Правительство чааһыгар республика депутаттара, Правительство чилиэннэрэ, министерстволар, биэдимистибэлэр уонна киин куорат дьаһалтатын бэрэстэбиитэллэрэ кытыннылар. Дьүүллэһиллэр боппуруоска сүрүн дакылааты республика олоххо-дьаһахха, коммунальнай хаһаайыстыбаҕа уонна энергетикаҕа министрэ Алексей Колодезников оҥордо.

 

Министр ааспыт сыллардааҕы кыстыктарга тэҥнээтэххэ, 2013-2014 сыл кыстыга балачча этэҥҥэ буолбутун бэлиэтээтэ. Тэҥнэбилгэ: 2011-2012 сыл кыстыгар -- 241 технологическай кэһии, ол иһигэр коммунальнай комплекс объектарыгар 72, энергетика объектарыгар 169; 2012-2013 сыл кыстыгар – туһааннааҕынан 247, 69, 178; 2013/2014 сыл кыстыгар – 98, 39, 59.

 

Ити технологическай кэһиилэри ырытыы көрдөрөрүнэн, сүрүннээн энергетика тутууларын тирэхтэрэ алдьаныытыттан, линиялар быстыыларыттан, коммутация тэрилэ аккаастааһыныттан, коммунальнай комплекс тутууларыгар хочуолунай алдьаныытыттан, оттук хам тоҥуутуттан саахал тахсар. Ол курдук дакылаакка ааспыт кыһын Орто Халымаҕа, Сунтаарга, Тиксиигэ саахаллар тахсыбыттара бэлиэтэннэ.

 

Алексей Колодезников итинтэн салгыы кыһыҥҥы суолунан чоҕу, оттугу таһыы-тиэйии түмүктэрин билиһиннэрдэ. ОДьКХ уонна энергетика предприятиелара кыһыҥҥы суол баарына барыта 620857,89 тонна (95,3%) оттук-уматык таһаҕаһа тиэллибит. Индигиир бөлөх улуустарыгар (Абыйга, Аллайыахаҕа, Муомаҕа) оттук-уматык былааны таһынан тиэллибит эрээри, ситэтэ суох. 2013 сыллааҕы навигация кэмигэр Индигиир өрүһүнэн 27983 тонна, ол иһигэр 9389 тонна чох, 12200 тонна нефть, 4768 тонна газоконденсат, 1626 тонна нефть бородууктата ситэ тиэллибэтэх. Таһаҕаһы тиэйиини сүрүннүүр Правительство хамыыһыйата тэриллибитин түмүгэр ити улуустарга таһаҕас сөптөөх кээмэйин былааны таһынан тиэрдиигэ дьаһаллар ылыллыбыттар.

 

ОДьКХ-ҕа халаан уутун содулларын туһунан этэригэр министр быйыл Үөһээ Халыма улууһугар үс хочуолунай уонна ититэр ситимнэр алдьаммыттарын уу ылбат сиригэр көһөрөр үлэ толоруллубутун туһунан иһитиннэрдэ. Орто Халыма куоратыгар бу күннэргэ икки мотопомпа, носуос уонна шлангалар барыахтаахтар. Зырянкаҕа уунан харыыта суох хааччыйар носуоска понтон бэлэмнэммит. Дакылаакка республика киин куоратыгар ыраас уунан хааччыйыыга ууну ыраастыыр тутууну саҥардан оҥоруу үлэтэ быйылгыттан саҕаланыахтаахтааҕын, кэлэр кыстыкка ОДьКХ уонна энергетика предприятиелара бэлэмнэнэр үлэлэрин, хочуолунайдары тутуу, оттугу уунан тиэйии былааннарын тустарынан кэпсээтэ.

 

Министр иһитиннэриитин дьүүллэһиигэ депутаттар Александр Романов, Владимир Прокопьев, Александр Корякин, Елена Голомарева, Марфа Филиппова, Юрий Николаев, Юрий Баишев уо.д.а. кытыннылар.

 

Владимир Прокопьев Ньурбаҕа ууну ыраастыыр станция тутуллуутун итиэннэ Чаппандаҕа биэс сыллааҕыта хочуолунай умайан хаалан, электричествонан сылыттан олороллорун, уот кыамтата кыратын, ити боппуруостарга туох былаан баарын чуолкайдаста. Министр этэринэн, уу станцията Ньурбаҕа уонна Аллараа Бэстээххэ тутуллара Дальнай Восток уонна Байкал регионун сайдыытын федеральнай программатыгар киллэриллибит, РФ Энергетикаҕа министерствотыгар нэһилиэнньэ олорор дьиэтин электричествонан сылытыыны, урукку курдук социальнай бырайыак быһыытынан буолбакка, Накыын алмаастаах сиригэр промышленноһы сайыннарыы программатыгар сыһыаран көмүскээһин түмүгэр сөптөөхтүк быһаарыллар кыахха киирэн эрэр.

Александр Корякин өрүстэргэ уу таһыма сэрэхэчитэрин итиэннэ Амма суола алдьанан сытарынан балаһыанньа уустугун этэн туран, Амма өрүһүнэн оттугу тиэйиини ыйыталаста. Алексей Колодезников таас чоҕу тиэйиигэ балаһыанньа уустук соҕуһун, суудуналар үгүстэрэ Бүлүү өрүскэ сылдьалларын, Амма суолун от ыйын ортотугар диэри оҥорорго Правительство өттүттэн дьаһал ылыллыбытын, онон сорох таһаҕас массыына суолунан тиэллиэхтээҕин туһунан хоруйдаата.  

Елена Голомарева Андрюшкино бөһүөлэгэр олорор дьиэлэр толору хааччыллыылаахтарын быһыытынан олохтоохтор хаачыстыбалаах септиги оҥорууну туруорсалларын, 2015 сылга Таймылыырга саҥа хочуолунай дьиэтэ тутуллуохтааҕын, уопсайынан, хочуолунайдарга ыаллар дьиэлэрин холбуурга кыамтаны улаатыннарар наадатын туһунан кэпсэттэ. Министр ити боппуруостарга хоту сир олохтоохторугар көмө оҥоһуллуоҕун, хочуолунай тутуута былааҥҥа баарын туһунан эттэ.

Марфа Филиппова нэһилиэктэр олохтоохторо дьиэлэрин электричествонан сылытталларыгар ТЭН-ри холбоноллоругар кыра к/втт-ы эрэ көҥүллэнэрин, улаатыннарар тоҕо кыаллыбатын туһунан ыйытыытыгар подстанциялар кыамталара кыра буолан, көҥүллэммэтин туһунан харда бэрилиннэ. Ити курдук улахан кыамталаах хочуолунайдар баар буоллахтарына, тыа сиригэр толору хааччыллыылах олорор дьиэни туттуу элбиэҕин, оттук саҥа көрүҥнэрин туһаныыга көһөр уолдьаспытын тустарынан элбэх кэпсэтии таҕыста.

 

Правительство чааһын тэрийэн ыыппыт сис кэмитиэт бэрэссэдээтэлэ Александр Романов ааспыт кыстык түмүктэрин дьүүллэһиигэ сөптөөх кэпсэтии тахсыбытын бэлиэтээтэ итиэннэ 2014-2015 сыл кыстыгар бэлэмнэниини ыытарыгар туһааннаах министерствоҕа ситиһиилэри баҕарда.