Ыһыах аһыллыан иннинэ үтүө-мааны ыалдьыттары – Саха республикатын Президенин Егор Борисовы, Ил Түмэн председателин Виталий Басыгысовы, Ил Түмэн вице-спикерин, Олоҥхо уон сылын бэлэмнээн ыытыыга Саха Республикатын Национальнай тэрийэр комитетын бэрэссэдээтэлин Александр Жиркову, Саха республикатын правительствотын председателин солбуйааччыны Феодосия Габышеваны, Саха республикатын ис дьыалаҕа министрин Виктор Кошелевы, Мэҥэ-Хаҥалас улууһун баһылыгын Николай Старостины, Максим Кирович Аммосов кыыһын Лена Максимовна Аммосованы, кини кэргэнин Владимир Михайлович Гольдберы уонна республика араас улуустарыттан кэлбит делегациялары – «Сиэр-туом» түһүлгэҕэ «Ытык маска сүгүрүйүү» церемониетыгар ыҥырдылар. Кэлбит дьону түптэ буруотунан ыраастаан көрүстүлэр.

 

Ол кэнниттэн ыалдьыттары «Моҕол ураһаҕа» ыҥыран, түһүлгэ ыраастаныытын ыыттылар.Сахалыы сиэри-туому тутуһан, 27 толуу дьахтар чэчир анныгар түптэлэрин уматтылар, ситии тутан киллэрэн чэчирдэргэ баайдылар, ыалдьыттарын арчылаан-араҥаччылаан Айыы астарынан – уохтаах кымыһынан, арыылаах алаадьынан, эмис сыалаах этинэн айах туттулар.

 

Онтон күндү ыалдьыттарын дьон тоҕуоруспут, кэскил тэнийбит «Күөх Хонуу» түһүлгэтигэр Ыһыаҕы үөрүүлээхтик аһыыга ыҥырдылар, дьоһуннаах олбоххо олортулар.

 

Быйылгы Олоҥхо ыһыаҕар Саха сирин бары улуустарыттан кэлэ сатаабыттар, бэл ыраах хоту сытар Абыйтан, Муоматтан, Өлөөнтөн, Үөһээ Халыматтан  ыалдьыттар мэҥэлэр үөрүүлэрин үллэһиннилэр. Ыһыах ыһааччылар хас биирдии улуус делегациятын кытта билиһиннэрдилэр, улуус ахсын биллэр олоҥхоһуттарын аатын аҕыннылар, ытыс тыаһынан көрүстүлэр.

 

93 айаас аты миинньэн Мэҥэ-Хаҥалас улууһун 31 нэһилиэктэрин баһылыктара уонна кинилэр солбуйааччылара киин түһүлгэҕэ киирдилэр.

 

Саха сирин Президенэ Егор Борисов мустубут дьону Олоҥхоҕо анаммыт улуу бырааһынньыгынан итиитик-истиҥник эҕэрдэлээтэ. Президент Мэҥэ-Хаҥалака ыытыллар ыһыаҕы дириҥ ис хоһоонноох диэн бэлиэтээтэ. «Биһиги норуоппут олоҥхото саха кэскилэ хайдах барыахтааҕын, туох сиэри-туому тутуһуохтаахпытын, туох санааҕа түмүллүөхтээхпитин, кэлэр кэскили хайдах ууруохтаахпытын түстүүр. Олоҥхо саха сайдарын туһугар оҥоһуулааҕын биһиги умнуо суохтаахпыт» - диэтэ Егор Борисов.

 

Олоҥхо ыһыаҕын көһөрүллэ сылдьар Ытык дуоҕа бэлиэтин Ньурба улууһун баһылыга Борис Попов Саха сирин Президенгэр Егор Борисовка аҕалан туттарбытын, республика Ил Дархана Мэҥэ-Хаҥалас улууһун баһылыгар Николай Старостиҥҥа туттарда. Улуус баһылыга Ытык дуоҕаны Ытык сэргэҕэ аста.

 

Ил Түмэн бэрэссэдээтэлэ Виталий Басыгысов эҕэрдэ тылыгар быйыл Олоҥхо ыһыаҕа сэттис төгүлүн ыытыллар диэн бэлиэтээтэ. «Хас биирдии ыһыаҕы ыһар улуус Ыһыах ыытыытыгар саҥа сүүрээннэри киллэрэр, үгэстэри байытар. Олоҥхо ыһыаҕа уруккуну, билиҥҥини уонна сарсыҥҥыны холбуур сүдү күүстээх», - диэтэ Виталий Басыгысов.

 

Ил Түмэн вице-спикерэ, Олоҥхо уон сылын бэлэмнээн ыытыыга Саха Республикатын Национальнай тэрийэр комитетын бэрэссэдээтэлэ Александр Жирков Саха сиригэр өлгөм мэччирэҥнээх, үүттүгэннээх оттоох, хойуу ходуһалаах сыл салалыннын диэн алгыһын эттэ. «Саха дьоно саргыбыт салалыннын, иитэр сүөһүбүт күрүөлэннин, төрөтөр оҕобут төлкөлөннүн, биир бэйэбит биэс буолуохайыҥ, аал-уоппут күүдэпчилэнэ умайдын, алаһа дьиэбит арчыланнын, дьол-соргу тосхойдун. Уруй-туску, айхал-мичил буоллун», – диэн бар дьонугар алгыс тылын анаата уонна «Олоҥхо ыһыаҕа саҕаланна, Олоҥхо ыһыаҕа салҕаныаҕа», - диэн тоһоҕолоон эттэ.

 

Итини тэҥэ, эҕэрдэ тыллары Саха республикатын правительствотын председателин солбуйааччы Феодосия Габышева, Мэҥэ-Хаҥалас улууһун баһылыга Николай Старостин эттилэр.

 

Олоҥхо ыһыаҕын аһыллыытыгар «Аал Луук Мас тускулаа, бар дьоммут уйгулаах олоҕун» диэн театрализованнай көрдөрүүнү дьон астына көрдүлэр. «Айылҕа уһуктуута» үҥкүүнү 504 дьахтар толордулар ,170 оҕо Аан Алахчыны арыаллаатылар. Ону тэҥэ, Мэҥэ-Хаҥалас биллэр олоҥхоһуттарын Николай Абрамов-Кынат, Иннокентий Бурнашев-Тоҥ Суорун, Николай Степанов-Ноорой ааттарын ааттатар, сурахтарын сураҕырдар сиэннэрэ уонна хос сиэннэрэ Аксинья Абрамова, Николай Баишев, Анисия Степанова-Маркова олоҥхоттон быһа тардыылары толорон, дьон сэҥээриитин ыллылар.

 

Ыһыах аһыллыытын Камчаткаттан ыалдьыттыы кэлбит «Мэнго» үҥкүү коллектива киэргэттэ.