Мунньахха Россия Федерациятын Федеральнай Сэбиэтин тас дойдулар дьыалаларыгар кэмитиэтин бэрэссэдээтэлэ Константин Косачев, Япония экономикатын, атыытын, промышленноһын миниистирэ, экономика эйгэтигэр Россияны кытары үлэлэһэр миниистир Хиросигэ Сэко, Япония либеральнай-демократическай партиятын дискуссионнай сэбиэтин бэрэссэдээтэлин солбуйааччы, наука миниистирэ Масадзи Мацуяма, Саха Өрөспүүбүлүкэтин Ил Дарханын эбээһинэһин быстах кэмҥэ толорооччу Айсен Николаев, Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Федерация Сэбиэтин сенатордара, Япония Парламенын, Бырабыыталыстыбатын чилиэннэрэ, Ил Түмэн сис кэмитиэттэрин бэрэссэдээтэллэрэ, норуот депутаттара кыттыыны ыллылар. 

 

Көрсүһүүгэ Япония уонна Россия бииргэ үлэлэһэргэ түһэрсибит аҕыс пууннаах дуогабардарын чэрчитинэн, олоххо киириэхтээх бырайыактары ырыттылар.

  

Санатан эттэххэ, 2016 сыллаахха Россия Федерациятын Президенэ Владимир Путин уонна Япония премьер-миниистирэ Синдзо Абэ бииргэ үлэлэһэргэ аҕыс пууннаах былааны ылынан тураллар. Быйыл ыам ыйыгар бүтэһик көрсүһүүлэригэр икки дойду лидердэрэ Россияҕа Япония, Японияҕа Россия сылларын биллэрбиттэрэ.

 

Россия Федерациятын Федеральнай Сэбиэтин тас дойдулар дьыалаларыгар кэмитиэтин бэрэссэдээтэлэ Константин Косачев мунньаҕы аһарыгар бу үһүс мунньах Саха сиригэр ыытыллара ураты суолталааҕын бэлиэтээтэ. “Бүгүн Саха сиригэр көрсүбүппүт, Россия уонна Япония бииргэ үлэлээһиннэригэр үһүс мунньахпытын манна ыытарбыт ураты суолталаах. Историяттан ыллахха, XVIII үйэ саҕаланыыта Саха сиринэн Япония олохтооҕо Россияҕа аан бастаан Петр I кытары көрсө барбыта биллэр”, — диэтэ. Салгыы маннык хардарыта туһааннаах сыллары биллэрэр ураты суолталааҕын, араас тэрээһин ыытылларын, инникитин да үлэлэһэр былааннаахтарын эттэ.

 

Бүгүҥҥү мунньахха этиллибит боппуруостар туһунан этэригэр кини икки дойду лидердэрэ сотору-сотору көрсөллөрө, бырабыыталыстыбалар икки ардыларыынаҕы хамыыһыйа кэпсэтиитэ, туһааннаах биэдэмистибэлэр үлэлэһиилэрэ эмиэ улахан суолталааҕын бэлиэтээтэ. 

 

Константин Косачев от ыйын 22-24 күннэригэр Япония Сүбэһиттэрин палаататын бэрэссэдээтэлэ Тиюти Датэ кэлэн, Россия Федерациятын Сэбиэтин бэрэссэдээтэлэ Валентина Матвиенконы кытары көрсүөхтээҕин иһитиннэрдэ.

 

Мунньах түмүгэр Россия Японияны кытары үлэлэһэр консультативнай сэбиэтэ уонна Япония парламенын сүбэһиттэрин палаататын Либеральнай-демократическай партиятын Россияны кытары үлэлэһэр дискуссионнай кулууба меморандум түһэристилэр.

 

Япония экономикатын, атыытын, промышленноһын миниистирэ, экономика эйгэтигэр Россияны кытары үлэлэһэр миниистир Хиросигэ Сэко махтанна, парламеннар икки ардыларыгар үлэлэһии икки дойду сыһыаннаһыыларыгар суолтата улаханын, онуоха бүгүн түһэрсиллибит меморандум төһүү күүс буоларын бэлиэтээтэ. “Япония уонна Россия сыһыаннаһара биир кэлимник сайдан иһэр. Мин миниистир быһыытынан, бииргэ үлэлэһиигэ былааннаммыт 8 пууну олоххо киллэриигэ үлэлэһэбин. Билигин номнуо 130-тан тахса бырайыак үлэлии турар. Биир сүрүн хайысхабытынан Уһук Илин регионнарга үлэбит буолар. Саха сиригэр хас да бырайыак үлэлиир. Өссө саҥа бырайыактарга үлэлэһэр былааннаахпыт”, - санаатын үллэһиннэ.