Саха Республикатын Ил Түмэнин Бэрэссэдээтэлэ А.Н.Жирков 2013 сыл сэтинньи 6 күнүгэр Россия Федеральнай Мунньаҕын Судаарыстыбаннай Думатын депутатын, Саха Республикатын бастакы Президенин Михаил Николаевы уонна Саха Республикатын Ил Түмэниттэн Россия Федеральнай Мунньаҕын Федерациятын Сэбиэтин чилиэнин Александр Акимовы кытта көрүстэ.
 
Көрсүһүүгэ Саха Республикатын Ил Түмэнин Бэрэссэдээтэлэ республика парламена Российскай Федерация Федеральнай Мунньаҕын депутаттарын кытта бииргэ үлэлээһиннэрин саҥа таһымҥа таһаарыы туһунан боппуруоһу көтөхтө.
 
“Билигин Федеральнай Мунньах Судаарыстыбаннай Думатыгар уонна Федерациятын Сэбиэтигэр бөдөҥ бырайыактар көрүллэллэр, олор олоххо киириилэрэ биһиги республикабытыгар улахан суолтаны ылыаҕа. Маныаха биһиги - республика Ил Түмэнэ, Российскай Федерация Федеральнай Мунньаҕын депутаттара уонна Саха Республикатын Правительствота үлэбитин ордук чуолкайдаан, сүрүннээн биэриэхтээхпит. Биһиги биир уопсай дьыала туһугар үлэлиибит, онон республикабыт туһугар хас биирдии дьайыыбыт хардарыта сөбүлэһиилээх, биир хайысхалаах буолуохтаах”, – диэн бэлиэтээтэ Александр Жирков.
 
Көрсүһүүгэ, чуолаан, Арктиканы баһылааһын программатын оҥорууга бииргэ үлэлээһин араас өрүттэрэ, Арктика баайын туһаҕа таһаарыыга республика кыттыыта, “Российскай Федерация Арктическай зонатын туһунан” федеральнай сокуон барылыгар Саха Республикатын сыста сытар оройуоннарын киллэрии уонна да атын кэккэ боппуруостар дьүүллэһилиннилэр.
 
Дальнай Восток уонна Байкал регионун социальнай-экономическай сайдыыларын сокуон дьайыыларынан хааччыйыыга хардарыта бииргэ үлэлээһин боппуруостара көтөҕүллүбүттэрэ. Дальнай Восток уонна Байкал регионун кэлимник сайыннарыы эйгэтигэр судаарыстыба бэлиитикэтин олоххо киллэриини сокуонунан сүрүннээһиҥҥэ туһуламмыт этиилэри киллэриигэ республика бэһис ыҥырыылаах парламеныгар үлэлиир бөлөх тэрилиннэ.
 
Итини сэргэ, Саха Республикатын Ил Тµмэнин сокуону оҥорууга көҕүлээһиннэрин Российскай Федерация Федеральнай Мунньаҕын Судаарыстыбаннай Думатыгар салгыы көрүүнү түргэтэтии боппуруоһа болҕомто киинигэр турда.
 
Кэпсэтии, сүрүннээн, Российскай Федерация  Федеральнай Мунньаҕын Судаарыстыбаннай Думатын көрүүтүгэр киллэриллибит республика үс сокуону оҥорууга көҕүлээһиннэрин тула барда. Бу, бастатан туран, “Уһук Хоту дойду оройуоннарыгар уонна олорго тэҥнэниллибит сирдэргэ үлэлиир уонна олорор дьоҥҥо судаарыстыбаннай мэктиэлэр уонна толууурдар тустарынан” Российскай Федерация сокуонугар уонна “Российскай Федерация Үлэ кодексыгар” (Уһук Хоту дойду оройуоннарыгар уонна олорго тэҥнэниллибит сирдэргэ олорор уонна үлэлиир (үлэлээбит) дьоҥҥо көрүллэр толуурдар кэрискэлэрин кэҥэтиигэ) уларытыы киллэрэр туһунан”   Саха Республикатын үһүс ыҥырыылаах Ил Түмэнин народнай депутаттара ылыммыт сокуону оҥорууга көҕүлээһиннэрэ буолар.
      
Итинтэн атын икки сокуону оҥорууга көҕүлээһиннэри төрдүс ыҥырыылаах Ил Түмэн ылыммыта уонна Федеральнай Мунньах Судаарыстыбаннай Думатын көрүүтүгэр киллэрбитэ. Бу “Российскай Федерация Пенсионнай фондатыгар, Российскай Федерация социальнай страхованиеҕа фондатыгар, Булгуччулаах медицинскэй страхование Федеральнай фондатыгар страхование усунуостарын туһунан”, “Российскай Федерацияҕа булгуччулаах пенсионнай страхование туһунан” федеральнай сокуоннарга уларытыы киллэрэр туһунан сокуон барыла уонна “Российскай Федерацияҕа гражданнар доруобуйаларын харыстабылын төрүттэрин туһунан” Федеральнай сокуоҥҥа уларытыы киллэрэр туһунан” сокуон барыла буолаллар.
 
Бу дьыл сэтинньи 12 күнүгэр Александр Жирков Дальнай Восток уонна Байкал регионун кэлимник сайыннарыы эйгэтигэр судаарыстыба бэлиитикэтин олоххо киллэриини сокуонунан сүрүннээһиҥҥэ туһуламмыт этиилэри оҥорууга республика Ил Түмэнин үлэлиир бөлөҕүн мунньаҕын ыытыаҕа.
 
Ил Түмэн пресс-сулууспата