Бастакы күн Аллараа Бэстээххэ оройуон депутаттарын, нэһилиэк баһылыктарын, тыа хаһаайыстыбатын тэрилтэлэрин салайааччыларын, Майаҕа улуус спортивнай общественноһын уонна Лоомтукаҕа нэһилиэнньэни кытары көрүстэ. Көрсүһүүлэри оройуон Сэбиэтин бэрэссэдээтэлэ Андрей Находкин салайан ыытта. Бу көрсүһүүлэргэ Юрий Баишев Ил Түмэн V ыҥырыытыгар талыллыбыт депутаттар саҥа састааптарын, Государственнай Мунньах структуратын билиһиннэрдэ.

 

- Депутатынан талыллан баран быыбардааччыларбын кытары төрөөбүт-үөскээбит улууслар бастакы көpcүһүүм буолар. Улуус үлэтин-хамнаһын миэстэтигэр билсээри, дьонун-сэргэтин, тылын-өһүн истээри, рабочай сырыыбар кэллим. Бу иннинэ үлэбинэн Нам уонна Эдьигээн улуустарыгар сырыттым.

 

Депутат сүрүн үлэтэ -- быыбардааччы интэриэһин туруулаһыы, Онон быыбардааччылары уонна улуус инники сайдыытыгар муниципальнай оройуон дьаһалтатын кытары ыкса сибээһи тутуһан бииргэ үлэлээһини үлэм сүрүн хайысхатынан буолар, - диэн бэлиэтээтэ народнай депутат.

 

Көрсүһүүлэргэ нэһилиэк баһылыктара, тыа хаһаайыстыбатын тэрилтэлэрин салайааччылара, оройуон Сэбиэтин депутаттара бэйэлэрин кыһалҕаларын билиһиннэрдилэр, туруорустулар, кэккэ этиилэри оҥордулар. Тыа хаһаайыстыбатынан дьарыктанар сүрүн дьарыктаах улуус буоларбытынан cүөhү көрөн олорор дьон, чуолаан, пенсияҕа тахсыан иннинээҕи саастаахтар ханна да учуокка турбаттарынан үлэлэрин ыстаастара ааһыллыбатын, ол түмүгэр пенсия муҥутуур кыра кээмэйигэр тахсалларынан кинилэри көмүскүүр анал нормативнай докумуон ылыллара хайаан да наадатын оройуон депутата, пенсионнай управление начальнига Альбина Григорьева туруоруста. Бу кыһалҕа биһиги эрэ улууспутун дьонун-сэргэтин долгутар буолбатах.

 

Онон республикабыт тыа сирин олохтоохторун барыларын интэриэстэрин көмүскүүр дьаһал ылынылларын үгүс киһи кэтэһэр. Ороссолуода нэһилиэгин баһылыга Илья Макаров бөһүөлэк көһөрүллүүтүнэн социальнай-культурнай объектары тутууга, Догдоҥо баһылыга Иван Новгородов культура үлэһиттэрин хамнаһын үрдэтии үбүлээһинин сорох өттө нэһилиэк бюджетыттан көрүллэрин утарарын, Бэдьимэ баһылыга Федор Баишев оскуола тутуутун, нэһилиэнньэ социальнай көмүскэллээх буолууга управлениетын начальнига Иван Шестаков тыыл ветераннарын сэрии ветераннарыгар тэҥнииргэ, улууспутугар социальнай хайысхалаах биир кэлим киин тутуутун болдьоҕун инники сыҕарытарга, социальнай эппиэкэ отделын салайааччыта Алексей Григорьев Балыктаах оҕо дьиэтин хаалларалларыгар, улуустааҕы ветеринарнай управление начальнига Акулина Дьячковская ветстанция дьиэтин тутууну туруорустулар.

 

Тыа хаһаайыстыбатын тэрилтэлэрин салайааччыларын кытары көрсүһүүгэ улууска республикаттан тиэрдиллэр параметрдарга уларытыыны киллэрии туһунан кэпсэтии барда. Ол курдук, тыа хаһаайыстыбатын управлениетын кылаабынай зоотехнига Ярослав Борисов Тыа хаһаайыстыбатын министерствота кэлин 2-3 сылга оҥорон таһаарыы кээмэйинэн буолбакка, былаан туолуутунан үлэ түмүгүн таһаарара дьиҥ үлэ түмүгүн көрдөрбөтүн тоһоҕолоон бэлиэтээтэ уонна депутаттан ону туоратарга күүс-көмө буоларыгар көрдөстө. Кини этиитигэр "Манчаары" ТХПК салайааччыта Михаил Попов кыттыста.

 

Төҥүлүттэн "Хоту” ТХПК салайааччыта Иван Максимов үүт туттарааччылар интэриэстэрин көмүскүүр инниттэн соҕотуопкя былаанын аччатан, харчытын кээмэйин улаатыннарар наадалааҕын ыйда. Табаҕаттан К.К.Байкалов аатынан МУП салайааччыта Поликарп Васильев сылгыны иитээччилэргэ туох да өйөбүл суоҕун, көмө харчы көрүллүбэтин ыйан туран, сылгыга субсидия көрүллэрин туруоруста. Отгон улуус спортивнай общественноһын, оҕо-ыччат спортивнай оскуолаларын тренердэрин кытары көрсүһүүгэ үлэһиттэр хамнастара кыратын, спортивнай инвентарынан хааччыллыы мөлтөҕүн о.д.а бэйэлэрин кыһалҕаларын туруорустулар.

 

 

 

Майаҕа депутат приемугар 22 киһи сылдьан, бэйэтин кыһалҕатын туруоруста. Уопсайынан, депутаты кытары көрсүһүүгэ 160-ча киһи сырытта. Туруорсуу да, этии да элбэх киирдэ. Иккис күн депутат спорт, доруобуйа хайысхалаах Хара орто оскуолатын 50 сыллаах үбүлүөйүгэр кытынна.