Саха Республикатын народнай депутаттара Таатта улууһун төрүттэммитэ 100 сылыгар аналлаах тэрээһиннэргэ кыттыахтара. Бу тэрэээһиннэр кулун тутар 22-23 күннэригэр Дьокуускай куоракка ыытыллаллар.
 
Дьокуускайга Таатта күннэрин чэрчитинэн киэҥ программалаах араас тэрээһиннэр буолаллар. Ол курдук, кулун тутар 22 күнүгэр Хомус музейыгар «Л.Н.Турнин талба талаанын сыдьаайа» диэн көрсүһүү, СР Национальнай уус-уран музейыгар «Кустук араас өҥүнэн Тааттабын мин хоһуйабын» оҕо быыстапката, «Таатта кырса эн» литературнай түмсүү кыттыылаах тэрээһиннэр ыытыллыахтара.
 
Маны кэккэ, Арчы дьиэтигэр «Таатта улууһун бастакы кулубата Оонньуулаах Уйбаан түөлбэтиттэн», «Таатта талба таҥаһа», «Таатта оһуохайын түһүлгэтэ» диэн дьоро киэһэлэр тэриллэллэр. Эдэр көрөөччү театрыгар Таатта улууһун ветераннарын улахан кэнсиэрэ былааннанар.
 
Суорун Омоллоон аатынан опера уонна балет театрыгар «Айхаллан, ытык Таатта» диэн улуус тэриллибитэ 100 сылыгар аналлаах үөрүүлээх мунньах буолар.
 
Кулун тутар 23 күнүгэр Саха сирин норуоттарын музыкатын уонна фольклорун музейыгар М.Шамаева «Саха былыргы музыкальнай инструменнара» кинигэтин сүрэхтэниитигэр ыҥыраллар. Өксөкүлээх Өлөксөй аатынан культура киинигэр Таатта улууһун эдэр көлүөнэтин «Ыччат айар аартыга» уонна норуот маастардарын быыстапкалара аһыллыахтара. Киэһэ «Төлкөм төрдө - тапталлаах Тааттам» гала-кэнсиэр уонна да атын тэрээһиннэр буолуохтара.
 
Ил Түмэн пресс-сулууспата