Гемодиализ амбулаторнай Киинин аһыллыытыгар өрөспүүбүлүкэ Правительствотын Бэрэссэдээтэлэ Галина Данчикова, Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Александр Корякин, доруобуйа харыстабылын министрэ Александр Горохов, киин куорат баһылыга Айсен Николаев, “Б.Браун Авитум Руссланд” ХЭО директора, Москватааҕы медико-стоматологическай университет диплом кэннинээҕи үөрэхтээһин факультетын нефрологияҕа кафедратын доцена Валерий Шило, “Медицинский центр “Диалог” ХЭО тэрийээччитэ Грант Варданян, Гемодиализ амбулаторнай киинин” кылаабынай враһа Антонина Анисимова уо.д.а. кытыннылар.

 

 

 

 

Саҥа Киини аһар кыһыл лиэнтэни Галина Данчикова, Антонина Анисимова уонна дьиэни туппут “СК-Туймаада” ХЭО генеральнай директора Владимир Васильев быһа кырыйдылар. Галина Данчикова тутуу тэрилтэтигэр махтанан туран, Киин коллективыгар, кылаабынай врачка Антонина Анисимоваҕа бүөр ыарахан ыарыытынан ыалдьар дьоҥҥо үрдүк кылаастаах көмөнү оҥороллоругар ситиһиилэри баҕарда. “Бүөрү ыраастыыр Гемодиализ амбулаторнай киинэ бу аан бастаан тутуллан үлэҕэ киирдэ. Биһиги бу хайысхаҕа инникитин да улахан болҕомтобутун ууруохпут”, -- диэн бэлиэтээтэ кини.

 

Александр Корякин үс бүк үөрүүлээх түгэннэринэн – Өрөспүүбүлүкэ күнүнэн, өрөспүүбүлүкэ Төрүт Сокуона ылыллыбыт күнүнэн итиэннэ бу Киин аһыллыытынан – эҕэрдэлээн туран, Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин Махтал сургун “СК-Туймаада” салалтатыгар туттарда. “Гемодиализ амбулаторнай Киинэ дьоммутугар-сэргэбитигэр туһалыы турдун”, -- диэтэ Александр Корякин. 

 

Доруобуйа харыстабылын министрэ Александр Горохов бу дьиэ тир буоларга ананан тутуллан испитин санатан туран, Гемодиализ киинигэр бэриллибитэ сөптөөҕүн, манна ыарыы көрүҥнэринэн тус туһунан салаалар, анал кабинеттар тэриллибиттэрэ олус табыгастааҕын, ыарыһахтар мантан ыла өрөспүүбүлүкэ тас өттүгэр баран эмтэнэргэ күһэллиилэрэ тохтуурун ыйда.

 

Медцентртан чугас Гимеин оройуонугар аһыллыбыт Гемодиализ амбулаторнай Киинин саҥа дьиэтин малааһына кабинеттары, ис тэрээһини, эмтиир, ыраастыыр усулуобуйаны билиһиннэрэр экскурсиянан түмүктэннэ.