Тэрээһиҥҥэ Ил Түмэн Бэрэссэдээтэлин бастакы солбуйааччы Анатолий Добрянцев, Ил Түмэн Бэрэссэдээтэлин солбуйааччы Виктор Губарев, Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Михаил Гуляев, Дьокуускай куорат Думатын бэрэссэдээтэлэ Александр Саввинов, Саха Өрөспүүбүлүкэтин муниципальнай тэриллиилэрин Сэбиэттэрин бэрэссэдээтэлэ Анатолий Кистенев, улуустар мунньахтарын бэрэссэдээтэллэрэ уонна муниципальнай тэриллиилэр депутаттара кыттыыны ыллылар.

 

Ил Түмэн Бэрэссэдээтэлин бастакы солбуйааччы Анатолий Добрянцев мунньах кыттыылаахтарыгар ааспыт сылга Саха сирин историятыгар аан бастаан олохтоох салайыныы депутаттарын түмэр сийиэс ыытыллыбытын, бу тэрээһин депутаттар үлэлэрин ис хоһоонун тупсарарга, бэрэстэбиитэллээх уоргаҥҥа кинилэр боломуочуйаларын үрдэтиигэ анаммытын санатта. Сийиэс түмүгүнэн ылыныллыбыт резолюцияҕа Ил Түмэн быһаарыытыгар киирбит боппуруостарынан сыл устата үлэ ыытылынна диэн бэлиэтээтэ.

 

Кини салгыы Ил Түмэн уонна өрөспүүбүлүкэ муниципальнай тэриллиилэрин бэрэстэбиитэллээх уорганнара бииргэ үлэлиир концепциялара ылыныллыбытын, Саха Өрөспүүбүлүкэтин Судаарыстыбаннай Мунньаҕар (Ил Түмэҥҥэ) Бэрэссэдээтэл Александр Жирков дьаһалынан муниципальнай тэриллиилэр бэрэстэбиитэллээх уорганнарын кытта үлэлиир саҥа отдел тэриллибитин иһитиннэрдэ. Итиэннэ бүгүҥҥү мунньахха Ил Түмэн иһинэн муниципальнай тэриллиилэр бэрэстэбиитэллээх уорганнарын Сэбиэтин талыахтаахтарын санатта. 

 

Анатолий Добрянцев бастакы сийиэс резолюцията олоххо киириитигэр Бүлүү, Горнай, Мэҥэ Хаҥалас, Нерюнгри, Ньурба, Өлөөн, Таатта, Уус Алдан, Хаҥалас, Чурапчы улуустара таһаарыылаах үлэлэрин бэлиэтээтэ. Муниципальнай тэриллиилэр бэрэстэбиитэллээх уорганнарын Ассоциацията Мэҥэ Хаҥаласка, Ньурбаҕа, Өлөөҥҥө, Тааттаҕа, Уус Алдаҥҥа тэриллибитин, Дьааҥыга, Мэҥэ Хаҥаласка, Мирнэйгэ, Нерюнгрига, Ньурбаҕа, Өлүөхүмэҕэ, Өлөөҥҥө, Тааттаҕа, Уус Алдаҥҥа, Хаҥаласка эдэр ыччат парламена үлэлиирин иһитиннэрдэ, атын улуустарга холобур оҥордо.

 

2017 сыл балаҕан ыйыгар ыытыллыбыт биир мандааттаах оройуон Сэбиэтин депутаттарын быыбара Аммаҕа, Горнайга, Уус Алдаҥҥа, Өлөөҥҥө, Уус Маайаҕа тэрээһиннээхтик ааспытын эттэ. Анаабыр, Дьааҥы, Мэҥэ Хаҥалас уонна Хаҥалас улуустара бу хайысхаҕа үлэни үчүгэйдик саҕалаабыттарын иһитиннэрдэ.    

 

Анатолий Анатольевич: “Инникитин өрөспүүбүлүкэ үрдүнэн олохтоох салайыныы муниципальнай тэриллиитин депуттарын быыбарын биир мандааттаах уокурукка ыытыахпытын сөп. Депутаттар нэһилиэнньэни былаастыын холбуур, ситимниир улахан суолталаах соруктаахтар, кинилэр сүрүн үбү-харчыны быһаараллар, бюджеты ылыналлар. Нэһилиэк, улуус сайдыытын, кэскилин быһаарар, түстүүр дьоммут кинилэр буолаллар”, - диэн Ил Түмэн Бэрэссэдээтэлин бастакы солбуйааччы Анатолий Добрянцев эттэ.   

