Миитиҥҥэ кэлбит дьону Саха Республикатын Президенин уонна Правительствотын дьаһалтатын салайааччыта Юрий Куприянов республика үрдүкү салалтатын аатыттан эҕэрдэ тылынан аста: “Бүгүҥҥү бырааһынньыгы биһиги Саха сирэ Россия састаабыгар киирбитэ 375 сылыгар аналлаах пааматынньык аттыгар көрсөрбүт улахан суолталаах. Бу – аныгы Россия биир сомоҕо уонна түмсүүлээх буолуутун көрдөрөр. Республика бары олохтоохторун эҕэрдэлээн туран, эһиги хас биирдиигит чугас дьоҥҥутун, доҕотторгутун амарах сыһыаҥҥытынан угуттааҥ, сырдыгынан сыдьаайыҥ диэн баҕа санаабын тиэрдэбин”.

 

Норуот сомоҕолоһуутун күнүнэн Ил Түмэн Председателин солбуйааччы Ольга Макиенко республика Государственнай Мунньаҕын салалтатын уонна норуот депутаттарын ааттарыттан эҕэрдэлээтэ. “Үтүө күнүнэн, күндү киин куорат олохтоохторо! Эһигини Ил Түмэн аатыттан Норуот сомоҕолоһуутун күнүнэн эҕэрдэлиибин! Бу күн биһиги историябытыттан дириҥ силис-мутук тардар. Онон норуот дьиҥнээх бырааһынньыгынан, норуот сомоҕолоһуутун бырааһынньыгынан буолуоҕар баҕарабын”, -- диэн туран, Ольга Макиенко куорат бары олохтоохторугар этэҥҥэ буолууну, ситиһиилэри баҕарда.

 

Дьокуускай куорат дьаһалтатын аатыттан мэр Айсен Николаев эҕэрдэ тылыгар биһиги элбэх омуктаах дойдуга олорорбутунан сибээстээн, иллээх-эйэлээх буоларга дьулуһуохтаахпытыгар тохтоото итиэннэ “төһө да араас буолларбыт, биһиги күүспүт – сомоҕолоһууга, норуоттар икки ардыларыгар доҕордоһуу уонна сөбүлэһии баар буолуута Россия уонна Саха сирин кэскилин мэктиэтэ буолар”, – диэн бэлиэтээтэ.

 

Мустубут дьону салгыы РФ Юстицияҕа министерствотын Саха сиринээҕи управлениетын салайааччыта Ольга Романова уонна ХИФУ геологоразведочнай факультетын 3 куурсун студена Артем Евмененко эҕэрдэлээтилэр. Ити кэннэ миитин кыттыылаахтара пааматынньыкка аалай кыһыл гвоздикалары уурдулар. Бырааһынньыктааҕы өрөгөй музыката тыалы кытта сырса, дуораһыйа тарҕанна.