Республика салайааччылара, Ил Түмэн депутаттара, общественность бэрэстэбиитэллэрэ уонна Максим Аммосов биир дойдулаахтара Республика күнүгэр биллиилээх государственнай деятель төрөөбүт нэһилиэгэр Хатырыкка тахсыылара Саха сирин государственноһа төрүттэниитигэр олук уурбут политическай деятеллэрбитигэр ытыктабылбыт уонна махталбыт бэлиэтэ буолан, бу үтүө үгэс сыл ахсын салҕана турар.

 

Делегация Модут нэһилиэгин кыраныыссатыгар “Саха Автономнай Советскай Социалистическай Республиката – 1922 сыл” диэн историческай бэлиэ сиргэ ытыктабылларын биллэрэн, тохтоон аастылар.  Хатырыкка М.К.Аммосов пааматынньыга плакаттарынан, былаахтарынан бырааһынньыктыы киэргэтиллибит. Музей иннинээҕи былаһааккаҕа официальнай делегацияны Нам улууһун баһылыга Александр Атласов, Хатырык нэһилиэгин баһылыга Алексей Пинигин, М.К.Аммосов аатынан музей үлэһиттэрэ, М.К.Аммосов аатынан Хатырык орто оскуолатын учууталлара, үөрэнээччилэрэ, Хатырык нэһилиэгин олохтоохторо көрүстүлэр. Бырааһынньыктааҕы үөрүүлээх муусука ньиргийэр.

 

Максим Кирович Аммосов пааматынньыгар веноктары, тыыннаах сибэккилэри ууруу сиэригэр-туомугар республика Президенин эбээһинэһин толорооччу Егор Борисов, вице-президент Дмитрий Глушко, Правительство Бэрэссэдээтэлэ Галина Данчикова, республика Ил Түмэнин Бэрэссэдээтэлин бастакы солбуйааччы Анатолий Добрянцев, Президент уонна Правительство дьаһалтатын салайааччыта Юрий Куприянов, Нам улууһун уонна Хатырык нэһилиэгин дьаһалталарын салалтата, Правительство чилиэннэрэ, норуот депутаттара, улуус итиэннэ нэһилиэк общественноһын бэрэстэбиитэллэрэ, оскуола оҕолоро кытыннылар.  

 

Республика кыракый былаахтарын күөрэччи тутан, музей иннинээҕи аллеяны сэлэлии турбут оскуола үөрэнээччилэрэ, улуус студеннара, музей фойетыгар нэһилиэк ветераннара, үлэһит династиялар, тыа хаһаайыстыбатын производствотын бастыҥнара, ыччаттар кэлбит ыалдьыттары үөрэ-көтө эҕэрдэлии көрүстүлэр. Хотугу норуоттар историяларын уонна культураларын Ярославскай аатынан государственнай музейын директора Егор Шишигин ыалдьыттарга Хатырык нэһилиэгин Государственность музейын экспозицияларын көрдөрөр экскурсияны ыытан, автономия төрүттэммит историятын кэпсээтэ. Искусство уонна культура Арктикатааҕы государственнай институтун ректора Саргылаана Игнатьева музей виртуальнай версиятын сүрэхтэниитин ыытта.

 

Егор Борисов общественность үөрүүлээх мунньаҕын кыттыылаахтарын Республика күнүнэн эҕэрдэлээн туран, саха норуотун чулуу уолаттара, оччолорго эдэркээн дьон Былатыан Ойуунускай, Максим Аммосов, Исидор Барахов, Степан Аржаков уонна кинилэр чугас соратниктара Саха сирин автономнай республика быһыытынан РСФСР састаабыгар киллэриини күүскэ туруулаһан ситиспиттэрин, кинилэр государственность төрүттэниитигэр уурбут олуктара күн бүгүн республика бэйэтин сайдыытын, дьылҕатын көҥүллүк быһаарына, салайына олороругар сүрүн төһүү буолалларын бэлиэтээтэ.