 

Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Михаил Гуляев бүгүҥҥү күҥҥэ резолюция олоххо киирэригэр Бырабыыталыстыба туһааннаах үлэни ыыппытын кэпсээтэ. "Гражданскай уопсастыба институттарын сайдыытын министерствота улуус баһылыктарыгар аналлаах семинар, төгүрүк остуол ыыппыта, методическай көмө оҥорбута, сүбэ-ама биэрбитэ. Муус устар 5 күнүгэр олохтоох салайыныы сайдыытыгар туһуламмыт семинар ыытыллара былааннанар. Итини сэргэ Аммаҕа, Ньурбаҕа, Нерюнгрига, Хаҥаласка зональнай форумнары тэрийиэхпит. Муниципальнай тэриллиилэр уопсастыбаннай тэрилтэлэри, ТОС-тары, актыбыыстары кытары бииргэ үлэлээһиннэрин тула кэпсэтии буолуоҕа", - диэн Михаил Дмитриевич үлэ былаанын сырдатта.

 

Бырабыыталыстыба бэрэссэдээтэлин солбуйааччы официальнай сайтка Ил Дархан Егор Борисов ыйааҕынан инникитин өрөспүүбүлүкэни салайар үлэһиттэргэ аналлаах аһаҕас куонкурус биллэриллибитин, кадры үүннэриигэ болҕомто уурулларын кэпсээтэ. Бу куонкуруска барыта 45 сайабылыанньа киирбит, кинилэртэн 13 киһи резервэҕэ талыллыбыт.

 

Инновационнай менеджмент үрдүкү оскуолатын ректора Сардаана Татаринова депутаттарга, дьаһалта үлэһиттэригэр аналлаах үөрэх барбытын уонна ыытылларын сырдатта.

 

Мунньах программатынан депутаттар эбиэккэ диэри үс боппуруоһу көрдүлэр. Бастакытынан, Саха Өрөспүүбүлүкэтин V ыҥырыылаах Ил Түмэнин көҕүлээһининэн Дьокуускай куоракка 2017 сыл кулун тутар 29-30 күннэригэр ыытыллыбыт бастакы сийиэскэ ылыныллыбыт резолюция төһө олоххо киирбитин, үлэ-хамнас хайдах баран иһэрин, этиилэрин, санааларын үллэһиннилэр.

 

Дьокуускай куорат Думатын бэрэссэдээтэлэ Александр Саввинов аҕыйах нэһилиэнньэлээх улуустарга муниципальнай тэриллии бэрэстэбиитэллээх уорганнарын мунньаҕын бэрэссэдээтэлэ үлэтиттэн босхоломмут, бэйэтэ аппараттаах буоларын туруоруста. Хамнас төлөнүллүөхтээх диэн санаатын эттэ.

 

Нерюнгри оройуоннааҕы сэбиэтин бэрэссэдээтэлэ Валерий Селин биэс сыллаах үлэтин уопутун сырдатта. Кини Ил Түмэн Бэрэссэдээтэлэ Александр Жирковка уонна сис кэмитиэт бэрэссэдээтэллэригэр улуус депутаттарын үлэлэригэр өйөбүллэрин иһин махтанна. Александр Саввинов этиитин сөпсөһөрүн иһитиннэрдэ.

 

Уус Алдан улууһун мунньаҕын бэрэссэдээтэлэ Иван Колодезников улуус мунньаҕа 17 пууннаах резолюция ылыммытын, үлэ бара турарын сырдатта. Ааспыт быыбарга 191 депутат талыллыбытын иһитиннэрдэ. "Саҥа талыллыбыт депутаттарбытыгар аналлаах семинар ыыппыппыт. Депутат статуһун, үлэтин, докумуон хайдах толоруллуохтааҕын туһунан сиһилии быһаарбыппыт", - диэн кэпсээтэ. Биир идэлээхтэрбэр "Депутат дневнигин", быыбардыыр уокуруккут "социальнай пааспарын" оҥостуҥ диэн сүбэлээтэ.

