Ил Түмэн аҕыйах ахсааннаах хотугу норуоттар боппуруостарыгар уонна Арктика дьыалаларыгар сис кэмитиэтин председателэ Елена Голомарева кулун тутар 13 күнүгэр аҕыйах ахсааннаах хотугу норуоттар ыччаттарын лидердэрин кытта көрүстэ.
 
“Аҕыйах ахсааннаах хотугу норуоттар лидердэрин оскуолатын” чэрчитинэн ыытыллыбыт көрсүһүүгэ республика аҕыйах ахсааннаах хотугу норуоттарыгар көмөлөһөр регионнар икки ардыларынааҕы киин филиалын салайааччыта, “Северяночка” общественнай тэрилтэ председателэ, аҕа ууһун общинатын салайааччыта Татьяна Сивцева,  Ил Түмэн II ыҥырыытын депутата, СР аҕыйах ахсааннаах хотугу норуоттарын ассоциациятын ытык кырдьаҕастарын Сүбэтин председателэ Августа Марфусалова, Ил Түмэн вице-спикерэ Виктор Губарев, наукаҕа, үөрэхтээһиҥҥэ, культураҕа, сонуннары киэҥник тарҕатар средстволарга уонна общественнай тэрилтэлэргэ сис кэмитиэт председателэ Антонина Григорьева, аҕыйах ахсааннаах хотугу норуоттар боппуруостарыгар уонна Арктика дьыалаларыгар сис кэмитиэтин чилиэнэ Александр Слепцов,  республика араас улуустарыттан  аҕыйах ахсааннаах хотугу норуоттар ыччаттарын лидердэрэ кытыннылар.
 
Депутаттар көрсүһүүгэ парламент, сис кэмитиэттэр уонна норуот депутаттара сокуоннары ылыныыга ыытар үлэлэрин ис хоһоонун, аҕыйах ахсааннаах хотугу норуоттар бырааптарын көмүскүүр республика сокуоннарын итиэннэ ити хайысхаҕа ханнык сокуоннар барыллара бэлэмнэнэ сылдьалларын билиһиннэрдилэр, ыччат лидердэрин инники общественнай үлэлэригэр көдьүүстээх сүбэлэри биэрэн, ханнык хайысхаларга ордук болҕомтону ууруохха сөбүн ыйдылар. Елена Голомарева ыччат лидердэригэр салайар сис кэмитиэтин үлэтин,  аҕыйах ахсааннаах төрүт олохтоох хотугу норуоттар бырааптарыгар ханнык сокуоннар ылыллан үлэлии туралларын, сокуоннар үлэлээһиннэригэр баар үчүгэй өрүттэр уонна итэҕэстэр тустарынан кэпсээтэ. “Аҕыйах ахсааннаах төрүт олохтоох хотугу норуоттар тустарын туруулаһыы инникитин эһигиттэн тутулуктаах буолуоҕа. Бу дьыаланы салгыы эһиги илиигитигэр ылыаххыт. Онон бу үлэ көлүөнэттэн көлүөнэҕэ бэриллэн, салҕана, сайда туруоҕа”, -- диэтэ Елена Голомарева.
 
Хотугу улуустартан депутат ыччаттарга Ил Түмэн II ыҥырыытын депутатын, СР аҕыйах ахсааннаах хотугу норуоттарын ассоциациятын ытык кырдьаҕастарын Сүбэтин председателин Августа Марфусалованы билиһиннэрэн туран, сис кэмитиэт председателэ бу курдук хотугу норуоттар интэриэстэрин туруулаһар депутаттар баар буоланнар, бүгүҥҥү күҥҥэ бу эйгэҕэ барыта 21 сокуон ылыллан үлэлиирин бэлиэтээтэ. Ыччаттарга Елена Голомарева бу ыйга Аҕыйах ахсааннаах төрүт олохтоох хотугу норуоттарга Саха Республикатын боломуочунайын Константин Роббек отчуотун истибиттэрин, хотугу норуоттар ыччаттара үөрэххэ киирэллэригэр тус сыаллаах миэстэлэр баалларын, республика аҕыйах ахсааннаах төрүт олохтоох хотугу норуоттарын ассоциациятын, ассоциация улуустардааҕы салааларын, туох туһугар тэриллэн үлэлииллэрин, көс олохтоох дьиэ кэргэн, көс оскуола, хотугу норуоттар түөлбэлээн олорор нэһилиэктэригэр айылҕаны өбүгэ саҕаттан туһанар сирдэри анааһын, бултааһын, балыктааһын уо.д.а. тустарынан сокуоннары билиһиннэрэн, билиҥҥи кэмҥэ хотугу  ыччакка холобур буолар дьон туһунан кэпсээн, көрсүһүү кыттыылаахтарын бу тула кэпсэтиигэ кытыннарда. “Хас биирдии нэһилиэккэ, бөһүөлэккэ биһиги общественнай тэрилтэлэрбит  бэрэстэбиитэллэрэ баар буолуохтаахтар итиэннэ кинилэр хотугу норуоттар түөлбэлээн олорор нэһилиэктэригэр айылҕаны өбүгэ саҕаттан туһанар сирдэри анатыыны туруорсуох тустаахтар. Кыһалҕаларбытын бэйэбит туруорсуохтаахпыт”, -- диэтэ норуот депутата.
 
