Ил Түмэн иккис уочараттаах пленарнай мунньаҕын түмүгүнэн, спикер Александр Жирков бэҕэһээ суруналыыстары кытта көрсөн бастакы пресс-конференциятын ыытта.

 

Пресс-конференция саҕала-ныыта иллэрээ күн буолбут пленарнай мунньах түмүктэрин иһитиннэрэригэр Александр Николаевич комитеттар састааптарын талыы быйыл уратытык барбытын эттэ. Төрдүс ыҥырыылаах парламент сессиятыгар бастаан комитеттар салайааччылара талыллыбыт, онтон салайааччылар састааптарын бигэргэппит буоллахтарына, быйыл комитеттар салайааччыларын кытта тэҥҥэ састаабын талыы барбыт. Онон парламент салайааччыта билигин комитет чилиэннэрэ бары талыллан үлэлииргэ бэлэмнэрин туһунан иһитиннэрдэ.

Иккиһинэн, Сунтаартан норуот депутатынан талыллыбыт Александр Акимов РФ Федеральнай Мунньаҕын Федерация Сэбиэтигэр Ил Түмэнтэн бэрэстэбиитэл буоларга мэктиэлэммитинэн, депутат дуоһунаһыттан болдьоҕун иннинэ тохтообутун этэн туран, эһиил быыбар күнэ уларыйбатаҕына, балаҕан ыйын 8 күнүгэр Сунтаарга иккистээн быыбар буолуоҕун этэр.

Ону таһынан, Александр Жирков тэрээһин боппуруостарын дьүүллэһиигэ, фракциялары кытта киэҥ кэпсэтии тахсыбытын бэлиэтээтэ. «Мин санаабар, комитет састаабын талыыга фракцияларынан тэҥнээһин үчүгэй. Холобур, комитеттар салайааччыларын ылан көрдөххө, «Биир ньыгыл Россияттан» быһа холуйан, 55,9 %, оттон «Сиэрдээх Россияттан» 54,5 %, «КПРФ» 40% ылаллар. Биллэн турар, депутаттар туох баар этиилэрэ, баҕалара барыта кыайан олоххо киирбэтэ. Ол эрэн, быйыл комитет састаабын талыы үгүс мөккүөрэ суох ааста. Онон бу талыллыбыт депутаттар үчүгэйдик үлэлиэхтэригэр эрэнэбин», — диэн этэр кини.

Салгыы спикер суруналыыстар ыйытыыларыгар хоруйдаата. Ол курдук, «Регионнар салайааччыларын талыыга саҥа федеральнай сокуон тахсыбытынан, Саха сирин дьоно Президени талар бырааптара күөмчүлэниэ суоҕа дуо?» диэн ыйытыыга: «Бу боппуруос барыбытын да долгутар буолуохтаах. Алтынньы 2 күнүгэр буолбут мунньахха «республикабыт баһылыгын норуот кистэлэҥ куоластааһынынан бэйэтэ талыахтаах», — диэн этэн турабын. Мин депутат да, Саха сирин олохтооҕун да буоларым быһыытынан, дойдум баһылыгын куоластаан талыахпын баҕа-рабын. Төрдүс ыҥырыылаах Ил Түмэн пленарнай мунньаҕар быыбар туһунан сокуон ылыллан турар. Федеральнай сокуон уларыйбатаҕына, бу сокуон халбаҥныа суоҕа», — диэн хоруйдуур.

Россия үрдүнэн экономика тэтимэ бытаарбыта дойду бюджетыгар оҕуста. Кэлиҥҥи биэс сылга республикабыт бюджета сылын аайы улаата турбут буоллаҕына, экономистар эһиилги үп-харчы кээмэйэ быйылгыттан улааппатын сабаҕалыыллар. Бу боппуруоска спикер, эһиилги эрэ сыл буолбакка, кэлэр үс сыллааҕы уонна быйылгы бюджет эмиэ хамсыаҕын эттэ. «Сэтинньи 7-8 күннэригэр буолуохтаах пленарнай мунньахпытыгар быйылгы бюджекка уларытыылары киллэриэхтээхпит. Билиҥҥи сабаҕалааһынынан, 5 млрд солк. кыччыахтаах. Биллэн турар, Правительство үчүгэй олохтон маннык хос көрөргө киллэрбэт. Онон депутаттар быыбар кэмигэр эппит, туруорбут соруктарын хос көрөргө күһэллиэхтэрэ. Оннугу олохпут ирдиир. Ол эрээри, социальнай хайысхаларга уларыйыылар киириэхтэрэ суоҕа. Эһиилги бюджет бырайыагын алтынньы 24 күнүгэр нулевой ааҕыыга көрүөхпүт», — диэн этэр.

Урут да, билигин да Правительствоҕа, Ил Түмэҥҥэ анал удостоверениелаах, пропусктаах эбэтэр аккредитациялаах буоллахха эрэ аһараллар. Суруналыыстар Ил Түмэҥҥэ аккредитация туһунан ыйытыылара, биллэн турар, умнууга эмиэ хаалбата. Онуоха спикер маннык хоруйу биэрдэ: «Мин бэйэм суруналыыстыы сылдьыбытым. Онон суруналыыстыка «куукунатын» билэбин, бу үлэни ытыктыыбын, ону ааһан, өссө кэтээн көрөбүн. Оттон суруналыыстар көҥүллэрин күөмчүлүүр диэччилэргэ, этиэм этэ, миэхэ киирбит испииһэккэ барытыгар илии баттаабытым».