Куонкурус тыа сиригэр олорон уйгуну уһансар, алаһа дьиэтин араҥаччылыыр, талба талааннаах, хоһуун үлэһит, холобур буолар ийэ аатын өрө көтөҕүүгэ, кинилэргэ уопсастыба болҕомтотун тардыыга анаан тэриллэр.

 

Быйыл өрөспүүбүлүкэ сэттэ улууһуттан талыллан, бүтэһик түһүмэххэ тахсыбыт күн күбэй ийэлэр: Ньурбаттан Валентина Иванова, Өлөөнтөн Сардаана Николаева, Тааттаттан Марита Потапова, Намтан Айталина Рожина, Горнайтан Анна Румянцева, Үөһээ Бүлүүттэн Сусанна Семенова, Чурапчыттан Прасковья Смирникова кытыннылар.

 

Кылгастык билиһиннэртиир буоллахха, кыттааччылар бары үстүү-биэстии оҕолоохтор, сиэннэрдээхтэр. Холобура, Прасковья Петровна Смирникова биэс оҕолоох, уон үс сиэннээх. Чурапчытааҕы гимназияҕа коменданынан үлэлии-хамсыы сылдьар. Ыраах Өлөөнтөн кэлбит Сардаана Николаевна Николаева биэс оҕолоох, түөрт сиэннээх, учаастакка инспекторынан үлэлиир. Ити курдук бары улахан дьиэ кэргэн тапталлаах ийэлэрэ, амарах эбэлэрэ, нэһилиэктэригэр дьону-сэргэни хамсатар көхтөөх уопсастыбанньыктар.

 

Кыттааччылар кулун тутар 19 күнүттэн Дьокуускайга кэлэн, психологы кытта үлэлэспиттэрин, “Россия – мин историям” мусуойу көрбүттэрин, киэргэнэн-симэнэн фотосессияҕа түспүттэрин, “Арассыыйа ийэлэрэ” хамсааһыны, Саха Өрөспүүбүлүкэтин дьахталлар түмсүүлэрин сойууһун актыбыыскаларынаан “төгүрүк остуолга” санаа атастастаспыттарын, “Стимул” кулууп салайааччыта Матвей Лыткин хаалыктаах хаамыы кистэлэҥнэригэр үөрэппитин, биир нэдиэлэ биллибэккэ ааспытын туһунан санааларын эттилэр.

 

Түмүктүүр дьоро киэһэҕэ кыттааччылар түөрт түһүмэҕинэн бэйэлэрин, дьиэ кэргэннэрин билиһиннэрдилэр, талба талааннарын көрдөрдүлэр, ас астаан аукциоҥҥа туруордулар уонна киэргэнэн-симэнэн хааман көрдөрдүлэр.

 

Покровскай куорат олохтоохторо Романовтар дьиэ кэргэн икки оҕолоругар ыарахан диагноз туруоруллан, эмтэнэллэригэр анаан Далбар Хотуттар астаан аҕалбыт бүлүүдэлэринэн аукцион ыытыллан уопсайа 358550 тыһыынча мунньуллан, харчы ыал ийэтигэр туттарылынна. Итинтэн 40000 тыһыынчатын амарах санаалаах көрөөччүлэр саалаҕа хомуйдулар.

 

Аныгы олох сиэринэн интернет ситимигэр ыытыллыбыт күрэххэ элбэх куолаһы ылан Прасковья Смирникова “Биһирэм Хотунунан” ааттанна уонна араас сылларга ыытыллыбыт “Далбар Хотун” куонкурус кыайыылаахтара олохтообут сүрүн бириистэрин хаһаайката буолла.

 

Куонкурус түмүгүнэн Валентина Иванова “Иэйии Хотун”, Сардаана Николаева “Айыы Хотун”, Марита Потапова “Сайдам Хотун”, Айталина Рожина “Талба Хотун”, Анна Румянцева “Уран Хотун”, Сусанна Семенова “Мааны Хотун” аатын сүктүлэр. Үбүлүөйдээх куонкурус кыайыылааҕынан Чурапчыттан Прасковья Смирникова “Далбар Хотун” аатын ылан, сүрүн спонсор “Туймаада-Лизинг” тэрилтэ туруорбут Синтай тыраахтарынан наҕараадаланна.

 

Саха Өрөспүүбүлүкэтин Ил Түмэнин Судаарыстыбаннай Мунньаҕын наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева «Далбар Хотун» өрөспүүбүлүкэтээҕи Х үбүлүөйдээх куонкурус кыттыылаахтарын, Саха сирин бары Далбар Хотуттарын Ил Түмэн аатыттан истиҥник эҕэрдэлээтэ.

 

“Ханнык баҕарар кэмҥэ дьахтар аймах улууспут, өрөспүүбүлүкэбит олоҕор сүрүн миэстэни ылар. Инники соруктары быһаарарга тирэх буолар. Эһиги дьиэ кэргэн дьылҕатын, оҕо кэскилин иһин эппиэтинэһи күүһүрдэргэ улахан суолтаны биэрэҕит, эдэр көлүөнэни амарах сүрэхтээх буоларга, төрөөбүт дойдуну уонна үлэни таптыырга, бэйэ оҥорбут дьыалатыгар эппиэтинэһи сүгэргэ үөрэтэҕит, аан дойдуну кытары алтыһыы үөрүүтүн бэлэхтиигит. Эһиги өйөбүлгүт, тулуургут уонна муудараскыт улуус, өрөспүүбүлүкэ сайдыытыгар төһүү күүс буолар”, - диэтэ.

 

Антонина Афанасьевна Далбар Хотуттарга айымньылаах үлэни, дьиэ кэргэттэригэр, чугас дьонноругар или-эйэни, дьолу-соргуну, кытаанах доруобуйаны баҕарда уонна Саха Өрөспүүбүлүкэтин Ил Түмэнин Судаарыстыбаннай Мунньаҕын наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин Бочуотунай Грамотатын туттартаата.

 

Дьоро киэһэни эстрада сулустара Анатолий Бурнашов, Саарын ылбаҕай ырыаларынан киэргэттилэр.