Ытыктабыллаах Сахам сирин олохтоохторо!
 
Саха Өрөспүүбүлүкэтин Ил Түмэнин аатыттан эһигини Өрөспүүбүлүкэ күнүнэн уонна Россия парламентаризмын күнүнэн эҕэрдэлиибин!
 
Биһиги норуоппут инники дьылҕатыгар 1922 сыл муус устар 27 күнүгэр ылыныллыбыт РСФСР састаабыгар Саха Автономнай Советскай Социалистическай Өрөспүүбүлүкэтин тэрийэр туһунан Декрет төрүт суолталаах. Бу Декрет ылыныллыыта өрөспүүбүлүкэ историятыгар, бэйэтин судаарыстыба быһыытынан билиниитин, ону сайыннарыытын, элбэх омук дьонноох норуота дьылҕатын бэйэтэ быһаарыныытын, олоҕун-дьаһаҕын төрүттэрин – экономикатын, социальнай эйгэтин, култууратын – сайыннарар суолун талыытын кытары сибээстээх  тосту уларыйыылары киллэрбитэ.
 
Судаарыстыбаннаспыт олохтонуутугар, омукпут бэйэтин инники сайдыыны, кэскили түстүүр биир сомоҕо күүс быһыытынан билиниитигэр Сахабыт сирин патриоттара Былатыан Ойуунускай, Максим Аммосов, Исидор Барахов, Степан Аржаков уонна кинилэрдиин бииргэ саҥа олоҕу уһансыбыт бастыҥ дьоммут сүҥкэн кылааты киллэрбиттэрэ. Кинилэри кытары сэргэ биһиги бүгүн Илья Винокуров уонна Семен Борисов, Гавриил Чиряев уонна Юрий Прокопьев, Мария Нартахова уонна Александра Овчинникова, Евдокия Горохова уонна Афанасий Илларионов курдук уонна да атын, биһиги норуоттарбыт инники сайдыыларыгар, өрөспүүбүлүкэ государственноһа бөҕөргүүрүгэр тирэх буолбут, дьоннорбутун ааттыыбыт.
 
1992 сыл муус устар 27 күнүгэр Саха Өрөспүүбүлүкэтин саҥа Төрүт Сокуона (Конституцията) ылыныллыбыта. Саҥа Конституция судаарыстыбаннас, быраап өттүнэн саҥа төрүттэри олохтообута, Саха сиригэр политическай, социальнай-экономическай уларыта тутуу бөҕө тирэҕинэн буолбута.
 
2012 сыл муус устар 27 күнүгэр өссө биир бэлиэ түгэн – Россия парламентаризмын күнэ бэлиэтэнэр. Парламентаризм институтун сайдыыта дойду олоҕор, дьылҕатыгар суолтатын дьон-сэргэ улам ылынар, өйдүүр буолан иһэр. Российскай Федерацияҕа парламентаризм үгэстэрэ олохсуйуутугар, сайдыытыгар Саха Өрөспүүбүлүкэтин Ил Түмэнэ бэйэтин кылаатын киллэрсэр.
 
Ааспыт кэмнэргэ Саха сирин үгүс көлүөнэ дьонун дьүккүөрдээх үлэтин  түмүгэр өрөспүүбүлүкэ социальнай-экономическай олоҕор биллэр-көстөр ситиһиилэр баар буолбуттара. Бүгүҥҥү көлүөнэ биһиги иннинээҕи дьон хаалларбыт историческай, культурнай нэһилиэстибэлэрин, албан ааттаах ситиһиилэрин үксэтэр иэстээхпит.
 
Өрөспүүбүлүкэ күнэ биһигини – төрүт олохтоохтору уонна Саха сирин иккис дойдуларынан билинэр бары дьону – бииргэ түмэр. Биһиги төрөөбүт төрүт сирбит-дойдубут сайдарын туһугар дьулуһуубут, өбүгэлэрбит ытык өйдөбүллэригэр бэриниилээх  буолуубут  өрөспүүбүлүкэбит бигэ туруктаах буолуутун уонна чэлгийэ сайдыытын мэктиэтинэн буоллун!
Ытыктабыллаах Сахам сирин олохтоохторо! Эһиэхэ кытаанах доруобуйаны, дьолу уонна бары үтүөнү, төрөөбүт дойдубут уонна Россия Федерациятын туһугар дьаныардаах үлэҕэ ситиһиилэри баҕарабын.
 
 
Саха Өрөспүүбүлүкэтин Ил Түмэнин
Бэрэссэдээтэлэ
А.Н.Жирков