Саха Өрөспүүбүлүкэтин муниципальнай тэриллиилэрин сүбэтэ тохсунньу 18-19 күннэригэр Дьокуускай куоракка муниципальнай тэриллиилэр VII съезтэрин ыытар. Манна Саха сирин 445 муниципальнай тэриллиилэр бэрэстэбиитэллэрэ кыттыыны ылыахтара. Саха Өрөспүүбүлүкэтин Ил Түмэнин олохтоох салайыныыга сис кэмитиэтин бэрэссэдээтэлэ Василий Местников иһитиннэрбитинэн, улуустар, нэһилиэктэр баһылыктара уочара суох съезкэ түмсүөхтэрэ.

 

«Уочараттаах съезд устаабынан ылыллыбыт кэмиттэн үстүү сыл буола-буола ыытыллыахтаах. Олохтоох бэйэни салайыныы сайда турар кэмигэр бу - үлэҕэ туһалаах тэрээһин. Съезд иннинээҕи күн Өрөспүүбүлүкэбит Ил Дархана Егор Борисов улуустар, нэһилиэктэр баһылыктарын кытары көрсүөҕэ. Үлэ хаамыытын, туох кыһалҕа баарын истиэҕэ, бэйэтин санаатын, көрүүтүн этиэҕэ.

 

Биһиги улуустарынан сылдьан олохтоох салайыныы депутаттарыгар анаан семинардары ыытабыт, саҥа сокуоннары, депутат үлэтэ хайдах барыахтааҕын сырдатабыт. Олунньу 9 күнүгэр Таатта улууһугар тахсыахпыт. Быйыл Таатта улууһугар Былатыан Ойуунускай төрөөбүтэ 125 сыла, олохтоох бэйэни салайыныы тэриллибитэ 15 сыла бэлиэтэнэр. Таатта улууһа депутаттарыгар анаан саамай элбэх семинары ыытта. Атын улуустар таатталар уопуттарын ылан үлэлииллэрэ буоллар дии саныыбын.

 

Делегаттар быйылгы съезкэ үлэнэн хааччыллыы боппуруоһун көрөллөрө, ити тула кэпсэтэллэрэ буоллар тоҕоостоох буолуо этэ. Кистэл буолбатах, үлэ суох диэн ыччаппыт киин сиргэ талаһар. Тыа сиригэр ыччаты хайдах олохсутабыт, үлэнэн хайдах хааччыйабыт, үлэ миэстэтин хайдах таһаарар туһунан кэпсэтии барарын күүтэбит», - диэн Ил Түмэн олохтоох салайыныыга сис кэмитиэтин бэрэссэдээтэлэ Василий Местников санаатын үллэһиннэ.

 

Ил Түмэн пресс-сулууспата