Сүбэ мунньах кыттыылаахтара Максим Аммосов аатынан Государственность музейын үлэтин отчуотун итиэннэ Нам улууһа музейы кытта бииргэ үлэлээһинин тустарынан боппуруостары көрдүлэр.

 

Сүбэ үлэтигэр Ил Түмэн депутаттарыттан Государственнай тутууга уонна сокуоннаска сис кэмитиэт бэрэссэдээтэлэ, Сүбэ солбуйааччы бэрэссэдээтэлэ Алексей Еремеев, “Алмаасэргиэн баан” бырабылыанньатын салайааччыта Александр Миронов, “Саханефтегазсбыт” ААО генеральнай директора Игорь Никитин, парламент аппараатын салайааччы Юрий Кравцов, культура министрин солбуйааччы Михаил Донской, Ем.Ярославскай аатынан республикатааҕы музей директора Егор Шишигин, Хатырыктааҕы Государственность музейын директора Александр Кириллин, “М.К.Аммосов мемориальнай музей-дьиэтин” сэбиэдиссэйэ Любовь Алексеева, улуус баһылыга Александр Атласов, Хатырык нэһилиэгин баһылыга Алексей Пинигин, республика кыраайы үөрэтээччилэрин Намнааҕы филиалын салайааччыта Иннокентий Кривошапкин уо.д.а. кытыннылар.

 

Бастакынан, туох үлэлэр барбыттарын, ханнык кыһалҕалар баалларын тустарынан Егор Шишигин, Александр Кириллин уонна улуус баһылыга Александр Атласов иһитиннэрдилэр. Ол курдук сыл ахсын бу музейга муус устар 27 күнүгэр Саха Республикатын, балаҕан ыйын 27 күнүгэр республика Государственноһын күннэрэ, “Аммосов ааҕыылара” ыытыллыылара, нэһилиэнньэ, оскуола үөрэнээччилэрэ, республика тас өттүттэн ыалдьыттар музейы көрө кэлиилэрэ үтүө үгэскэ кубулуйбута, сорох сыл 5-7 тыһыынчаҕа тиийэ көрөөччү сылдьара, музей элбэх итэҕэстэрдээх-быһаҕастардаах, көтүмэхтик тутуллубут буолан, кэккэ техническэй кыһалҕалар баалларынан өрөмүөн үлэтигэр наадыйара бэлиэтэннэ.

 

Музей директора Александр Кириллин музей анал үөрэхтээх специалистарга наадыйарын ыйда. Маны сэргэ саҥа остолобуойу, гостиницаны туппуттар. Хатырыкка туристарга анаан Максим Аммосов уһаайба-дьиэтин тутар, музей дьиэтин уонна турар сирин кэҥэтэр, гараж оҥостор былааннаахтар.

 

 

 

Алексей Еремеев государственность музейдара, Нам Хатырыгар Максим Аммосов, Үөһээ Бүлүү Харбалааҕар Исидор Барахов уонна Таатта Чөркөөҕөр Платон Ойуунускай ааттарынан музейдар, Саха сиригэр государственность сайдыытын өттүгэр баар матырыйааллара үксүгэр бэйэ бэйэлэригэр майгыннаһалларын ыйан туран, Хатырык музейын концепциятыгар М.К.Аммосов төрүөҕүттэн саҕалаан, бары үлэтин, олоҕун кэпсиир өттө ордук чорботуллуохтааҕар тохтоото.  “Государственность уонна Республика күннэригэр республика салалта бу музейга кэлэр үгэһин бастакы Президент М.Е.Николаев олохтообута. Үгэс буолбут тэрээһиҥҥэ саҥа сүүрээни киллэрэн, билиҥҥи салайааччылар ортолоругар куонкурсу ыытары толкуйдуохха баар этэ”, -- диэн депутат тус санаатын эттэ.

 

Александр Жирков республика государственноһа саҥа бөҕөргөөн эрэрин бэлиэтээн туран, музей олохсуйбут үгэстэрин  салгыы тутуһар сөптөөҕүн, Хатырыкка бастакынан тэриллибит М.К.Аммосов аатынан музей государственнай музейдар тиһиктэригэр  бас-көс миэстэни ылыахтааҕын  бэлиэтээтэ.

 

 

Попечителлэр сүбэлэрэ музей үлэтин ис хоһоонун, инники сайдар концепциятын оҥоруу уонна үлэлиир усулуобуйатын көрүү тула ырытыһыылаах, иҥэн-тоҥон дьүүллэһиилээх кэпсэтии түмүгэр кэккэ быһаарыылары ылынна. Ол курдук Сүбэ аныгыскы мунньаҕар диэри музей салалтата 2013 сыллааҕы үлэтин отчуотун, ол иһигэр үбү туһаныыга уонна экономическай өттүнэн үлэтин киллэрэн туран, үчүгэйдик бэлэмнииригэр, иккиһинэн, музей инники сайдар стратегиятын ыйар концепцияны ырытан оҥорорго,  материальнай-техническэй базатын тупсарыыга этиилэри бэлэмнииргэ, музей үлэтин инники былаанын олохтоохтук, саҥалыы толкуйдаан оҥорорго этилиннэ.