ тардыһар үтүө санаата ыччакка куруук үтүө холобур буола турарын эттэ. Светлана Николаевна дьаныһан туран сыратын биэрбит «Кылыһах» фольклорнай ансамбла өр сыллар устата утумнаахтык дьарыктанан «народнай» ааты ылбытын, бу үлэ чыпчаала буоларын бэлиэтээтэ.

 

«Бу күннэргэ олус үчүгэй солун кэллэ. Ньурба улууһун Күндээдэтээҕи «Туску Айар Алаһа» норуот айымньытын дьиэтэ «Россия бастыҥ кулууба» ааты сүгэр улахан чиэскэ тигистэ», - диэн сис кэмитиэт бэрэссэдээтэлэ Антонина Григорьева үөрүүтүн үллэһиннэ.

 

Түмүгэр дойдутун дьонугар маннык түмсүүлээхтик, биир санаанан салайтаран төрөөбүт нэһилиэктэрэ, улуустара, өрөспүүбүлүкэ сайдыытыгар сүҥкэн кылааттарын, эстибэт эрчимнэрин, таһаарыылаах үлэлэрин иһин махтанна. Россияҕа култуура үлэһиттэрин күнэ бэлиэтэнэринэн Саха Өрөспүүбүлүкэтигэр култуура сайдыытыгар кылааттарын иһин Күндээдэтээҕи «Туску Айар Алаһа» норуот айымньытын дьиэтин дириэктэригэр Светлана Яковлеваҕа, хореограф Галина Степановаҕа, сцена бэтэрээнэ Галина Гурьеваҕа Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин Бочуотунай Грамотатын туттартаата.  

Үтүө киһи Светлана Николаевна Эверстова туһунан кэргэнэ Иван Эверстов, оҕолоро, уруу-аймах дьоно, Ньурба улууһун баһылыга Алексей Иннокентьев, Арктикатааҕы Судаарыстыбаннай искусство уонна култуура институтун ректора Саргылана Игнатьева, Күндээдэ нэһилиэгин баһылыгын солбуйааччы Яков Замятин, Күндээдэтээҕи С.Н. Эверстова аатынан норуот айымньытын дьиэтин дириэктэрэ Светлана Яковлева сылаас тылларынан аҕыннылар.

 

Күндээдэттэн уус-уран көрүү кыттыылаахтара, «Саһарҕа» эр дьон ырыатын бөлөҕө, «Кэскил» Россия образцовай оҕо үҥкүүтүн ансамбла, нэһилиэк уопсастыбаннай түмсүүлэрэ анаан-минээн тэринэн кэлбиттэр. 

 

Ахтыы киэһэтэ «Саһарҕа» эр дьон ырыатын бөлөҕө толоруутугар Анастасия Варламова «Ырыаһыкка» ырыатынан түмүктэннэ.

 

Ил Түмэн пресс-сулууспата