Александр Жирков Ил Түмэн уочараттаах III пленарнай мунньаҕын түмүгүнэн сэтинньи 7 күнүгэр республика хаһыаттарын, телевидениетын, радиотын корреспонденнарын ыйытыыларыгар хоруйдаата.

 

“Саха” НКИК корреспондена Александра Охлопкова кэлэр сыл бюджетыттан ордук элбэх харчы ханнык хайысхаҕа көрүллүөҕүн туһунан ыйытыытыгар Александр Жирков бюджет эйгэтин үлэһиттэрин хамнаһыгар барыа диэн хоруйдаата.

 

“Саха информационнай агентство” корреспондена Руслан Басыгысов парламент III пленарнай мунньаҕын бэбиэскэтин саамай суолталаах боппуруостарыгар тохтоон, ыйыталаста. Спикер Саха Республикатын 2014 сыллааҕы государственнай бюджетын туһунан сокуон барылын норуот депутаттара бастакы ааҕыыга дьүүллэһэн ылыммыттарын  парламент сэтинньитээҕи сессиятын биир саамай суолталаах быһаарыытынан сыаналаата.

 

“Саха сирэ” хаһыат политикаҕа отделын корреспондена Саргылана Данилова Тыа сирин сыла биэс сылга уһатыллыбытынан үбүлээһин сылларынан биир тэҥник көрүллэн иһиэн, “АЛРОСА” АК акцияларын атыытыттан киирбит үп туттуллуутун хонтуруоллуур депутаттар өттүлэриттэн хамыыһыйа тэриллиэн, “Сахам сирэ 21 үйэҕэ” үтүө дьыала хамсааһын чэрчитинэн тыа сиригэр тутуулары үбүлээһин хайдах буолуон сөптөрүн тустарынан итиэннэ программаҕа киирбит объектар ахсааннара сарбыллыа дуо диэн ыйытыыларыгар Ил Түмэн Председателэ чуолкай хоруйдары биэрдэ.

 

Ол курдук Тыа сирин сыла кэлэр биэс сылга уһатыллыбытын быһыытынан үбүлээһин ити сылларга тэҥник баран иһиэхтээх. Үтүө дьыала программатынан ыытыллар тутуулары үбүлээһини норуот депутаттара сарбыйбаты туруулаһар санаалаахтар. Спикер бу туһунан этэригэр ити сарбыйыыга ордук кытыы уонна кыра нэһилиэктэр оҕустарыахтарын сөбүн ыйда. Оттон “АЛРОСА” АК акциятын атыытыттан киирбит үбү туһаныыга парламент өттүттэн хонтуруол баар буолуо.

 

Ити курдук Александр Жирков пленарнай мунньах бүтээтин кытта тутатына республика хаһыаттарын, “СИА” уонна “Саха” НКИК корреспонденнарын элбэх ыйытыыларыгар толору эппиэттээтэ.