Көрсүһүүгэ кулууп салайааччыта, Аҕыйах ахсааннаах хотугу норуоттар уонна Арктика проблемаларыгар сис кэмитиэт председателэ Елена Голомарева, Мандаакка уонна регламеҥҥа хамыыһыйа председателэ Марфа Филиппова, парламент урукку ыҥырыыларын депутаттара Альбина Поисеева, Анна Соловьева, республика Дьахталларын тэрилтэлэрин Союһун председателэ Валентина Кириллина итиэннэ улуус мунньаҕын, нэһилиэктэр мунньахтарын депутат уонна актыбыыс дьахталлара кытыннылар. Политик уонна общественник дьахталлар көрсүһүүлэрин улуус баһылыгыг социальнай боппуруостарга солбуйааччыта Ирина Соколович иилээн-саҕалаан ыытта.

 

Көрсүһүү кэмигэр Хаҥалас улууһун Нөмүгү нэһилиэгиттэн төрүттээх  республика биллэр-көстөр государственнай, общественнэй-политическай деятелэ Софья Петровна Сидорова 100 сааһын көрсө Хаҥалас улууһугар туох бэлэмнэнии үлэ бара турарын итиэннэ Дьахталлар аан дойдутааҕы күннэрэ кэлэн иһэринэн дьахталлар общественнай-политическай үлэҕэ оруолларын үрдэтии тула кэпсэтиилэр бардылар. Парламентарий-дьахталлар Нөмүгү нэһилиэгэр тутуллуохтаах Софья Сидороваҕа аналлаах сквер уонна пааматынньык бырайыактарын билистилэр, биир дойдулаахтарын үрдүк аатын үйэтитиигэ улуус дьаһалтатын, баһылыгын өттүттэн туох үлэлэр ыытылла туралларын туһунан иһиттилэр. Хаҥаластар Софья Сидорова туһунан документальнай киинэ уһуланнар, кэлэр көлүөнэлэргэ дьоһун өйдөбүнньүгү хаалларар баҕалаахтар.

 

Депутаттар хас биирдиилэрэ республика нэһилиэнньэтин олоҕор-дьаһаҕар суолталаах туох үлэни ыыталларын, саҥа талыллыбыт парламент үлэтин-хамнаһын тустарынан кэпсээтилэр, көрсүһүүгэ кэлбит улуус уонна нэһилиэктэр депутаттара көтөҕөр боппуруостарын бэлиэҕэ ыллылар. Ол курдук улуус уонна нэһилиэктэр олохтоох салайыныыларын бэрэстэбиитэллээх уорганнарыгар депутатынан талыллан үлэлии сылдьар дьахталлар Саргылаана Давыдовна Острельдина диэн биллэр-көстөр общественнай-политическай деятель дьахтар Хаҥалас улууһугар  үлэлээн ааспытын туһунан кэпсээн туран, кини аатын үйэтитэр сыалтан анал бэлиэни олохтуур туһунан этии киллэрдилэр.

 

Көрсүһүү кэмигэр улуус бэрэстэбиитэллэрэ Хаҥаласка доруобуйа харыстабылын сайыннарыы хайысхатыгар ордук оҕо тииһин эмтээһин өҥөтүн тэнитиини туруорустулар. Доруобуйа харыстабылын уонна үөрэхтээһин улуустааҕы идэлээх союзтарын актыбыыс дьахталлара аутсорсинг тыа сиригэр киирэр кыаҕа суоҕун билиэтээн тураннар,  маны парламеҥҥа сокуон быһыытынан көрүүгэ депутаттар нэһилиэнньэ интэриэһинэн салайтаралларыгар ыҥырдылар.  Онон ити курдук республика уонна улуус таһымыгар үлэлии сылдьар депутат дьахталлар икки өттүттэн интэриэстээх кэпсэтиилэри ыытаннар, инникитин бииргэ үлэлиир хайысхаларын тобуллулар.