Сэтинньи 1 күнүгэр Саха Өрөспүүбүлүкэтин  Судаарыстыбаннай Мунньаҕын (Ил Түмэн) ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев, олохтоох салайыныы боппуруостарыгар сис кэмитиэтин бэрэссэдээтэлэ Василий Местников, тыа сиригэр уонна аграрнай политикаҕа сис кэмитиэтин бэрэссэдээтэлэ Андрей Находкин уонна олохтоох салайыныы бэрэстэбиитэллээх уорганнарын кытары үлэлиир салаа салайааччыта Сергей Бурнашев Чурапчы улууһугар үлэлээтилэр. 

 

Күн бастакы аҥарыгар Чурапчы улууһун баһылыга Андрей Ноговицын норуот дьокутааттарыгар улуус олоҕун-дьаһаҕын, салалта ыытар үлэтин билиһиннэрдэ.  

 

Ил Түмэн дьокутааттара тыа сиригэр кирдээх ууну ыраастаан таһаарар соҕотох объегы көрдүлэр. Бу улахан тутуу федеральнай бырагыраама үлэтин түмүгүнэн ситиһиллибит. Чурапчылар маннык сайдыы олоххо кэлбититтэн үөрэллэр эрэ. Биллэн турар, Саха сиригэр ханна да тутулла илик бу уустук объект үгүс киһи сэҥээриитин тарпыта. Кэнники сылларга элбэх тутуу ыытыллан, социальнай объектар үлэҕэ киирэннэр, хаарбах туруктаах дьиэлэртэн ыаллар толору хааччыллыылаах дьиэлэргэ көһөннөр, улууска убаҕас тобоҕу, кирдээх ууну таһаарыы үрдээбитэ бэлиэтэнэр. Онон, бу тутуу тыҥаан турар кыһалҕаны туоратыыга төһүү күүс буолар. 500 куб уу киирэр емкоһыгар кирдээх уу кутуллан, лабораторияҕа ырааһырдыыны ааһан техническэй уу буолан, алааска түһэн күөлү үөскэтиэхтээх. Быһа холуйан аны 50 сылынан бу күөл уу саппааһа буолан, кэлин кураан сылларга сири, бааһынаны нүөлсүтүүгэ туһаныллыахтаах.

 

Салгыы сис кэмитиэт бэрэссэдээтэллэрэ Чурапчы кооперативыгар сырыттылар. Кооператив дириэктэрэ Николай Аржаков үлэ миэстэтин көрдөрдө, саҥа оборудованиелары кэпсээтэ.

 

Эбиэт кэннэ дьокутааттар Хайахсыт нэһилиэгин олохтоохторун кытары көрсөн кэккэ боппуруостары ырыттылар. Улуус баһылыга Андрей Ноговицын бу күннэргэ Ил Түмэҥҥэ улуус дьаһалтата Хайахсыт нэһилиэгин дьокутааттарын Сэбиэтин ыспакка бэйэтинэн хаалларар туһунан көрдөһүү сурук ыыппытын иһитиннэрдэ. Нэһилиэк баһылыгын эбээһинэһин быстах кэмҥэ толорооччу Герман Егоров 2017 сыллаахха 11 киһи талыллан дьокутааттар Сэбиэттэрэ тэриллибитин, кинилэр кэмитиэттэринэн арахсан нэһилиэнньэни кытта үлэни ыыппыттарын, састаап эдэрин, үлэлиир кыахтаахтарын кэпсээтэ.

 

Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников кэнники сылларга сокуоҥҥа уларыйыылары сырдатта, дьокутааттарга аналлаах семинар ыытыллыаҕын эттэ.  

 

Тыа сиригэр уонна аграрнай политикаҕа сис кэмитиэт бэрэссэдээтэлэ Андрей Находкин тыа хаһаайыстыбатын эйгэтин, үүт харчытын, оттук туһунан кэпсээтэ.

 

Ыччат дьыалаларыгар, физическэй култуураҕа уонна спорка сис кэмитиэт бэрэссэдээтэлэ, Ил Түмэҥҥэ Чурапчытааҕы 30 №-дээх быыбардыыр уокуруктан дьокутаат Михаил Гуляев балаҕан ыйын 9 күнүгэр ыытыллыбыт быыбарга нэһилиэк көхтөөх кыттыыны ылбытын иһин махтанна. Олохтоохтор этиилэрин бэлиэтэммитин, дьокутааттар Сэбиэттэрин ыспакка, оннунан хаалларарга сөбүлэһэрин, Хайахсыт нэһилиэгин мунньаҕа ыытар сессиятыгар анаан тахсан кыттыыны ылыан сөбүн, Хайахсыт нэһилиэгэ инники сайдыытыгар туох кыалларынан көмөлөһөрүн туһунан иһитиннэрдэ.  

 

Олохтоохтор өрөспүүбүлүкэ дьокутааттара ыытар үлэлэрин “Ил Түмэн” хаһыаттан ааҕа, билэ-көрө олороллорун кэпсээтилэр, нэһилиэктэригэр талыллыбыт дьокутааттарга үлэлииргэ кыах биэрэллэригэр көрдөстүлэр. Мунньах түмүгэр мустубут дьон нэһилиэк дьокутааттарын Сэбиэтин ыспакка, оннунан хаалларарга сүүс бырыһыан сөбүлэһэллэрин биллэрэн куоластаатылар.

 

Светлана Диодорова