Кини Бүлүүгэ самолетунан кэлээт да, Дьөһөгөй түһүлгэтин иппод­ромугар уонна Олоҥхо Ыһыаҕын сүрүн тэрээһинэ ыытыллар “Хомустаах” культурнай-этнографическай комплексыгар, итиэннэ Бүлүү к. киинигэр турар Олоҥхо дьиэтигэр сылдьан тутуллубут объектары уонна тутуллан бүтэн эрэр саҥа тутуулары барытын кэрийэн көрдө. Александр Николаевич үлэ-хамнас сүрүн графиктан хаалбакка тутуһуллан иһэрин, эбии туох кыһалҕалар, итэҕэстэр, көрүүлэр баалларыгар тохтоон, миэстэтигэр сиһилии билсиһэн кэпсэттэ, туох боппуруостар баалларын ыйыталаста.

 

Ол кэнниттэн Ил Түмэн Бэрэссэдээтэлэ Александр Жирков улуус дьаһалтатыгар улууска республикатааҕы Олоҥхо Ыһыаҕын тэрийэр комиссия салайааччылара, чилиэн­нэрэ кыттыылаах мунньаҕы ыытта. Манна Олоҥхо Ыһыа­ҕар бэлэмнэнии түмүктүүр биэтэгэр киир­битинэн, бары боппуруос­тары тутатына быһаарыыга, дьаһаллары ылыыга аһаҕас, киэҥ кэпсэтии барда. Ыытыллыбыт үлэ­лэр­гэ сүрүн иһи­тиннэриини улуус баһылыга Сергей Ви­нокуров оҥордо. Ол кэнниттэн Александр Жирков бэйэтин санаала­рын, көрүүлэрин киир­бит боп­пу­руос­­­тар­га сыһыары тутан чопчулаан кэп­сээ­тэ, элбэҕи ыйыталаста. Ол курдук хорчуоппалар икки күн устата үлэлиэхтээхтэрин, сибиэһэй эт аһылыга, быырпах, биэ кымыһа баар буолуохтаахтарын, сөптөөх көҥүл бэриллибитин, үлэлиир дьон медкомиссияны ааһыахтаахтар о.д.а. этилиннэ. Ханна да буоларын курдук, ыһыаҕы ыытыыга туһааннаах улуус бэйэтэ хаһан да хатыламмат, дьон сэргиир ураты тэрээ­һиннэрдээх буолуохтааҕа эмиэ бэлиэтэннэ. "Ити көрүҥнэр эһиэхэ толору бааллар, ону арыый да чочуйан, чопчулаан биэрдэххитинэ, Бүлүү ыһыаҕа уостан түспэт номох, кэпсэл буолар кыахтаах", -- диэтэ спикер. Ол курдук республика тимир уустара са­ха­­лыы дьиҥнээх тимир уһаа­рыы­тын, батыйа, хо­мус, быһах оҥо­руу­тун көрдөрүөхтэрэ, оттон ыһыах саа­май тутулун көрдө­рөр тойук, оһуокай, олоҥхо кыра оҕо­лортон саҕалаан үс ураһанан ыытыл­лыаҕа. Маны сэргэ үгүс дьон болҕом­тотун тардар ат сүүрдүүтэ икки күн устата киэһэлик, сөрүүн түһүүтэ ыытыллара чуолкайданна. Итини  сэргэ ыһыах культурнай-спортивнай тэрээһиннэрэ чопчу бигэргэтиллэн, утуу-субуу ыытыллалларын кини бэлиэтээтэ.

 

Быйылгы Олоҥхо ыһыаҕын кылаабынай режиссер Валентина Якимец ыһыах үөрүүлээх аһыллыытыгар ыалдьыттары билиһиннэриигэ бүтүн бары делегациянан буолбакка, улуус, нэһилиэктэр баһылыктара кыттыахтаахтарын туһунан эттэ. Онтон ыһыахха дьону таһыы үс маршрутунан сарсыарда 7 чаастан түүн 1 чааска диэри төлөбүрэ суох оҥоһулларын СР транспорка министрин солбуйааччы С.Н. Владимировка сорудахтанна. Бу дьыалабыай көрсүһүүгэ Ил Түмэн депутата И.Ю. Григорьев кыттыыны ылла. Ат сүүрдүүтүгэр Г.С. Евсеев, оһуокайга, тойукка дьон кыттыытын туһунан Н.Н. Иванова, Олоҥхо Ыһыаҕар бэлэмнэнии туһунан Олоҥхо дирекциятын салайааччыта Т.П. Степанова кэпсэтиигэ кытыннылар.

 

Түмүккэ Ил Түмэн Бэрэссэдээтэлэ Александр Жирков республи­катааҕы Олоҥхо Ыһыаҕар бэлэмнэниигэ Бүлүүгэ сөптөөх үлэ-хамнас ыытыллыбытын уонна бүтэһик биэтэккэ биир күн быһаарар кэмигэр бары күүскэ түмсүүлээхтик үлэлиирбитигэр ыҥырда, онно эрэнэрин биллэрдэ.