Саха сирин норуоттарын VI спортивнай оонньууларын арыйыы үөрүүлээх чааһын биир күүрээннээх, күүстээх түгэнинэн саха норуотун үс чаҕылхай уолаттарын төрөөбүт дойдуларын туһугар модун, дуулаҕа дьулуурдарын, самныбат саргылаах санааларын дьүһүйэн көрдөрүү түгэнэ үгүс дьону долгутта. Диктор дьиппиэр куолаһа Былатыан Ойуунускай уоттаах-төлөннөөх хоһоонун: “Син биир буолбаат,

ханна да баран хара хааммыт тохторо?!

Син биир буолбаат,

өстөөхтөн өлөр да буоллахпытына,

Төрөөбүт ийэ буор сирбитигэр төннөн өлбөтөхпүн даа диэн,

Хомойорбун билбэппин, хоргутарбын көрбөппүн”, -- ааҕар кэмигэр киһи олорсон көтөр улахан салгын саара Максим Аммосов мөссүөнүн тэлээрдэн таһааран, киэһээҥҥи халлаан кырсынан төрөөбүт-үөскээбит Намын сирин үрдүнэн күөрэйэ көтө турбутугар, оҕото, билигин 77 хаарыгар сылдьар Лена Максимовна туттуммакка, ытамньыйбытын бэйэтэ да билбэккэ хаалла.

 

Саха ньургун уолун оччугуй кыыһа Лена Максимовна бу сырыытыгар Намҥа уонна Хатырыкка аҕатын пааматынньыктарыгар сибэкки дьөрбөтүн ууран, Хатырыкка үлэлии турар М.К.Аммосов аатынан Государственность музейыгар, аҕата төрөөбүт-үөскээбит арыытыгар, Өлүөнэ өрүс Аччыгый арыытыгар, аймахтарын, нэһилиэк дьаһалтатын үлэһиттэрин кытта баран, төрүт дойдутун сайаҕас салгынынан сайа тыынна, өбүгэтин буоруттан ылан илдьэ барардыы оҥоһунна.

От ыйын 11 күнүгэр Дьокуускайга Ил Түмэн Бэрэссэдээтэлэ Александр Жирков уонна Лена Аммосова, кини кэргэнэ Владимир Гольдбергы кытта ХИФУ иннигэр итиэннэ М.К.Аммосов музей-дьиэтин иннигэр турар Максим Кирович Аммосов пааматынньыктарыгар тыыннаах сибэккилэри ууруу сиэрин-туомун толордулар.

Аҕатын үйэлэргэ өлбөөдүйбэт таас мөссүөнүн одуулаһан туран, Лена Максимовна университет иннинээҕи пааматынньык акылаата өрөмүөннэниэн сөп буолбутун, пааматынньыкка Саха сирин каартатын ойуута түһэриллибитин арыый да чопчулаан биэрэр наадатын туһунан тус санаатын биллэрдэ. “Бу каарта оччотооҕу эдэр салайааччылар хамаандалара ыыппыт идеологиялара, политикалара, үөрэхтэрэ республика бүттүүнүгэр тарҕаммытын кэрэһилиир. Каартаны арыый улахан гынар буоллар... Кыра буолан, ким да өйдөөн көрбөтө буолуо”, -- диэтэ. Спикер ити этиигэ каартаҕа Өлүөнэ өрүс сүнньүн эбии ойуулаан биэрдэххэ, Саха сирин каартата буолара чопчу биллэр буолуон сөп диэн сөбүлэстэ.

 

Оттон Музей-дьиэ иннинээҕи пааматынньыкка аҕатын мөссүөнэ Бишкеккэ туруоруллубуттааҕар арыый да сымнаҕас гына оҥоһуллубутун бэлиэтээн аһарда. Александр Жирков Кыргыз Республикатыгар Бишкек куоратын килбэйэр киинигэр баар Дууп пааркатыгар 2012 сыллаахха ахсынньы 7 күнүгэр М.К.Аммосов төрөөбүтэ 115 сылын туолуутугар туруоруллубут пааматынньыкка уйэтитиллибит Максим Аммосов ордук сорунуулаах уонна кытаанах көрүҥнээҕин бэлиэтээтэ.