1 августа 2022 года, 04:12 (UTC+9:00) t в Якутске: 18 (03:00)

Ил Түмэн этиилэрэ -- Федерация Сэбиэтин “төгүрүк остуолун” дьүүлүгэр

Эрдэ иһитиннэриллибитин курдук, сэтинньи 12 күнүгэр Өрөспүүбүлүкэ парламенын спикерэ Александр Жирков сэтинньи 12 күнүгэр Дальнай Востогу уонна Байкал регионун кэлимник сайыннарыыга судаарыстыбаннай бэлиитикэни олоххо киллэрии үлэтин сүрүннүүр сокуоннары оҥорууга туһуламмыт республика парламенын этиилэрин бэлэмнээһиҥҥэ Ил Түмэн үлэлиир бөлөҕүн мунньаҕын салайан ыыппыта.
 
Ил Түмэн үлэлиир бөлөҕүн мунньаҕар норуот депутаттара “Дальнай Восток уонна Байкал регионнарын тэтимнээхтик сайыннарыы ураты усулуобуйаларын туһунан” федеральнай сокуон барылыгар Дальнай Восток уонна Байкал регионнарын социальнай-экономическай өттүнэн кэлим сайдыыларыгар усулуобуйаны тэрийии чэрчитинэн республикаҕа инвестицияны тардыыны уонна сири-уоту көдьүүстээхтик туһаныыны көрөр  этиилэри бэлэмнээһин тула кэпсэппиттэрэ. Ити сокуон барыла региоҥҥа хаһаайыстыбаннай, инвестиционнай, производственнай, онтон да атын үлэлэргэ быраап ураты усулуобуйаларын, нолуок, бюджет, сир сыһыаннаһыыларын, сыана сүрүннэниитин олохтуур. Мунньахха сылдьыбыт Федерация Сэбиэтин чилиэнэ Александр Акимов Россия парламенын үрдүкү палататыгар бу сокуон барылын тексигэр үлэ күүскэ бара турарын туһунан эппитэ.
 
Парламент спикерэ Александр Жирков сорудаҕынан сис кэмитиэттэр бэрэссэдээтэллэрэ “Дальнай Восток уонна Байкал регионнарын тэтимнээхтик сайыннарыы ураты усулуобуйаларын туһунан” федеральнай сокуон барылыгар этиилэр пакеттарын бэлэмнээбиттэрэ.
 
Ол чэрчитинэн сэтинньи 14 күнүгэр Ил Түмэн икки сис кэмитиэтэ -- Сир сыһыаннаһыыларыгар, айылҕа баайыгар уонна экологияҕа (бэрэссэдээтэл В.М.Прокопьев), Арктика уонна аҕыйах ахсааннаах төрүт олохтоох хотугу норуоттар проблемаларыгар (бэрэссэдээтэл Е.Х.Голомарева) кэмитиэттэр – “Аҕыйах ахсааннаах төрүт олохтоох хотугу норуоттар үгэс олохторунан олороллорун уонна үгэс хаһаайыстыбаларынан дьарыктаналларын хааччыйар сыалга балыктааһыны тэрийии уонна сүрүннээһин эйгэтигэр сокуоннары тупсарыы” тематыгар “төгүрүк остуолу” тэрийэн ыыппыттара. “Төгүрүк остуолга” балыктааһын проблемаларын туһунан кэпсэтиилэргэ Ил Түмэнтэн РФ Федеральнай Мунньаҕар Федерация Сэбиэтин чилиэнэ Александр Акимов кыттыыны ылбыта.
 
