Сэтинньи 30 күнүгэр Горнай улууһун дьаһалтатыгар «2019-2023 сылларга Горнай улууһун нэһилиэктэригэр гаас ситимин тардыы» тосхол барылын быһаарсыыта буолла. Манна нэһилиэк баһылыктара саҥа кыбаарталларга гаас ситимэ киирэрин туруорустулар.
 
Мунньахха улуус баһылыга Никита Андреев, Саха Өрөспүүбүлүкэтин Судаарыстыбаннай Мунньаҕын (Ил Түмэнин) тутууга уонна дьиэҕэ-уокка, коммунальнай хаһаайыстыбаҕа сис кэмитиэтин бэрэссэдээтэлэ Яков Ефимов, дьиэҕэ-уокка, коммунальнай хаһаайыстыбаҕа уонна энергетикэҕэ миниистири бастакы солбуйааччы Вячеслав Емельянов, тустаах министиэристибэлэр, тэрилтэлэр салайааччылара уонна эппиэттэх үлэһиттэрэ кытыннылар.
 
Горнай улууһун нэһилиэктэригэр гаас ситимин тардыы тосхолун туһунан сүрүн дакылааты улуус архитектора Алгыс Стручков иһитиннэрдэ.
Кэпсэтии чэрчитинэн улуус нэһилиэктэрин баһылыктара бэйэлэрин этиилэрин киллэрдилэр. Ол курдук, нэһилиэккэ тутуллар саҥа кыбаарталлары гаас ситимигэр холбооһуну туруорустулар. Эдэр ыалларга, испэсэлиистэргэ олорор дьиэҕэ гаас киллэриитигэр туох чэпчэтиилэр көрүллэллэрин чуолкайдастылар.
2023 сылга диэри гаас тардыллыытын тиһэх тохтобулунан Мытаах нэһилиэгэ буолара бэлиэтэннэ. Нэһилиэк генеральнай былаанын көрөн, хас дьиэ баарын, сэлиэнньэ киинтэн төһө тэйиччи турарын барытын өссө төгүл үөрэтэргэ сүбэлэстилэр.
 
Одуну нэһилиэгин баһылыга Иван Петров Маҕарас сэлиэнньэтэ куораттан чугас сытар, 1000-тан тахса нэһилиэнньэлээх эрээри, баһыйар үгүс ыаллара билиҥҥээҥҥэ диэри дьиэлэрин маһынан оттон олороллорун эттэ. Гаас киирдэҕинэ нэһилиэнньэ сайдыытыгар көмөлөөх буолуоҕун бэлиэтээтэ.
 
Норуот талбыт дьокутаата Яков Ефимов дьон олоҕо-дьаһаҕа тупсарын сүрүн сорук быһыытынан көрөн, боротокуолга киирбит боппуруостары сиһилии үөрэтэргэ этии киллэрдэ.
 
Улуус баһылыга Никита Андреев улахан сэлиэнньэлэри кытары тэҥҥэ аттынааҕы нэһилиэктэр дьиэлэрин-уоттарын гааһынан хааччыйыы ордук көдьүүстээх буоларын бэлиэтээтэ.

Василий Тимофеев, «Үлэ күүһэ» хаhыат