Быйыл Уус-Алдан улууһун Найахы народнай хора тэриллибитэ 50 сааһын туолла. Народнай хор үбүлүөйдээх сылыгар элбэх культурнай тэрээһиннэргэ кытынна. Ол чэрчитинэн 45 киһиттэн састааптаах хор бөлөҕө сэтинньи 7 күнүттэн сэтинньи 15 күнүгэр диэри Санкт-Петербурга ыытыллаары турар норуоттар икки ардыларынаҕы “Интерфолк” этнокультурнай фольклорнай фестивальга кытта баран иһэр. Хор коллектива фестивальга барыан иннинэ сэтинньи 7 күнүгэр Ил Түмэҥҥэ сырытта. Республика Государственнай Мунньаҕын Председателэ Александр Жирков биир дойдулаахтарын истиҥ-иһирэх быһыыга-майгыга көрүстэ.
Найахытааҕы народнай хор 1963 сыллаахха тэриллиэҕиттэн, урукку Союзтан саҕалаан күн бүгүҥҥэ диэри, Россия таһымыгар биһирэнэр норуот хорун аатырбыт айар коллективынан киэҥник биллэр. Хор бастакы хормейстера Үлэ Кыһыл знамята уордьан кавалера, САССР культуратын үтүөлээх үлэһитэ Семен Гаврильевич Васильев Найахы хорун уус-уран искусство быһыытынан бүтүн Союз таһымыгар таһаарбыт үтүөтүн уус-алданнар умнубаттар.
Кини утумнааччыта Светлана Сергеевна Гоголева өҥөтүнэн хор республикатааҕы көрүүлэргэ, фестивалларга бастакы миэстэлэртэн түспэккэ, элбэхтэ Союз уонна Дальнай Восток, Сибиир хоровой коллективтарын куоталаһыыларыгар лауреат ааттарын ылаттаабыта.
С.Тарасов тылыгар “Үчүгэйиэн сааскы киэһэ”, Н.Сергеев тылыгар “Тугун бэрдэй кэрэтэй”, А.Алексеев тылыгар “Сэбирдэхтэр” уо.д.а. ырыалар нороднай хор саха дьонугар-сэргэтигэр биһирэнэр ырыаларыттан биирдэстэринэн буолаллар. Оттон Л.Попов тылыгар “Найахылар ыллыыллар” диэн ырыа нэһилиэк гимнин кэриэтэ ыллана сылдьар. 1965 сыллаахха хорга үҥкүү уонна хор коллективын статуһа бэриллэн, 1966 сыллаахха “народнай хор” аата иҥэриллибитэ.
Найахы нэһилиэгин баһылыга Петр Сивцев хор 50 сылынан сибээстээн, нэһилиэк быйылгы улахан тэрээһиннэрэ, ыһыах барыта ол чэрчитинэн ыытыллыбыттарын, хор туһунан кинигэни таһаарбыттарын, бу бэлиэ түгэни түмүктүүр үөрүүлээх дьоро күн ахсынньы 14 күнүгэр буолуохтааҕын туһунан кэпсээтэ.
Оттон Найахытааҕы И.И.Артамонов аатынан Сынньалаҥ киинин директора Дьулустаан Гаврильев Санкт-Петербурга “Интерфолк” фестивальга народнай хор ханнык нүөмэрдэринэн кытта баран иһэрин туһунан иһитиннэрдэ. Ол курдук ырыаны-тойугу сэргэ хор састаабыгар киирсэр дьахталлар үҥкүүлэрин бөлөҕө найахылыы оһуохай композициятынан кыттыахтара.
Фестивальга кыттар нүөмэрдэри хормейстер Наталия Бочкарева, концертмейстер Станислав Луковцев, хореограф Мария Лебедкина бэлэмнээбиттэр. Хор кыттыылаахтарын үксэ оскуола уонна оҕо саадын үлэһиттэрэ буолалларынан, кинилэргэ идэлэринэн көрүллэр айан төлөбүрүн туһаммыттар, оттон пенсиялаахтарга Пенсионнай фонданан айаҥҥа чэпчэтии көрүллүбүт.
Көрсүһүү түмүгэр Александр Жирков Найахы народнай хорун үйэ аҥардаах үбүлүөйүнэн эҕэрдэлээн туран, Санкт-Петербурга норуоттар икки ардыларынааҕы улахан этнокультурнай, фольклорнай фестиваль түһүлгэтиттэн кыайыы-хотуу көтөллөөх, үөрэн-көтөн эргиллэллэригэр баҕа санаатын тиэртэ.
Ил Түмэн пресс-сулууспата
Опубликовано: 7 ноября, 2013 - 18:49
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!