«Бэйэм быыбардыыр уокуругум буолан, Мэҥэ Алдан уонна Кириэс Халдьаайы нэһилиэктэригэр сырыттым. Ол төрүөтүнэн – олохтоохтор мэлдьи нэһилиэнньэни кытта көрсүһүүгэ олох-дьаһах коммунальнай хаһаайыстыбатын иһинэн үлэлиир «СахаСпецТранс» ХЭТ чоҕу тиэйиигэ иэһин хаһан төлөһөрүй диэн ыйыталларыттан саҕаламмыта.

 

2013 сылтан ыла бүгүҥҥү күҥҥэ диэри иэстэрин төннөрө иликтэр. Инньэ гынан, сүбэлэһэн, толкуйдаан баран, бу тэрилтэ генеральнай дириэктэрин Александр Шарины илдьэ бара сырыттым. Чох тиэйиллэр сиригэр анаан-минээн тийээн, дьон санаатын истэн, биир түмүк санааҕа кэлэн, бу кыһалҕаны быһаарар уолдьаспытын бэлиэтиир оруннаах.

 

Ол курдук, бастаан Мэҥэ Алдаҥҥа мунньахтаатыбыт. Манна 10-тан тахса тэрилтэ үлэлиир эбит. Александр Николаевич барытын тугун-ханныгын, саас-сааһынан быһааран биэрдэ. Дириэктэр этэринэн, 2013 сылтан ыла 2016 сылга диэри таһаҕаһы тиэйии боппуруоһа чопчу быһаарыллыбыт. Билиҥҥитэ 2017 сыллааҕы иэс-күүс хаалбыт. Дьон-сэргэ санаата көтөҕүллэн, салгыы бу хайысхаҕа бииргэ үлэлиир былааннаахтар. Быйыл сакаастарын бэйэлэрин нэһилиэктэригэр толороннор, суол сабыллыар диэри Кириэс Халдьаайыга 200 тонна чоҕу тиэйэн көмөлөспүттэр.

 

Салгыы Кириэс Халдьаайыга чоҕу тиэйэр 15 тэрилтэ салайааччыларын мунньан, сүнньүнэн эмиэ иэс тула кэпсэттибит. Быйылгы былаан 48% эрэ туолбут. Сайын уунан эрэ чох кэллэҕинэ, балаһыанньа тупсуо дэһэллэр. Ол эрэн хаһааммыт саппаастарыгар эрэллэрэ эмиэ улахан. 2013-2016 сыллааҕы иэстэрин төлөһөн олороллор. Итэҕэс-быһаҕас эмиэ баар, холобура, «СахаСпецТранс» ХЭТ кытта дуогабар түһэрсибит кумааҕылара сорохторго суох. Инньэ гынан, мунньахха салгыы бииргэ үлэлэһии торумнарын дьүүллэстибит, көдьүүстээх кэпсэтиини ыыттыбыт», - диэтэ Ил Түмэн тыа сиригэр уонна аграрнай бэлиитикэтигэр сис кэмитиэтин бэрэссэдээтэлэ Дмитрий Саввин.