“Саха Республикатыгар куораты тутуу политикатын туһунан” СР сокуонугар уларытыылары киллэрии туһунан сокуон барылын иккис ааҕыыга дьүүллэһии бэрээдэгинэн сис кэмитиэт бэрэссэдээтэлэ Александр Романов дакылаата истилиннэ.

Дакылааччыт этэринэн, уларытыылары киллэрэр сокуон барыла икки ыстатыйаттан турар. Ол курдук бу сокуон кэккэ ыстатыйаларыгар 1 ыстатыйанан уларытыылар киллэриллиэхтээхтэр.  Сокуоҥҥа уларытыылары киллэрии коммунальнай инфраструктура ситимин кэлимник сайыннарыы уонна куораты тутууга сыһыаннаах сокуон нуормаларын күүстэригэр киллэрии болдьохторун чааһыгар федеральнай сокуоҥҥа сөп түбэһиннэрии чэрчитинэн оҥоһуллар. Кэмитиэт чилиэннэрэ сокуон барылын Ил Түмэн кэлэр пленарнай мунньаҕа иккис ааҕыыга ылынарыгар ыытарга куоластаатылар.

 

Салгыы кэмитиэккэ Александр Романов “Олорор дьиэни тутууну сайыннарыыга көмөлөһөр Федеральнай фонда босхо, болдьохтоох тутууга эбэтэр түүлээһиҥҥэ бэриллибит сирин учаастагар тутуллубут эбэтэр тутуллар экономическай кылаастаах олорор дьиэни ылар бырааптаах гражданнар испииһэктэрин оҥоруу быраабылаларын туһунан” сокуону көҕүлээһинэ бастакы ааҕыы бэрээдэгинэн көрүлүннэ.

 

Бырайыакка эконом-кылаастаах олорор дьиэни ылыыга сөбүлэспит гражданнар испииһэктэрэ итинник олорор дьиэни ылар бырааптаах гражданнар испииһэктэриттэн оҥоһуллар диэн этиллэр.

Оттон сайабылыанньаны биэрбиттэри регистрациялыыр кинигэҕэ киирбиттэр итинник эконом-кылаастаах олорор дьиэлэри бары ылыллаллар диэн буолбатах. Сайабылыанньаҕа ыйыллар чахчылар уонна докумуоннар төһө кырдьыктаахтарын бэрэбиэркэлиир эрэйиллэр. Ити өттүгэр сокуон 7 ыстатыйатын 1 чааһа ити ыстатыйа 22 чааһыгар итиэннэ 24.07.2008 с. 161 №-дээх федеральнай сокуон 16.6 ыстатыйатын 36 чааһыгар утарсар. Онон кэмитиэккэ депутаттар маны сөп түбэһиннэрии боппуруоһун ылыннылар.

 

Сис кэмитиэт бэрэссэдээтэлэ Александр Романов кэмитиэт мунньаҕар РФ Федеральнай Мунньаҕын Сокуону таһаарааччыларын Сэбиэтигэр Чувашия Республикатын Судаарыстыбаннай сэбиэтин ыҥырыытын туһунан Ил Түмэн уурааҕын барылын өйүүр боппуруоһу туруорда. “Госдумаҕа 2012 сыл ахсынньытыттан “РФ олорор дьиэҕэ кодексын 159 ыстатыйатыгар уларытыылары киллэрии туһунан” федеральнай сокун барыла киирэн сытар. Ити барылга гражданнар олорор дьиэ уонна коммунальнай өҥөлөр иһин  төлөбүргэ ороскуоттарын намтатыыга дьиэ кэргэн уопсай дохуоттарын 22 бырыһыаныттан 10 бырыһыаҥҥа диэри кыччатары туруорсаллара сөптөөх. Онон Чувашия ыҥырыытын өйүөҕүҥ”, -- диэтэ Александр Романов.

 

Депутаттар итинтэн салгыы түөрт федеральнай сокуоннарга уларытыылары киллэрэр туһунан боппуруостарга быһаарыылары ылыннылар.