Быйыл Үөһээ-Бүлүү Хоро нэһилиэгин Георгий Чиряев аатынан орто оскуолата тэриллибитэ 95 сылын бэлиэтиир. Юбилейынан сибээстээн сылы быһа нэһилиэккэ, оскуолаҕа араас дьаһаллар ыытылыннылар. Бу күннэргэ оскуола коллектива Дьокуускайга урукку кэмҥэ үлэлээн ааспыт учууталлар, оскуола выпускниктара, Хороттон төрүттээх, билигин Дьокуускайга олорор биир дойдулаахтара кыттыылаах, уопсайа сүүсчэкэ киһилээх, улахан концерт тэрийэн ыытта. Оскуоланы бүтэрээри сылдьар оҕолор араас үөрэх кыһаларын кытары билистилэр, тыа хаһаайыстыбатын идэлэрин үөрэттилэр. Тэрээһин чэрчитинэн сэтинньи 24 күнүгэр нэһилиэк баһылыга Семен Чиряев, оскуола директора Спиридон Борбуев салайааччылаах оскуола коллектива уонна үрдүкү кылаас оҕолоро Үөһээ-Бүлүүттэн төрүттээх Ил Түмэн V-с ыҥырыылаах мунньаҕын депутаттарын Иван Шамаевы, Марфа Филиппованы уонна наукаҕа, уөрэхтээһиҥҥэ, культураҕа, сонуннары киэҥник тарҕатар средстволарга уонна общественнай тэрилтэлэр дьыалаларыгар сис кэмитиэт салайааччытын Антонина Григорьеваны кытары көрүстүлэр.

 

Кэпсэтии сүнньүнэн Саха сиригэр ылыллаары турар үөрэх туһунан саҥа сокуон барылын, агрооскуолалар кыһалҕаларын тустарынан буолла. Спиридон Борбуев кэпсээбитинэн, Хоро нэһилиэгин Георгий Чиряев аатынан орто оскуолатын дьиэтэ 2009 сыллаахха үлэҕэ киирбит. 220 миэстэлээх саҥа оскуолаҕа билигин 330 оҕо үөрэнэр. Ханна да буоларын курдук, Хоро агро хайысхалаах оскуолата материальнай-техническай базатын бөҕөргүтүнэригэр көрсөр кыһалҕаларын этиннэ, өр кэмҥэ туһуламмыт былаанын билиһиннэрдэ. Норуот депутаттара оскуола иитиллээччилэригэр, оскуола салайааччытыгар, нэһилиэк баһылыгар туһаайан, оскуоланы бүтэрээччи ыччат кэнэҕэһин тыа хаһаайыстыбатын идэлэрин баһылаан, дойдуларыгар төннөн үлэһит буолалларыгар сүбэлээтилэр.

 

Норуот депутата Антонина Григорьева юбилейынан сибээстээн оскуолаҕа трактор бэриллэрин туһунан эттэ.

 

 

Ил Түмэн пресс-сулууспата