 

Президент эбээһинэһин толорооччу Егор Борисов үөрүүлээх түгэнинэн сибээстээн мустубут дьоҥҥо дьолу-соргуну, ситиһиилэри баҕаран туран, Нам улууһун Бартыһаан нэһилиэгин “Дьулуур” айар коллективын салайааччытыгар Дмитрий Кривошапкиҥҥа республика культуратын үтүөлээх үлэһитин, үп министригэр Валерий Жондоровка республика үтүөлээх экономиһын ааттарын иҥэрдэ, Уус-Алдан улууһуттан элбэх оҕолоох аҕаҕа, спорт ветераныгар Прокопий Белолюбскайга “Ытык Аҕа” бэлиэни, онтон да атын наҕараадалары, Бүлүү улууһун Дьөппөн, Горнай улууһун Маҕан, Чурапчы улууһун Кытаанах нэһилиэктэрин гербэлэрин регистрацияламмыт нүөмэрдэрин туһунан сертификаттары туттарда. Егор Борисов тыл этиитигэр музей үлэһиттэрин эҕэрдэлээн туран, Хатырыкка, Чөркөөххө уонна Харбалаахха үлэлии турар Государственность музейдарын өйүүр үлэ салҕаныаҕын, ол барыта үүнэр көлүөнэ туһугар оҥоһулларын бэлиэтээтэ.

 

Анатолий Добрянцев Республика күнүнэн эҕэрдэтигэр: “Максим Кирович Аммосов уонна кини соратниктарын ааттара биһиги республикабыт 1922 сыллаахха ССРС састаабыгар Саха Автономнай Советскай Социалистическай Республика быһыытынан өр кэтэспит статуһун ылыытын кытта арахсыспат суолталаахтар”, -- диэтэ. Республика сүҥкэн социальнай-экономическай уларыйыылар, геополитическай алтыһыылар, баараҕай бырайыактар олоххо киирээри турар кэмнэригэр олорорун ыйан туран, Анатолий Добрянцев итиннэ бэлэмнэнии чэрчитинэн Ил Түмэн Саха сирин бары олохтоохторун интэриэстэрин сокуон, быраап өттүнэн көмүскээһиҥҥэ былаас уорганнарын, политическай партиялары, нэһилиэнньэни кытта биир сүбэнэн үлэлиир суолу тутуһарын бэлиэтээтэ.  

Ити курдук Нам улууһун баһылыга Александр Атласов, Нам улууһун бочуоттаах гражданина, улуус ытык кырдьаҕастарын бэрэссэдээтэлэ Анатолий Васильев, М.К.Аммосов аатынан орто оскуола 11 кылааһын үөрэнээччитэ Юлия Прокопьева үөрүүлээх мунньахха тыл этэн, мустубут дьону Республика күнүнэн ис сүрэхтэриттэн эҕэрдэлээтилэр.

 

 

Бу күн норуот депутаттара Алексей Еремеев, Елена Голомарева, Антонина Григорьева, Александр Корякин, Владимир Прокопьев, Александр Сусоев, Василий Местников, Юрий Николаев, Марфа Филиппова, Александр Уаров Нам улууһун оскуолаларын туйгун үөрэнээччилэрин уонна лидердэрин слетун чэрчитинэн Республика күнүгэр аналлаах Гражданственность уруоктарын ыытыыга кытыннылар, оскуола үөрэнээччилэригэр өйдөбүнньүк кинигэлэри туттардылар.

 

Республика күнүн үөрүүлээх мунньаҕа И.С.Охлопков аатынан Нам гимназиятын “Дьулусхан” ансаамбылын “Сахам сирэ” ырыатынан итиэннэ Хатырык нэһилиэгин “Кэскил” оҕо саадын иитиллээччилэрин хоһоонунан бырааһынньыктааҕы эҕэрдэлэринэн түмүктэннэ.