Амма сэбиэтин дьокутаата Людмила Александрова бэрэстэбиитэллээх уорганнар сир боппуруоһун бэрээдэктээһиҥҥэ уонна тулалыыр эйгэни харыстааһыҥҥа кыттыыларын туһунан «төгүрүк остуолга» сылдьан интэриэһиргиир ыйытыыларыгар эппиэт ылан астыммыт.
-- «Төгүрүк остуолга олус элбэх киһи сырытта. Боппуруостар үрүт үрдүгэр киирэ турдулар. Холобур, мин урут докумуонунан бигэргэттэрбит сирим «Уһук Илиҥҥи гектар туһунан» сокуонунан оҥоһуллубут каартанан сыҕарыйан, хаттаан оҥорторорбор күһэллэбин. Мин курдук балаһыанньаҕа түбэспит дьон элбэх эбит. Бу боппуруоска үлэлэһэ сылдьабыт диэн уоскуттулар. Делегаттар манна өссө биир сытыы боппуруоһу көтөхтүлэр. Холобур, сири эрдэ тэриллибит кооперативтар, бааһынай хаһаайыстыбалар ылан кэбиспиттэр. Билигин саҥа тэриллэр фермердэр, кооперативтар кинилэртэн арендалаан ыларга күһэллэллэр. Оччотугар олус ороскуотураллар. Маны сокуонунан бэрээдэктиир наадатын бэлиэтээтилэр. Маны таһынан бырайыагынан үлэни үөрэтэр квалификацияны үрдэтии куурсугар сырыттым. Тестирование аастыбыт, элбэҕи биллим. Сийиэскэ кэлбиппиттэн кэмсиммэппин. Олус туһалаахтык ааһан эрэр.
Дьаһалтаны кытта ситимнээхтик үлэлиэххэ
Сунтаар Маар Күөлүн дьокутаата Сабия Гаврилова эдэр дьокутаат. Кини инникитин үлэтигэр туһалаах билиилэри ыллым диэн этэр.
-- Бырайыагынан үлэ туһунан билэн баран эрэбин. Бу куурус кэнниттэн хас биирдии улууска, нэһилиэккэ бырайыак оҥорор тустаах специалист наада эбит дии санаатым. Бу олус сөптөөх дьаһал. Урут сатаан бырайыактаабакка, былааннаабакка, үлэбитин түмүктээбэт эбиппит. Холобур, социальнай объектар үп тиийбэккэ ортотугар диэри тутуллан баран, тураллар. Эрдэттэн ымпыгар-чымпыгар диэри былааннаан үлэлиир бу курдук итэҕэстэргэ тиэрдибэт. Дойдубар методическай матырыйаал бөҕөтө хомуйан баран эрэбин.
Сунтаартан 32 буолан кэллибит. Барытыгар олус көхтөөхтүк кытта сылдьабыт. Пленарнай мунньахха этиилээхпит. Муниципальнай тэриллии бэйэни салайыныы көрүҥүгэр киирбитэ ыраатта даҕаны, дьон бу көрүҥ иһин-таһын саҥа өйдөөн эрэр дии саныыбын. Дьокутааты норуот талар. Онон олохтоох дьаһалта уонна нэһилиэнньэни сибээстиир киһинэн дьокутаат буолар. Дьокутаат уонна дьаһалта үлэтэ ситимнээхтик үлэлииргэ этиилээхпит. Оччоҕо дьокутаат үлэтин суолтата да үрдүөҕэ.
Сардаана Кузьмина
Опубликовано: 30 марта, 2017 - 01:40
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!