Олунньу 7 күнүгэр Уус-Алдан улууһун Мындаабатааҕы спортивнай хайысхалаах орто оскуолаҕа үөрүүлээх быһыыга-майгыга таас спортивнай саала бастакы сыбаайата түһэрилиннэ.
 
Тэрээһиҥҥэ Ил Түмэн бэрэссэдээтэлин солбуйааччы Александр Жирков, Ил Түмэн депутата Семен Олесов, ыччат политикатыгар уонна спорка миниистир Александр Подголов, республика правительствотын иһинэн үлэлиир «Государственнай сакаасчыт сулууспата» ГУ генеральнай дириэктэрэ Василий Ефремов, «Уус-Алдан улууһа» муниципальнай тэриллии баһылыгын солбуйааччы Алексей Федотов уо.д.а. кыттыыны ыллылар.
 
Спортивнай хайысхалаах Мындааба орто оскуолатыгар оҕолор эрчиллэр спортивнай саалалара суох буолан, балачча тэйиччи сытар Бороҕоҥҥо баран дьарыктанарга күһэллэллэр. Эрчиллэргэ төһө даҕаны усулуобуйа суох буоллар, спорт үгүс көрүҥнэригэр үчүгэй көрдөрүүлээхтэр, ситиһиилэрдээхтэр. Ол курдук, бу оскуолаттан өрөспүүбүлүкэ киэн туттар спортсменнара, тустууктар Семен Семенов, Иннокентий Иннокентьев, Виктор Рассадин уо.д.а. кынат анньынан тахсыбыттара.
 
Ааспыт сыл бүтэһигэр Саха Республикатын Президенэ Егор Борисов улууска тахса сылдьан, спортивнай хайысхалаах оскуола оҕолоро хайдах усулуобуйаҕа үөрэнэллэрин, дьарыктаналларын көрөн баран, олохтоохтору кытта көрсүһүү түмүгүнэн оҥоһуллубут 1349-А1 №-дээх боротокуолга Мындаабатааҕы спортивнай сааланы тутууну киллэрбитэ. Бөһүөлэк олохтоохторо туруорсар боппуруостара тылтан дьыалаҕа түргэнник киирэн эрэриттэн үөрүүлэрэ улахан.
 
«Республикаҕа Тыа сирин сыла биллэрилиннэ, бу биир сыллаах дьаһал буолбатах. Бэйэтин сыллааҕы туһаайыытыгар Республикабыт Президенэ Егор Борисов оҕону-ыччаты үөрэтиини-иитиини, эт-хаан өттүнэн сайыннарыыны государственнай социальнай политика сүрүн хайысхатынан туруорда. Тыа сирин инникитин туһугар ылыныллар дьаһаллар кэскиллээх тутууларынан доҕуһуолланыахтаахтар. Бу күннээҕи буолбакка, республика Президенэ, Правительствота, Ил Түмэнэ ылыммыт өр сыллаах соруктара», - диэн үөрүүлээх күҥҥэ мустубут биир дойдулаахтарын иннигэр Александр Жирков эттэ.
 
Бастакы сыбаайа түһэр дьоро күнүгэр улуус дьаһалтата, оскуола дириэктэрэ Михаил Бурнашев, Мүрү нэһилиэгин баһылыга Василий Аммосов, үөрэнээччилэр, олохтоохтор өр сылларга туруорсубут туруорсуулара олоххо киирэн эрэринэн, Саха Республикатын Президенигэр Егор Борисовка, Правительствоҕа, Ил Түмэҥҥэ истиҥ махталларын тиэртилэр уонна спортивнай саала түргэн тэтиминэн тутулларыгар эрэллэрин биллэрдилэр.
 
Ил Түмэн Пресс-сулууспата