 

Өймөкөөн улууһун мунньаҕын бэрэссэдээтэлэ Татьяна Алферова ааспыт сылга бастакытын ыытыллыбыт сийиэс депутаттар үлэлэрэ тупсарыгар төһүү күүс буолбутун бэлиэтээтэ. Биэс сыллаах үлэ уопута көрдөрөрүнэн үс штаттаах аппарат тэриллэрэ наадатын эттэ.

 

Мэҥэ Хаҥалас улууһун мунньаҕын бэрэссэдээтэлэ Андрей Находкин былырыын ыытыллыбыт бастакы сийиэс депутат үлэтигэр көмөлөөх буолбутун, ылыныллыбыт резолюция инникитин даҕаны сайдыыны биэриэҕин, үлэтиттэн босхоломмут депутаты булар уустугун бэлиэтээн ыйда.

 

Ньурба улууһун мунньаҕын бэрэссэдээтэлэ Сергей Евсеев бастакы сийиэс кэнниттэн улуустарыгар депутаттарга аналлаах форум ыыппыттарын, ыҥырыылаах мунньах биэстии сыл буола-буола уларыйарынан сибээстээн муниципальнай тэриллии бэрэстэбиитэллээх уорганнарын сийиэһин туһунан Саха Өрөспүүбүлүкэтигэр сокуон ылынылларын ситиһиэҕиҥ диэн этии киллэрдэ.

 

Өлүөхүмэ улууһун депутаттарын сэбиэтин бэрэссэдээтэлэ Алексей Габышев: «Улууспутугар айылҕабыт айгыраата, ити боппуруос олохтоохтору долгутар, хостонор сир баайдаах улуустарга нолуок бэйэлэригэр төлөннүн», - диэн санаатын үллэһиннэ.

 

Норуот депутата Леонид Владимиров Алексей Габышев этиитин өйүүрүн эттэ. Ураты харыстанар ытык сирдэри өйүөҕүҥ, сир нолуога улуус бюджетыгар киирэрин, үп базата сайдарын туруорсуоҕуҥ диэтэ.

 

Мунньахха салгыы Ил Түмэн иһинэн өрөспүүбүлүкэ муниципальнай тэриллиилэрин бэрэстэбиитэллээх уорганнарын Сэбиэтин тэрийии боппуруоһа көрүлүннэ.

 

 

Василий Александрович 2013 сыллаахха Ил Түмэҥҥэ муниципальнай тэриллиилэр бэрэстэбиитэллээх уорганнарын уонна куорат уокуругун депутаттарын бастакы Сэбиэтэ тэриллибитин, бу Сэбиэккэ улуус мунньаҕын бэрэссэдээтэллэрэ киирбиттэрин, бэрэссэдээтэлинэн сис кэмитиэт салайааччыта буолбутун санатта. Сийиэс кэнниттэн депутаттар үлэлэрэ таһаарыылаах буоларыгар Сэбиэт үлэтин кэҥэтэргэ быһаарыы ылыммыттарын эттэ.   

 

Мунньах кыттыылаахтара 2013 сыллаахха тэриллибит Сэбиэти тохтотон, саҥа Сэбиэти тэрийэргэ куоластаатылар.

 

Ил Түмэн иһинэн муниципальнай тэриллиилэр бэрэстэбиитэллээх уорганнарын депутаттарыттан 75 чилиэннээх Сэбиэтэ тэрилиннэ.

 

Бэрэссэдээтэлинэн Ил Түмэн спикерэ Александр Жирков, бэрэссэдээтэли солбуйааччыларынан Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников, Дьокуускай куорат Думатын бэрэссэдээтэлэ Александр Саввинов, президиум чилиэннэринэн промышленнай оройуоннартан Нерюнгри мунньаҕын бэрэссэдээтэлэ Валерий Селин, Бүлүү умнаһын улуустарыттан Ньурба улууһун мунньаҕын бэрэссэдээтэлэ Сергей Евсеев, киин улуустартан Горнай улууһун мунньаҕын бэрэссэдээтэлэ Алквиад Тарасов, илин эҥэртэн Мэҥэ Хаҥалас улууһун бэрэссэдээтэлэ Андрей Находкин, хоту улуустартан Өймөкөөн улууһун мунньаҕын бэрэссэдээтэлэ Татьяна Алферова талылыннылар.

 

Бу Сэбиэт балаһыанньатын барылын депутаттар Ил Түмэн XXXV (уочараттаах) пленарнай мунньаҕар бигэргэтиэхтэрэ.