Салгыы Александр Слепцов ыччат лидерин быһыытынан үлэлээбит общественнай үлэтин уонна табаны иитиигэ производственнай үлэни салайар уопутун үллэһиннэ. “Эһиги лидер быһыытынан билиҥҥитээҕэр өссө көхтөөх буоларгытыгар уонна сөбүлүүр үлэҕитинэн айымньылаахтык үлэлииргитигэр баҕарабын”, -- диэтэ хоту сиртэн талыллан Ил Түмэҥҥэ үлэлии сылдьар эдэр депутат.
Августа Марфусалова СР аҕыйах ахсааннаах хотугу норуоттарын ассоциациятын ытык кырдьаҕастарын Сүбэтин аатыттан эдэрдэргэ эҕэрдэни тиэрдэн туран, хотугу норуоттар бырааптарын эйгэтигэр баар проблемалары быһаарыыга бэйэ көҕүлээһинэ, иилээһинэ-саҕалааһына улахан суолталааҕын бэлиэтээтэ. Августа Марфусалова ыччат лидердэрэ олорор сирдэригэр, республикаҕа, Россияҕа, аан дойдуга баар бүгүҥҥү общественнай-политическай быһыыны-майгыны үчүгэйдик ырытан өйдүү үөрэнэллэригэр туһаайан ити хайысхаҕа баар балаһыанньаны сиһилии ырытан, быһааран кэпсээтэ. Салгыы кини хотугу норуоттар олорор сирдэригэр промышленность айылҕаҕа дьайыытын проблематыгар тохтоон, бу боппуруоска ыччат ураты болҕомтотун ууруохтааҕын туһунан эттэ. Ити курдук Августа Марфусалова  аҕыйах ахсааннаах хотугу норуоттар съезтэрин, хотугу норуоттар бас-көс дьонноро, ыччаттара норуот быраабын араҥаччылыыр сокуоннары оҥорууну көҕүлээһиҥҥэ, бэлэмнээһиҥҥэ саамай күүстэх кыттыыны ылыахтаахтарын чорботон бэлиэтээтэ. “Баар кыһалҕалары сатаан былааска тиэрдэри таһынан, ону туруулаһары сатыыр дьон наадалар”, -- диэтэ кини. 
 
Вице-спикер Виктор Губарев Аллараа Халымаҕа үлэлээбит эдэр кэмнэрин, оччотооҕу ыччат  көхтөөх уонн обществоҕа туһалаах үлэтин уопутун кэпсээн туран, билиҥҥи кэмҥэ Арктиканы баһылааһын, суолу-ииһи, ол иһигэр Хотуму муоранан суолу, инфраструктураны сайыннарыы күүскэ бараары турарын, онуоха  кадрдары бэлэмниир эрэйиллэрин, хотугу эргимтэҕэ олорор 13 улууска учууталлар, врачтар уо.д.а. специалистар олус наадаларын, хотугу сири сайыннарыы кадртан улахан тутулуктааҕын туһунан эттэ. Ити өттүгэр Ил Түмэн сокуоннары тупсарыыга үлэлиирин, ол эрээри сокуон олоххо туолуутугар үксүгэр үп-харчы тиийбэтэ мэһэйдиирин бэлиэтээтэ.
 
