Ыһыах сиэр-туом түһүлгэтигэр Үрүҥ Айыылартан уйгу-быйаҥ сайын үүнэрин көрдөһөр алгыһынан саҕаланна. Майа төрүт олохтооҕо кырдьаҕас, алгысчыт Аркадий Захаров, Петр Тихонов, Василий Винокуров аал уоту оттон алгыс баһын сыалаатылар.

 

Ол кэнниттэн киин түһүлгэҕэ Майаҕа күн-бүгүн итиэннэ урукку сылларга үлэлээн-хамсаан ааспыт  тэрилтэлэрин кэлэктиптэрин параадтаан киириилэрэ буолла, ыһыах үөрүүлээх чааһа үрдүк таһымҥа ыытылынна. Түһүлгэҕэ Майаны сэлиэнньэ быһыытынан тэриллэригэр кылаатын киллэрбит Бэйбэчэк баай сыдьааннара эмиэ кыттыыны ыллылар.

 

Ыһыах ыҥырыылаах ыалдьыттарынан Саха Өрөспүүбүлүкэтин Судаарыстыбаннай Мунньаҕын (Ил Түмэн) сис кэмитиэтин бэрэссэдээтэлэ, биир дойдулаахпыт Юрий Баишев, улуус баһылыга Николай Старостин, доҕордуу сыһыаннаах Алдан улууһун Томмот куоратын баһылыга Александр Заверюха, Майаҕа араас сылларга олохтоох Сэбиэт толорор кэмитиэтин сэкирэтээринэн үлэлээбит Татьяна Пинигина, Ольга Захарова, Людмила Заровняева-Стручкова, Марфа Ларионова, дьаһалта баһылыктарынан үлэлээбит Михаил Васильев, Александр Дьячковский, Валерий Филиппов, Наталья Пахомова, Яков Артемьев, Иван Птицын о.д.а. буоллулар. 

 

Бу күн биир дойдулаахпыт, Бэйбэчэк сиэнэ, СӨ үтүөлээх артыыската, драматург, режиссер Софья Баранова «Уол куолакал» диэн Майа устуоруйатын сырдатар испэктээкилин туруоруутуттан быһа тардыыны көрдөрдүлэр. «Майа сэлиэнньэтэ» МТ баһылыга Тимофей Нестеров туруорсуутунан Уол куолакал Таатта улууһун Чөркөөҕүттэн төттөрү дойдутугар аҕалыллыбыт кэрэ бэлиэ түгэни аһарга таҥара дьиэтин үлэһитэ, протерий Сергей Колесников ыҥырыллан Майа олохтоохторун, ыалдьаттары эҕэрдэлээтэ, Майаҕа бастакы Таҥара дьиэтин акылаата түһэн, Майа сэлиэнньэ буолбутутуттан 115 сыл ааспытын итиэннэ инникитин сэлиэнньэҕэ часовня биитэр храм тутуллан, куолакал миэстэтин буларыгар баҕа санаатын эттэ.  Майатааҕы народнай хуор толоруутугар Таҥара сибэтиэй ырыатын доҕуһуолунан куолакал ньиргиэрдээхтик лыҥкынаан, бар дьон сүргэтин көтөхтө.

 

Үрүҥ тунах ыһыах ыытыллар Ытык дуоҕатын сэлиэнньэ баһылыга Тимофей Нестеров өрө көтөҕөн үөрүүлээх быһыыга-майгыга сэргэҕэ уурда. Саха Өрөспүүбүлүкэтин Судаарыстыбаннай Мунньаҕын (Ил Түмэн) дьокутаата Юрий Баишев Майа 115 сыл анараа өртүгэр тэриллиэҕиттэн балысханнык сайдыбытын уонна инникитин өссө тупсан, Ил Дархан, улуус, сэлиэнньэ дьаһалталара ыытар бэлиитикэлэрин олоххо кииллэрэн, аныгы олох хардыытынан сайдан, чэчирээн иһиҥ диэн алгыс тылын эттэ. Эҕэрдэлэрин улуус баһылыга Николай Старостин, Майа сэлиэнньэтин дьокутааттарын сэбиэтин бэрэссэдээтэлэ Антонина Федорова, Томмот куорат баһылыга Александр Заверюха тиэртилэр.

