Кулууп мунньаҕар билигин парламеҥҥа үлэлии сылдьар депутат-дьахталлар Ольга Макенко, Елена Голомарёва, Марфа Филиппова, Алёна Атласова, Жанна Егорова, Ирина Енторова республика улуустарын уонна нэһилиэктэрин муниципальнай тэриллиилэрин дьаһалталарыгар, бэрэстэбиитэллээх уорганнарыгар баһылыгынан уонна норуот депутаттарынан үлэлиир дьахталлары кытта көрүстүлэр. Улуустан кэлбит ыалдьыттар сэтинньи 28-29 күннэригэр ыытыллар республика муниципальнай тэриллиилэрин IV съеһигэр кытта сылдьаллар.

 

Елена Голомарева парламентарий-дьахталлар ааспыт биэс сылга хайдах үлэлээн кэлбиттэрин билиһиннэрдэ. Кулууп уопсайа 27 чилиэннээх. Ил Түмэҥҥэ парламентарий дьахталлар общественнай-политическай кулууптарын 2008 сыллаахха СР Дьахталларын союһун көҕүлээһининэн парламент IV ыҥырыытын депутаттара тэрийбиттэрэ. Кулуубу  парламент IV ыҥырыытын депутата Оксана Винокурова салайан үлэлэппитэ. Ол курдук ааспыт ыҥырыыга 12 дьахтар депутаттан тоҕуһа “Биир ньыгыл Россия”, иккитэ – “Сиэрдээх Россия”, биирэ -- РФКП фракцияларын чилиэннэрэ этэ. Төһө да араас фракцияларга үлэлээбиттэрин иһин депутат дьахталлар политическай көрүүлэрэ кинилэр кулууп иһинэн бииргэ үлэлээһиннэригэр мэһэйдээбэтэҕэ. Төрдүс ыҥырыыга 19 депутат бастайааннай төрүккэ үлэлээбит буоллаҕына, ити иһиттэн биэс депутат дьахтар государственнай сулууспа дуоһунаһыгар тахсыылаахтык үлэлээбитэ. Ол курдук депутат Елена Алексеева спикер бастакы солбуйааччыта, Оксана Винокурова парламент бастайааннай секретара, Елена Голомарева, Ольга Макиенко, Альбина Поисеева сис кэмитиэттэр председателлэрэ этилэр.

 

Ил Түмэн ити иннинээҕи ыҥырыыларыгар хас депутат дьахталлар баалларын ырытан көрөр буоллахха, 1993-1997 сылларга парламент бастакы ыҥырыытыгар 7 депутат дьахтар, иккис ыҥырыыга (1997-2002 с.с.) – 11, үһүс ыҥырыыга (2002-2008 с.с.) – 6 депутат дьахталлар дьоҥҥо-сэргэҕэ биллэр-көстөр гына үлэлээбиттэрэ-хамсаабыттара.

 

Елена Голомарева IV ыҥырыыга барыта 669 сокуон ылыллыбыттан 188 (28 бырыһыана) төрүт сокуоҥҥа дьахтар депутаттар автор уонна соавтор буолбуттарын бэлиэтээтэ. Кинилэр дьахталлар общественнай тэрилтэлэрин кытта бииргэ, оччолорго Госдума депутата Юлия Песковская өйөөһүнүнэн сокуону ылыныы федеральнай таһымыгар пиибэни арыгылаах бородууксуйа ахсааныгар холбооһуҥҥа уонна энергетическай утахтары ыччакка буортулаахтарынан билинэргэ кулууп күүстээх үлэни ыыппыта. Кулууп чилиэннэрэ СР Дьахталларын союһун кытта бииргэ дьиэ кэргэҥҥэ, оҕо быраабыгар, иитиигэ, социальнай проблемаларга аналлаах уонна ити эйгэҕэ сыһыаннаах сокуоннары ылыныы боппуруостарыгар барыта 37 тэрээһиннэри, ол иһигэр түөрт конференцияны ыыппыттар.  

 

 

Кулууп Дьахталлар Бүтүн Россиятааҕы бастакы съезтэрин 100 сылыгар аналлаах “парламентскай истиилэригэр”, саастарын ситэ илик оҕолору күүһүлээһинтэн уонна хабырдык тутууттан-хабыыттан харыстааһын тематыгар киэҥ ыҥырыылаах “публичнай истиилэригэр”, “Дьиэ кэргэн, ийэ, аҕа буолуу уонна оҕо саас туһунан”, “Культура туһунан”, “Төрөппүттэр оҕону иитиигэ эппиэтинэстэрин туһунан” уо.д.а. республика сокуоннарын барылларын дьүүллэһэр,  араас проблемалары быһаарыыга анаммыт “төгүрүк остуолларыгар”  туһааннаах специалистары таһынан, нэһилиэнньэ араас араҥатын бэрэстэбиитэллэрэ кыттыбыттар.

 

Елена Голомарева кэлиҥҥи икки сылга парламент Олохтоох салайыныыга сис кэмитиэтин председателэ Дмитрий Горохов өйөбүлүнэн олохтоох салайыныы бэрэстэбиитэллээх уорганнарын депутат дьахталларын ортолоругар “Лидер дьахталлар” диэн куонкурустар ыытыллыбыттарын туһунан иһитиннэрдэ. Депутат кулуупка көрсүһүүгэ кэлбит улуустарга үлэлии сылдьар дьахтар салайааччыларга, депутаттарга бу куонкуруска көхтөөхтүк кытталларыгар ыҥырда.

 

 

Республика Дьахталларын союһун председателэ Валентина Кириллина актыыбынай позициялаах баһылык уонна депутат дьахталларга республика Дьахталларын тэрилтэлэрин Союһун аатыттан эҕэрдэлээн туран, кинилэргэ сүбэ-соргу этэн, инники үлэлэригэр ситиһиилэри баҕарда.

 

Республика араас улуустарыттан кэлбит баһылык уонна депутат дьахталлар миэстэтигэр ханнык проблемалар итиэннэ үтүө холобурдар баалларыгар тохтоон, кэпсэттилэр, сокуон, быраап өттүгэр Ил Түмэн парламентарий-дьахталларын кытта бииргэ үлэлиир баҕалаахтарын биллэриилэрэ кулууп өйөбүлүн ылла. Кулууп салайааччыта Елена Голомарева ханнык баҕарар боппуруоска үөскүүр ыарахаттары туоратыыга депутат-дьахталлар көмөлөһөргө бэлэмнэрин тиэртэ.