Норуот депутата республика таһымыгар улуустарын чиэһин көмүскүү кэлбит спортсменнары, кинилэри арыаллаан илдьэ кэлбит физкультура учууталларын, тренердэри, бары биир дойдулаахтарын улахан кыайыыларынан эҕэрдэлээн туран, урукку сылларга улуус маннык улахан түһүлгэлэргэ 2-3 бириистээх миэстэлэргэ сылдьыбытын, улуус салалтата уонна спорт үлэһиттэрэ бииргэ ылсан үлэлээһиннэрин түмүгэр, быйыл ох курдук оҥостон кэлэннэр, олус итэҕэтиилээх кыайыыны ситиспиттэригэр тохтоон, кэпсэттэ.

Тренердэр спорка дьоҕурдаах ыччаты дьарыктаан, улууска, республикаҕа ыытыллар спорт күрэхтэһиилэр кытыннаран иһиилэрин түмүгэ улахан кыайыы ситиһилиннэ диэн үөрэн-көтөн туран, Елена Голомарева улууска спорт араас көрүҥнэригэр Федерациялар тэриллэн үлэлииллэрин, кини спорт хотугу көрүҥнэрин Федерациятын салайааччытын талыллан үлэлии сылдьарын ахтан туран, көрсүһүү аһаҕас остуолун тула улууска спорду сайыннарыыга өссө тугу оҥоруохха сөбүн тула кэпсэтэргэ ыҥырда.

 

Ол курдук Ил Түмэн сис кэмитиэтин бэрэссэдээтэлин Елена Голомареваны кытта көрсүһүү кэмигэр республика норуоттарын VI спортивнай оонньууларыгар улуус хамаандата кыһын устатыгар ыытыллыбыт сүүмэрдиир күрэхтэһиилэргэ үчүгэйдик бэлэмнэммитэ бэлиэтэннэ. Спортсменнар депутаттарын кытта көрсүһүүгэ урукку өттүгэр Саха сирин норуоттарын спортивнай оонньууларыгар кыттыбыт ыччаттар улуус спорка инники күөҥҥэ сылдьар олугун уурууга кылааттарын киллэрбиттэрин, бэйэлэрин кэмигэр тыыппалаах спорстменнар ити күрэхтэһиилэргэ кыттаннар, сүрдээх үчүгэй көрдөрүүлэри ситиһэн, Өлөөн улууһун бүтүн республикаҕа дорҕоонноохтук ааттаппыттарын кэпсээтилэр.

 

Быйылгы оонньууларга гиряны көтөҕүүгэ республика 2009 сыллааҕы чемпионката Марианна Винокурова, Платон Семенов, Николай Андреев чахчы үчүгэй көрдөрүүлэри ситиспиттэр. Кыргыттар аэробикаҕа Сунтаар, Хаҥалас, Бүлүү курдук, улахан улуустар үҥкүүһүттэрин кэннилэригэр хаалларбыттар. Оттон Айсен Васильев бачча куйааска 33 км ыраахха сүүрүүтэ, этэргэ дылы, хорсун быһыыга тэҥнэһэр. Ити курдук бары көрүҥнэргэ бастааннар, өлөөннөр хамаандаларын үөрүүтэ улахан.

Елена Голомарева кинилэр хас биирдиилэрэ улуустарын хамаандатын кыайыытыгар киллэрбит кылааттарын учуоттаан, сыл устатыгар да диэххэ сөп, сыралаах киирсиилэргэ кыайыы аргыстанан, республикатааҕы түмүк күрэхтэһиилэргэ бастаабыттарынан салайар кэмитиэтин уонна бэрэссэдээтэл аатыттан    грамоталары, Махтал суруктары итиэннэ сыаналаах бэлэхтэри үөрүүлээх быһыыга-майгыга туттартаата. Көрсүһүү уопсай хаартыскаҕа түһүүнэн түмүктэннэ.

Ил Түмэн пресс-сулууспата