Мунньахха Ил Түмэн араас ыҥырыыларыгар депутатынан үлэлээбит уонна саҥа ыҥырыыга депутатынан талыллыбыт парламентарий дьахталлар кытыннылар.

 

Кулууп уопсайа 38 чилиэннээх: Ольга Балабкина, Ульяна Винокурова, Екатерина Никитина, Зоя Корнилова, Альбина Поисеева, Евгения Михайлова, Антонина Григорьева, Алена Атласова уо.д.а.

 

Елена Голомарева киирии тылыгар Ил Түмэҥҥэ парламентарий дьахталлар общественнай-политическай кулууптарын 2008 сыллаахха Саха Өрөспүүбүлүкэтин Дьахталларын сойууһун көҕүлээһининэн парламент IV ыҥырыытын депутаттара тэрийбиттэрин, депутат дьахталлар киэҥ хабааннаах үлэни ыыталларын аҕынна.

 

Кулууп үлэтигэр тэриллиэҕиттэн актыыбынай кыттыыны ылбыт Лена Иванова, өрөспүүбүлүкэ Дьахталларын сойууһун бэрэссэдээтэлинэн үлэлээбит Валентина Кириллина, СССР Үрдүкү Сэбиэтин, Саха АССР Үрдүкү Сэбиэтин депутата Мария Погодаева, II ыҥырыылаах мунньахха депутаттаабыт Анна Соловьева, V ыҥырыылаах мунньах депутаттара Марфа Филиппова, Гульсум Бейсембаева уонна да атыттар тыл эттилэр, санааларын атастастылар.

 

Ил Түмэн II ыҥырыылаах мунньаҕар депутаттаабыт Максим Местников депутат дьахталлары көрсүһүүнэн эҕэрдэлээн туран, кинилэр политикаҕа кылааттарын, дойдулара сайдарын туһугар ыытар үлэлэрин бэлиэтээтэ. Чэгиэн туругу, өссө таһаарыылаах үлэни баҕарда.

 

Парламентарий дьахталлар общественнай-политическай кулууптарын салайааччыта Елена Голомарева Ил Түмэн V ыҥырыылаах мунньаҕар үлэлээбит уонна саҥа талыллыбыт депутат дьахталларга сибэкки дьөрбөтүн туттартаата. Кулууп кыттыылаахтара Елена Христофоровна ыытар үлэтин сыаналыылларын, кининэн киэн тутталларын биллэрдилэр. Көрсүһүү уопсай хаартыскаҕа түһүүнэн түмүктэннэ.