Көрсүһүү кыттыылааҕа ХИФУ Пединститутун студентката Алина Герасимова хотугу улуустартан үөрэххэ туттарсааччыларга тус сыаллаах чэпчэтиилэр тустарынан ыйытыытыгар парламент наукаҕа, үөрэхтээһиҥҥэ, культураҕа, сонуннары киэҥник тарҕатар средстволарга уонна общественнай тэрилтэлэргэ сис кэмитиэт председателэ Антонина Григорьева хоруйдаата.Норуот депутатахотугу улуустартан университекка туттарсар ыччаттарга тус сыаллаах миэстэлэр көрүллэллэрин, онуоха абитуруент ЕГЭ-тэ ирдэбилгэ эппиэттиир буолуохтааҕын, аҕыйах ахсааннах хотугу норуот ыччата үөрэххэ киирэригэр университет өттүттэн өйөбүл баарын, стипендия төлөнөрүн, сылга биирдэ айан төлөбүрэ көрүллэрин уо.д.а. курдук социальнай көмө быһааран биэрдэ. Виктор Губарев бу эйгэҕэ профильнай кэмитиэт председателэ Антонина Григорьева хотугу улуустартан үөрэххэ туттарсааччыларга тус сыаллаах миэстэни элбэтиини өрүү туруорсарын бэлиэтээтэ.
 
Антонина Григорьева Арктика улуустарыттан кэлбит ыччаттар республика Ил Түмэнин мунньахтыыр сүрүн саалатыгар мустан, депутаттары кытта көрсө олоруулара кэскиллээҕин, инникитин ыччаттар ортолоруттан норуот депутаттара үүнэн тахсыахтарын сөбүн бэлиэтээн туран, 2014 сыллаахха ылыллыбыт “Үөрэхтээһин туһунан” сокуоҥҥа Ил Түмэн бастаан көс оскуола, онтон кэлин көс оҕо саада диэн статустары эбии киллэрэн биэрбитин туһунан кэпсээтэ. Норуот депутата чуум үлэһиттэрэ кэтэхтэн үөрэнэллэригэр былааннаах миэстэлэри улахан туруорсуунан ситиспиттэрин, оҕо саадын иитээччилэрэ билигин 42-50 тыһыынча солкуобай хамнастаахтарын, көс сокуола учууталын хамнаһа эмиэ балачча үрдээбитин, Арктиканы сайыннарыы күүскэ баран эрэринэн, хотугу кыраныыссаны байыаннай өттүнэн көмүскээһини күүһүрдүүнэн, Хотугу муора трансконтинентальнай суолу үлэлэтии саҕаланыахтааҕынан ыччат лидердэрэ оҕолору идэҕэ туһулуур үлэҕэ күүскэ кытталларыгар ыҥырда.
 
Хотугу ыччат үлэлииригэр-хамсыырыгар, дохуоттаах буолуутугар билигин саҥа кыахтар арыллан эрэллэрин бэлиэтээн, Антонина Григорьева таба, балык бородууксуйатын оҥорон таһаарыыга саҥа технологиялары (кэнсиэрбэлээһини уо.д.а.) туһанан иһэргэ инники күөҥҥэ буолуохтаахтарыгар тохтоон кэпсэттэ. Ити кэпсэтиилэргэ Ил Түмэн депутата ыччат лидердэрэ төрөөбүт норуоттарын тылын, культуратын сайыннарыыга, чөл хаалларыыга, литература, киинэ, искусство эйгэлэригэр саҥа ааттар тахсыыларыгар, ыччакка холобур буолар эдэр дьоннор тустарынан киинэлэр, кинигэлэр, норуот сүргэтин көтөҕөр айымньылар, үчүгэй тэрээһиннэр баар буолууларыгар күүскэ үлэлэһэллэрэ эрэйиллэрин бэлиэтээн, лидердэр ханнык хайысхаҕа сүрүн болҕомтолорун ууруохтарын сөбүн ыйан, сүбэлээн биэрдэ.
 
Антонина Григорьева “Моя законодательная инициатива” диэн тэрээһиҥҥэ ыччаттар сокуон барылларыгар этиилэри, барыллары оҥорон кытталларыгар, Дьокуускайга уонна кини аттыгар саҥа технологияларынан үлэлии турар тэрилтэлэргэ экскурсияларга сылдьалларыгар, хотугу дьахталлар лидердэрин туһунан саҥа кинигэни бэчээттээн таһаарыыга көмөлөһөргө бэлэмин биллэрдэ. “Эһиги көҕүлээһиҥҥитинэн, иилээһиҥҥитинэн-саҕалааһыҥҥытынан олох күөстүү оргуйуохтаах”, -- диэтэ Антонина Григорьева.
Аҕыйах ахсааннаах төрүт олохтоох хотугу норуоттар ыччаттарын лидердэрин кытта көрсүһүү уопсай хаартыскаҕа түһүүнэн түмүктэннэ.
 
Ил Түмэн пресс-сулууспата