Тэрээһин оскуола иннинээҕи саастаах оҕо тэрилтэлэриттэн бэрэстэбиитэл, суруналыыс Клавдия Васильева көҕүлээһинэн ыытыллыаҕа.

 

Мунньахха С.А. Новгородов аатынан «Бичик» национальнай кинигэ кыһатыттан оҕо уонна үөрэх кинигэлэрин редакциятын сэбиэдиссэйэ Марина Макеева, үөрэх министиэристибэтиттэн Туйаара Абрамова уонна да атын тэрийэр хамыыһыйа чилиэннэрэ кыттыыны ыллылар.

 

 

Куонкурус кыра саастаах оҕолорго төрөөбүт тылга тапталы иҥэрии, оҕо истэр-саҥарар, өйдүүр дьоҕурун салгыы сайыннарыы, ааҕар-суруйар талааннаах дьону көҕүлүүр, өйүүр сыаллаах.

 

Дьокутаат Елена Голомарева куонкуруһу икки хайысханан ыытарга сорудахтаата. Куонкуруска кыттааччылар бастакы хайысханнан уус-уран айымньылар түһүмэхтэригэр кэпсээни, остуоруйаны эбэтэр хоһоону, иккис хайысхаҕа – педагогтар, атын да идэлээх, ааҕар-суруйар дьоҕурдаах дьон оҕону сайыннарар, билиитин хаҥатар матырыйаалларын дьүүллүүр сүбэҕэ тиксэриэхтэрин сөп.

 

Айымньылар кыра саастаах оҕолор өйдүүр дьоҕурдарын, тылларын-өстөрүн сайыннарар, оҕо тулалыыр чугас дьонугар, төрөөбүт сиригэр-дойдутугар итии таптал тыынынан сылаастык илгийэр буолуохтаахтар. Ону тэҥинэн ааптардар оҕо толкуйдуур, ырытар дьоҕурдарын сайыннарарга кыһаллыахтаахтар.

 

Кыайыылаахтарга харчынан бириэмийэ олохтонуо. «Бичик» кинигэ кыһата бастакы миэстэни ылбыт кыттааччы үлэтин босхо бэчээттиир санаалаах. Оттон оҕолор бастыҥ айымньылара «Кэскил» хаһыакка бэчээттэниэхтэрэ.