 

Үбүлүөйдээх ыһыахха «Майа сэлиэнньэтин Бочуоттаах гражданина» ааты: үлэ бэтэрээнэ Тамара Маркова, РСФСР социлаьнай хааччыйыыга туйгуна Александра Дашеева, саастарын ситэ илик оҕолору социальнай-реабилитациялыыр киин исписэлииһэ Валерия Баишева ‒ Семенова, улуустааҕы Олох-дьаһах коммунальнай хаһаайыстыбатын управлениетын салайааччыта Илья Ильин, Озернай түөлбэ салайааччыта Надежда Сергеева, үһүс көлүөнэ оскуола салайааччыта Людмила Заровняева ‒ Стручкова, улуустааҕы киин балыыһа кылаабынай бырааһа Алексей Павлов, үлэ бэтэрээннэрэ Изабелла Герасимова, Ольга Захарова, нолуок сулууспатын бэтэрээнэ Римма Варламова, доруобуйа харыстабылын туйгуна Матрена Харитонова, чааһынай предприниматель Семен Новгородов уонна түөлбэлэри кытта үлэлиир исписэлиис Ариадна Филиппова сүктүлэр.

 

«Улууска үөрэҕирии сайдыытыгар кылаатын иһин» анал бэлиэнэн улуустааҕы үөрэх управлениетын кылаабынай исписэлииһэ Татьяна Сидорова, «Улууска култуура сайдыытыгар кылаатын иһин» биэлиэнэн Р.Г.Васильев аатынан улуустааҕы кыраайы үөрэтэр мусуой дириэктэрэ Зоя Шарина, «Успуорт уонна ыччат сайдыытыгар кылаатын иһин» бэлиэни Майатааҕы оҕо-ыччат успуорт оскуолатын хайыһарга тириэньэрэ Владимир Сидоров, «Доруобуйа харыстабылын сайдыытыгар кылаатын иһин» бэлиэнэн доруобуйа харыстабылын үлэһиттэрин боропсойууһун бэрэссэдээтэлэ Зинаида Ксенофонтова уонна «Коммунальнай хаһаайыстыба сайдыытыгар кылаатын иһин» бэлиэнэн «Теплоснаб» учаастактааҕы хочуолунайын силиэсэрэ Александр Большаков наҕараадаланнылар.

 

Майа олохтоохторун уонна ыалдьыттарын сэлиэнньэ тэрилтэлэрин холбоһуктаах эҕэрдэ кэнсиэринэн, култуура уонна успуорт эстэпиэтэтин кыайыылаахтарын ырыаларынан-үҥкүүлэринэн эҕэрдэлээтилэр.

 

Ыһыахха араас көрүҥнээх куонкурустар, күрэхтэһиилэр, онньуулар көҕүлүттэн тутулуннулар, хорчуопка, атыы-тутуу тэрилиннэ. Дьон болҕомтотун ордук тардыбыт куонкуруһынан «Оо, таптыыр мин Майам» диэн Еремей Гоголев аатынан ырыа, байаан түһүлгэтэ буолла. Кылаан бириис хаһаайынынан биллиилээх мелодист, ырыаһыт Александр Дмитриев ‒ Чүмэчи төрөппүт кыыһа, Мооруктааҕы сынньалаҥ дьиэтин дириэктэрэ Марфа Егорова буолла. Быыппастар былчыҥнаахтар, быһый атахтаахтар биэс түһүмэхтээх күүстэрин холонор «Майа Уолан 2017» күрэхтэһиигэ 11 уол кыттыбытыттан муҥутур кыайыылааҕынан Намнааҕы педагогическай колледж төрдүс кууруһун устудьуона, Майа эрэллээх ыччата Давид Колесов таҕыста. 

