СР Государственнай Мунньаҕын (Ил Түмэн) бэрэссэдээтэлэ Виталий Басыгысов, парламент наукаҕа, үөрэҕириигэ, культураҕа уонна сонуну киэҥник тарҕатар ситимнэргэ сис кэмитиэтин бэрэссэдээтэлэ Елена Голомарева, мандаакка уонна регламеҥҥа хамыыһыйатын бэрэссэдээтэлэ Руслан Платонов, «Анаабыр алмаастара» тэрилтэ генеральнай директора Матвей Евсеев кыттыылаах тэрээһин саха литературатын, наукатын араас салааларын төрүттээбит, гуманист-бөлүһүөк А.Е.Кулаковскай төрөөбүтэ 135, «Саха интеллигенциятыгар сурук» айыллыбыта 100, Таатта улууһа тэриллибитэ 100 сылын бэлиэтээһин чэрчитинэн ыытылынна.

 

Манна Дьокуускайтан, республика араас муннуктарыттан Өксөкүлээх Өлөксөй аймахтара, чугас дьоно, учуонайдар, суруйааччылар, суруналыыстар, айар интеллигенция бэрэстэбиитэллэрэ, министерстволар уонна биэдэмистибэлэр салайааччылара, эппиэттээх үлэһиттэрэ кэлэн кытыннылар. Ол курдук Ытык-Күөлгэ ыҥырыллыбыттар А.Е.Кулаковскай институтун директора Людмила Кулаковская, М.К.Аммосов аатынан Хотугулуу-Илиҥҥи федеральнай университет профессора Прасковья Сивцева-Максимова, Дьокуускайдааҕы Арчы дьиэтин директора Валентина Бочонина, «Чолбон» сурунаал кылаабынай редактора Николай Винокуров – Урсун, «Орто дойду сонуннара» хаһыат редактора Иван Ушницкай, суруйааччы Семен Попов – Тумат уо.д.а.

 

Ыалдьыттар бастаан Ытык-Күөл 1№-дээх орто оскуолатын тиэргэнигэр турар А.И.Софронов – Алампа пааматынньыгар сырыттылар, А.Е.Кулаковскай пааматынньыгар тыыннаах сибэкки дьөрбөтүн уурдулар. Ол кэннэ Димитриан чочуобунатын, Ытык-Күөллээҕи «Таатта» уус-уран литературнай музей-заповеднигы көрдүлэр.

 

«Ырыа-хоһоон» кинигэ - Өксөкүлээх Өлөксөй талыллыбыт айымньыларын хомуурунньуга. Хомуурунньук СР народнай депутата, «Анаабыр алмаастара» ААО генеральнай директора Матвей Евсеев көмөтүнэн күн сирин көрбүт.

 

Кинигэ сүрэхтэниитэ Таатта театрын дьиэтигэр буолан ааста. Ыалдьыттарга бастаан улуустан төрүттээх улуу дьон туһунан кэпсээтилэр, кинилэр суруйан хаалларбыт кынаттаах тылларын билиһиннэрдилэр, уус-уран самодеятельность кыттыылаахтара хомуһунан, хоһоонунан, ырыанан-тойугунан эҕэрдэлээтилэр. Таатта улууһун баһылыга Михаил Протодьяконов киирии тылынан дьоро киэһэни аста.

 

Ил Түмэн депутаттара Виталий Басыгысов, Елена Голомарева, Матвей Евсеев тыл эттилэр. Кинилэр А.Е.Кулаковскай - Өксөкүлээх Өлөксөй саха литературатын, наукатын сайдыытыгар киллэрбит сүдү кылаатын бэлиэтээтилэр, кини хаалларбыт нэһилиэстибэтин харах харатын курдук харыстыыр, чинчийэр-үөрэтэр, тарҕатар наадалааҕын тоһоҕолоотулар.

 

Бу кэннэ Өксөкүлээх Өлөксөй хоһооннорун ааҕыы буолла. Кинигэни хомуйан оҥорбут Людмила Кулаковская тыл эттэ.