Усуйаана дьокутааттарын улуустааҕы Сэбиэтин бэрэссэдээтэлэ Аполлон Болтунов депутаттар I сийиэстэрэ үтүө түмүктээх буолуоҕар эрэнэр. «Дьокутаат статуһун үрдэтэр наада. «Сокуон чаҕарын» үлэтин суолтата намтаан иһэр. Сойуус саҕана хайдах этэй? Улуус сайдыытыгар туһуламмыт боппуруостар дьокутааттар нөҥүө ырытыһан олоххо киирэллэрэ. Билигин боломуочуйабыт кыччаан эбитэ дуу, урукку курдук буолбатах», -- диэн санаатын тиэрдэр.
Усуйаанаттан сийиэскэ 10 киһилээх делегация кэлээри бэлэмнэнэр. Аполлон Николаевич: «Сийиэс буоларын туһунан сонуну истэн баран, олус үөрбүппүт», — диэн кэпсэтиибит саҥатыгар этэр. «Кэлиҥҥи кэмҥэ дьокутаат үлэтигэр сыһыаннаах ырытыахха, дьүүллэһиэххэ сөптөөх боппуруостар элбээтилэр», — диир кини.
Ол курдук, Усуйаана дьокутааттара сийиэскэ дохуоттарын туһунан декларация туттарары ирдиир сокуоҥҥа көннөрүүлэри киллэрэри туруорсаллар. «Билигин нэһилиэк дьокутаатыттан саҕалаан дохуот туһунан декларация туттарарбыт ирдэнэр. Онно докумуонун хомуйсуута туспа үлэ. Буолаары буолан, биһиги курдук ыраах олорор дьоҥҥо. Нэһилиэктэрбит улуус кииниттэн 400-500 км ыраах сыталлар. Суол-иис суох. Бу декларацияны туттараары төттөрү-таары айанныырга күһэллэллэр. Билигин нэһилиэктэргэ дьокутааттыан баҕалаах киһи суоҕун кэриэтэ», — диэн санаатын үллэстэр.
Аполлон Николаевич өссө биир, кини көрүүтүгэр, хотугу улуустарга табыгаһа суох үлэ бэрээдэгин ыйар. «Дьокутааттар бу сыллар тухары хамнаһа суох уопсастыбанньык курдук үлэлээн кэллибит. Тоҕо диэтэххэ, биһиги улууспут нэһилиэнньэтэ аҕыйах. Оттон устаап быһыытынан, 10 тыһыынчаттан элбэх нэһилиэнньэлээх улуус буоллаҕына эрэ, дьокутаат хамнастаах үлэлиир. 10 тыһ. элбэх нэһилиэнньэлээх хотугу улуустар аҕыйахтар. Төһө да хамнас ылбатарбыт, үлэбитин син биир толоробут, эбии ноҕуруускаланабыт. Дьиҥэр, пенсияҕа тахсарга ыстаас ааҕыллар, хамнастаах үлэ курдук оҥороллорун туруорсуохпутун баҕарабыт», — диир.
Усуйаана сирэ көмүһүнэн, хорҕолдьунунан, вольфрамынан, уртуутунан, сибиниэһинэн, цинкэнэн, чоҕунан баай. Таба иитиитин, балыктааһын, күндү түүлээҕи бултааһын салаалара сайдыбыт. Усуйаана табатын ахсаанын сүтэрбэтэх, элбэх табалаах хотугу улууһунан буолар.
Түмүгэр Сэбиэт бэрэссэдээтэлэ дьокутаат статуһун үрдэтэр уолдьаспытын туһунан санаатын эттэ: «Дьокутааттар куоластара улуус бүддьүөтүн тыырар кэмҥэ учуоттанар. Ол эрээри, боломуочуйабыт, дьаһайар үппүт суох. Сорох улуустарга баһылык бэйэтэ дьаһайар. Дьокутааттарын истибэт. Аны дьон көрдөһөрө, туруорсара элбэх. Ону үбэ-харчыта суох олорон, хайдах халтай эрэннэрэ олоруохпутуй?» — диир кини.
Ыраах сытар хотугу улуус дьонун олоҕо ыараханын учуоттаан, сийиэскэ кинилэр этиилэригэр болҕомтолорун ууруохтара диэн Аполлон Болтунов эрэнэр.
Сардаана Кузьмина
Опубликовано: 26 марта, 2017 - 21:01
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!