 

Майа 115 сылын көрсө үбүлүөйдээх ыһыах дьоро киэһэтинэн, кэтэһиилээх түгэнинэн Баһылай Манчаары аатынан стадиоҥҥа «Майа Куо ‒ 2017» куонкурус итиэннэ көрөөччүлэр киирии билиэттэринэн Майа дьаһалтата туруорбут сыаналаах бириистэри оонньотуу буолла.

 

Майаҕа саамай кэрэ, бастыҥ уонна талааннаах кэрэ аҥары талар куонкуруска М.К.Аммосов аатынан Хотугулуу-Илиҥҥи федеральнай университетын педагогическай институтугар үһүс кууруска үөрэнэр, «Кыталык» ансаамбылга үҥкүүлүүр Майя Степанова, В.П.Ларионов аатынан Майатааҕы орто оскуола тэрийээччи ‒ педагога Алена Рязанская, улуустааҕы киин балыыһа поликлиникатыгар терапевт бырааһынан үлэлиир Айыына Григорьева, И.М.Сосин аатынан улуустааҕы киин бибилэтиэкэ бибилэтиэкэрэ Аграфена Зыкова, М.К.Попова аатынан Майатааҕы оҕо ускуустубатын оскуолатын преподавателэ Ньургуйаана Игнатьева уонна Д.Ф.Ходулов аатынан норуот айымньытын дьиэтигэр фольклорга исписэлииһэ Мария Иванова кытыннылар.

 

Кытааччылар бэйэни билиһиннэрии, талааннарын көрдөрүү уонна Майа 115 сылыгар аналлаах ыйыыталарга сөптөөх эппиэттэри биэрэр түһүмэхтэри аастылар. Көрөөччүлэри иэйиилээх фламенко, сахалыы дьиэрэҥкэй, кыталык үҥкүүлэринэн, ырыаларынан-тойуктарынан, хомустарынан сөхтөрдүлэр, Майа сэлиэнньэтин устуоруйатын төһө билэллэрин хоруйдаатылар. «Мичийэ Куо» ааты Аграфена Зыкова, «Сандаара Куо» ‒  Айыына Григорьева, «Сардаана Куо» ‒ Ньургуйаана Игнатьева, «Ньургуйаана Куо» ‒ Алена Рязанская, «Күннэй Куо» ‒ Мария Иванова уонна «Майа Куо ‒ 2017» ааты Майя Степанова ыллылар. Кыттааччыларга сыанлаах анал бириистэри Бэйбэчэк баай сиэннэрэ Максимовтар, Сергучевтар, Васильевтар дьиэ кэргэттэрэ уонна СӨ үтүөлээх артыыската Софья Баранова ‒ Сергучева туруордулар. Кыайыылаахха «Майа сэлиэнньэтэ» МТ дьаһалтата туруорбут саҕынньах атыылаһыыга 80 тыһыынча солкуобайдаах сэртипикээти туттардылар. 

 

Манчаары аатынан стадион трибунатыгар толору мустубут Майа олохтоохторун уонна ыалдьыттарын саха эстрадатын артыыстара Аскалон Павлов, Александр Бурнашев, Сахаайа, Мирослав Егоров,  Милена Борисова эҕэрдэлээтилэр.

 

Үбүлүөйдээх тэрээһин сүүүйүүлээх лотереятыгар  олоххо-дьаһахха, хаһаайыстыбаҕа туттуллар 36 сыаналаах бириис, ону сэргэ тэлэбиисэр, халадыынньык, матасыыкыл хаһаайыннарын буллулар. Кылаабынай успуонсар быһыытынан чааһынай предприниматель Руслан Федотов буолла.