Хотугу Муустаах муора кытылыгар сытар улуустарга олохтоох нэһилиэнньэ балыгы бултаан аҕыйах ахсааннаах хотугу норуоттар үгэс дьарыктарын быһыытынан айахтарын ииттэн, байылыаттык олороллоругар “Балыктааһын уонна уу биологическай баайын чөл хаалларыы туһунан” РФ сокуонун барылыгар биһиги республикабыт Ил Түмэнэ туох этиилэри киллэриэн сөбүн тула киэҥ ырытыһыылаах кэпсэтии тахсыбыта. Онно балыксыттар балыктыыр тэриллэринэн, транспорынан, уматыгынан уо.д.а. хааччыллыылара, балыктааһыҥҥа куонкуруһунан кыттыы баара аҕыйах ахсаннаах хотугу норуоттар түөлэбэлээн олорор сирдигэр олохтоох дьон быраабын күөмчүлүүрэ сокуон өттүнэн көмүскэммэккэ сылдьара ахтыллыбыта.
 
Норуот депутаттара балыктааһын туһунан 166 №-дээх федеральнай сокуон 7 пуунун 1 чааһын 16 ыстатыйатыгар киллэрэр, ити сокуон 33.3 ыстатыйатыгар хотугу норуоттар олорор сирдэригэр бастайааннай олорор, кинилэр курдук хотугу үгэс олохтоох, үгэс дьарыктаах дьоҥҥо балыктыыр учаастагы биэрэри көҥүллүүр дуогабарынан бултуулларын көрөргө этиини киллэрбиттэрэ.
 
Сэтинньи 22 күнүгэр Федерация Сэбиэтигэр “Балыктааһын уонна уу биологическай баайын чөл хаалларыы туһунан сокуону тупсарыыга балыктааһын үгэс салааларыгар сыһыаннаһыылары сүрүннээһин боппуруостара” теманан “Балыктааһын уонна уу биологическай баайын чөл хаалларыы туһунан” РФ сокуонугар уларытыылары киллэрэр сокуон барыла дьүүллэһилиннэ.
 
Ил Түмэн ити хайысхаҕа ылыммыт сокуону көҕүлүүр этиилэригэр олоҕуран, Александр Акимов республика парламена бэлэмнээбит этиилэрин Федерация Сэбиэтин “төгүрүк остуола” болҕомтоҕо ыларыгар анаан тыл эттэ. Сенатор Саха сирин депутаттара федеральнай сокуонугар, чуолаан, аҕыйах ахсааннаах хотугу норуоттар түөлбэлээн олорор сирдэригэр балыктааһыҥҥа куонкуруһу ыытары тохтотууга сыһыаннаах учуоттамматах этиилэрдээхтэрин бэлиэтээтэ.
 
“Балыктааһын уонна уу биологическай баайын чөл хаалларыы туһунан” федеральнай сокуоҥҥа балыктааһын хотугу аҕыйах ахсааннаах норуоттар олохторун үгэс көрүҥэ буолара ыйыллыбатах, промышленнай, спортивнай балыктааһын эрэ өйдөбүллэрэ бааллар. Итини таһынан Ил Түмэн депутаттара аҕыйах ахсааннаах хотугу норуоттар олорор сирдэригэр бастайааннай олохтоох атын омуктар (сахалар, республикаҕа үйэ тухары олорор нуучча “старожиллара”, уо.д.а.) балыктааһыҥҥа тэҥ бырааптаах буолуохтаахтарын туһунан этиини сокуоҥҥа учуоттууру туруорсаллар. Сенатор Федерация Сэбиэтин “төгүрүк остуолугар” Ил Түмэн депутаттара бэлэмнээбит этиилэрин федеральнай сокуон барылыгар киллэрэри өйүүргэ ыҥырда.
 
Ити курдук РФ Федеральнай Мунньаҕын Федерациятын Сэбиэтигэр Ил Түмэн этиилэрэ тиэрдилиннэ. Онон федеральнай сокуон республика аҕыйах ахсааннаах хотугу норуоттарын интэриэстэрин учуоттуо диэн эрэнэ күүтэбит.
 
Ил Түмэн пресс-сулууспата
 
 
Опубликовано: 29 ноября, 2013 - 21:44
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице