Кулун тутар 9 күнүгэр  Аан дойду аатырбыт бөҕөстөрүн, 70-с сыллар саҥаларыгар тустуу көбүөрүгэр биһиги Роман Дмитриевпыт сүрүн утарсааччыларын Ибрагим (Эбрахим) Джавадины уонна Огнян Николовы Ил Түмэн спикерэ Александр Жирков бэйэтин үлэлиир кабинетыгар истиҥник көрүстэ. Көрсүһүүгэ Таджикистан Республикатын көҥүл тустууга Федерациятын вице-президенэ Рустам Мурадов, республика парламенын депутаттара Олимпийскай чемпион, «Триумф» спортивнай бэлэмнээһин киинин директора Павел Пинигин, дьиэ кэргэн, оҕо, ыччат дьыалаларыгар, физическэй культураҕа, спортка Ил Түмэн сис кэмитиэтин председателэ Юрий Баишев, Р.М. Дмитриев аатынан Республикатааҕы олимпийскай резервэ орто анал училищетын директора Алексей Филиппов, республика спорка министрин бастакы солбуйааччыта, Олимпийскай оонньуулар боруонса призёрдара Георгий Балакшин кытыннылар.

 

Ил Түмэн спикерэ ыалдьыттарга Саха сиригэр спорт, тустуу сайдыытын туһунан, Саха сиригэр Роман Дмитриев аатын үйэтитии туһунан билиһиннэрдэ.

 

«Аан дойдуга былыргыттан күн бүгүнүгэр диэри Олимпиадаҕа кыайбыт спортсменнара суох бүтүн государстволар бааллар, элбэхтэр. Сахалар Олимпиадаҕа кыайыыны ситиспит омуктар. Ити сүҥкэн ситиһиини биһиэхэ Роман Михайлович Дмитриев аҕалбыта. Биһиги бастакы олимпиецтарбыт Роман Дмитриев, Павел Пинигин, Александр Иванов ааттарын үрдүктүк тутабыт. Сахалар спортка Аан дойду чыпчаалыгар кыайыылаахтык тахсар суолларын тэлбит көрүҥүнэн тустуу буолар. «Билигин оҕунан уонна буулдьанан (стендовай) ытыыга, боксаҕа, сүүрүүгэ, харбааһыҥҥа сыыйа атын да көрүҥнэргэ ситиһиилэнэргэ дьулуһабыт. Чуолаан оҕунан уонна стендовай ытыы кыраҕы булчут, тулуурдаах, кыраҕа ымыттыбат айылгылаах дьоҥҥо биһиэхэ хааммытыгар ордук чугас. Ону таһынан бэйэбит национальнай көрүҥнэрбитин Аан дойду таһымыгар таһаарарга үлэлэһэбит», - диэтэ Александр Жирков.

 

Ыалдьыттар бэйэлэрин олохторун, үлэлэрин туһунан кэпсээтилэр. Ибрагим Джавади Ираҥҥа тустуу Федерациятыгар сүбэһитинэн үлэлиир, тустууктары эрчийиигэ кыттар эбит. Кини билигин 71 саастаах. Түөрт төгүллээх Аан дойду чемпиона сааһыран баран аны ветераннарга үөһээ ыйааһыҥҥа тахсан эмиэ Аан дойду түөрт төгүллээх чемпиона буолбут. Огнян Николов эмиэ Болгарияҕа тустуу Федерациятыгар үлэлиирин, ону таһынан кыра чааһынай бизнестээҕин, гостиницалааҕын туһунан кэпсээтэ. «Уолум тустан иһэн тохтообута, билигин сиэммиттэн күүтэбин», - диир аатырбыт болгар бөҕөһө. Ибрагим Джавади икки уоллааҕа эмиэ тустуунан улаханнык дьарыгырбатахтар эбит.

 

Ибрагим Джавади саха тустуутун оскуолатын үрдүктүк сыаналыырын эттэ. «Сатанар буоллаҕына эдэр тустууктары хардарыта атастаһыннаран тустууга эрчийдэххэ, матчевай көрсүһүүлэри ыытыахха баар эбит», - диэн баҕатын биллэрдэ.

 

Иран уонна Болгария аатырбыт бөҕөстөрө Саха сиригэр Роман Дмитриев аата умнуллубатын, кинилэри Саха сирин олохтоохторо олус үчүгэйдик көрсүбүттэрин махтанан бэлиэтээтилэр.

 

Көрсүһүү кэмигэр Александр Жирков аатырбыт тустууктарга саха быһаҕын уонна өбүгэлэрбит оонньууларын – саха хабылыгын комплегын бэлэхтээтэ. «Саха быһаҕын тупсаҕайын, табыгаһын Аан дойдуга билинэн эрэллэр. Бу дьиэлээх тойон, булчут, эр киһи ыһыктыбакка туттар тэрилэ, арахсыбат аргыһа. Онтон хабылык – былыр үйэттэн саха оонньуута. Хапсаҕай, сытыы харахтаах, тобуллаҕас, түргэн туттуулаах буолууну оҕо эрдэхтэн эрчийэр. Эһиги сиэннэргитин эмиэ саха үгэһигэр үөрэтиҥ», - диэн Ил Түмэн спикерэ алгыс тылын эттэ.

 

Олимпийскай чемпион Роман Дмитриев аатыгар ыытыллар Норуоттар икки ардыларынааҕы турнирга 12 дойдуттан 127 бөҕөс кэлэн күөн көрүстэ. Бу турнир бастыҥ ыалдьыттарынан аан дойдуга аатырбыт бөҕөстөр Р.М. Дмитриев доҕотторо Ибрагим Джавади уонна Огнян Николов буоллулар. «Триумф» комплексыгар мустубут сүүһүнэн дьон биһиги улуу бөҕөспүтүн кытта тустан Роман Дмитриевы кытта бииргэ саха норуотун номоҕор киирбит аар-саарга аатырбыт бөҕөстөрү дохсуннук эҕэрдэлээтилэр.