Сокуону таһаарар Дума бэрэссэдээтэлэ Сергей Хохлов салайааччылаах делегация састаабыгар кыраай социальнай-экономическай сайдыытыгар бастайааннай кэмитиэт бэрэссэдээтэлэ Дмитрий Розенков, Дума аппараатын салайааччы Сергей Сокуренко, Думаҕа Хотугу сир, Сибиир уонна Дальнай Восток аҕыйах ахсааннаах төрүт норуоттарын бырааптарыгар кылаабынай эксперт Иван Бельды, «Виточ» община бэрэссэдээтэлэ Андрей Громов, парламент аппараатын үлэһиттэрэ киирбиттэр.

 

Хабаровскай депутаттара хотугу дьиэ табатын иитиини сайыннарыы үлэтин сүрүннүүр нормативнай-правовой аакталары кытта билсэр, табаны иитэр хаһаайыстыбаларга, таба иитиитин бородууксуйатын переработкалааһыҥҥа уонна батарыыга идэтийэр тэрилтэлэргэ сырыттылар, бу боппуруостарга Саха сиринээҕи коллегаларын кытта уопут атастаһар баҕалаахтар.

 

Муус устар 10 күнүгэр кинилэр Горнай улууһугар тиийэн «Таба» НАОК паантаҕа анаан табаны иитэр ыстаадатыгар сырыттылар. Ыалдьыттар табаһыттар олохторун-дьаһахтарын, үлэлиир усулуобуйаларын кытта билсистилэр. Табаны корализациялааһын кэмигэр түбэһэн, элбэҕи көрдүлэр-биллилэр. Манна ыалдьыттары Ил Түмэн аграрнай политикаҕа уонна тыа сиригэр сис кэмитиэтин бэрэссэдээтэлэ Дмитрий Наумов, тыа хаһаайыстыбатыгар уонна ас-үөл политикатыгар министри солбуйааччы Иван Павлов, Саха сирин эбэҥуилэрин Ассоциациятын президенэ  Борис Николаев уонна да атыттар арыаллаатылар.

 

Бүгүн, муус устар 11 күнүгэр, Хабаровскай кыраай Сокуону таһаарар Думатын бэрэстэбиитэллэрэ «Таба» НАОК, «Сахабулт» ААО, «ЭПЛ Даймонд» компанияларга сылдьан, үлэһиттэрин кытта көрсүстүлэр, хайдах үлэлииллэрин кытта билсистилэр. Күн иккис аҥаарыгар Ил Түмэн бэрэссэдээтэлэ Виталий Басыгысовы кытта көрсүһүү буолуоҕа.

 

Онтон кэлэр күҥҥэ Хабаровскай депутаттара СР Национальнай библиотекатыгар хоту дойду норуоттарын быыстапкатыгар сылдьыахтара уонна Саха сирин норуотун депутаттарын кытта кэккэ көрсүһүүлэри ыытыахтара.

 

Биир сүрүн тэрээһининэн «Саха сиригэр хотугу дьиэ табатын иитиини сайыннарыы уопута» диэн темаҕа төгүрүк остуол буолуоҕа. Манна Ил Түмэн бэрэссэдээтэлэ Виталий Басыгысов, Хабаровскай кыраай Сокуону таһаарар Думатын спикерэ Сергей Хохлов, Ил Түмэн бэрэссэдээтэлин солбуйааччы Андрей Кривошапкин, Саха сирин тыа хаһаайыстыбатыгар уонна ас-үөл политикатыгар министри солбуйааччы Иван Павлов, норуот депутаттара кыттыахтара.

 

Тэрээһини киирии тылынан Ил Түмэн бэрэссэдээтэлэ Виталий Басыгысов аһыаҕа, республикаҕа хотугу дьиэ табатын иитиини сокуонунан хааччыйыы туһунан Ил Түмэн аграрнай политикаҕа уонна тыа сиригэр сис кэмитиэтин бэрэссэдээтэлэ Дмитрий Наумов кэпсиэҕэ. Саха сиригэр хотугу дьиэ табатын иитии туругун уонна сайдыытын туһунан дакылааты тыа хаһаайыстыбатын министрин солбуйааччы Иван Павлов оҥоруоҕа. РТХНА СС тыа хаһаайыстыбатын научнай-чинчийэр институтун директора Михаил Неустроев таба иитиитигэр научнай хааччыйыы туһунан иһитиннэриэҕэ. Ону таһынан «Хатыыстыыр» компания директора Иван Дормидонтов уонна «Үчүгэй» предприятие директора Семен Аммосов тыл этиэхтэрэ. Төгүрүк остуол түмүгэр кыттыылаахтар санааларын атастаһыахтара.