Ил Түмэн Хонтуруоллуур кэмитиэтин мунньаҕар Дьокуускай куорат элбэх оҕолоох дьиэ кэргэннэрин Союһун бэрэссэдээтэлэ Римма Горохова, сир ылыан баҕалаах киин куорат элбэх оҕолоох ыалларын көҕүлүүр бөлөҕүн салайааччыта Петр Степанов, Хатас бөһүөлэгэр “М-16” саҥа микрооройуонугар сир учаастагын ылбыт элбэх оҕолоох ыаллар ааттарыттан староста Варвара Скрыбыкина, Хаҥалас улууһуттан Мохсоҕоллоох бөһүөлэгиттэн элбэх оҕолоох дьиэ кэргэннэр кулууптарын бэрэссэдээтэлэ Евдокия Сосина, Хонтуруоллуур кэмитиэккэ  общественностан бэрэстэбиитэл, республика Дьахталларын тэрилтэлэрин Союһун бэрэссэдээтэлэ Валентина Кириллина, элбэх оҕолоох ийэлэр кытыннылар.  

 

Киин куоракка элбэх оҕолоох 2300 дьиэ кэргэҥҥэ сир учаастага бэриллибит. Уочаракка элбэх оҕолоох ыал элбэх. Чугастааҕы кэмҥэ биэрэргэ анаан Тулагыга өссө 500-кэ сир учаастагын бэлэмнээбиттэр. Ахсынньы ыйга сэрэбиэйдэһии ыытыллаары турар. Мунньах кыттыылаахтара этэллэринэн, сорохтор Маҕанныыр суол 18 км-гар саад-оҕуруот табаарыстыбатын көрүҥүнэн сир учаастагын ылбыттара сөбө суох. Тоҕо диэтэххэ, элбэх оҕолоох дьиэ кэргэннэр чааһынай дьиэни тутууга анаан сир учаастагын ыллахтарына, кинилэргэ көрүллэр тосхоллорунан субсидиянан туһанар кыахтаахтар. Онон Киин куорат элбэх оҕолоох дьиэ кэргэннэрин Союһун бэрэстэбиитэллэрэ маны Ил Түмэн Хонтуруоллуур кэмитиэтэ болҕомтоҕо ыларыгар эттилэр.

 

Үстэн элбэх оҕолоох дьиэ кэргэннэргэ көрүллэр тосхолунан 50 мөл. солкуобай көрүллэр буоллаҕына, биир дьиэ кэргэҥҥэ 1,5 мөл. солкуобай тиксэр. Уочаракка турар элбх оҕолоох ыаллартан 35 эрэ ыал тиксиэн сөп дииллэр. Онон уочаракка турар дьонтон саамай наадыйааччыларга биэрэри көрүөххэ сөп дуо диэн мунньах кыттыылаахтарын ыйытыыларыгар Игорь Никитин оннукка дьон сөбүлэһиэхтэрэ суоҕа диэн хардарда.

Хатаска “М-16” микро-оройуоҥҥа 89 ыалга босхо бэриллибит сирдэртэн бииригэр эрэ дьиэ туттан олорор ыал баар. Уот линията тардыллыбатах буолан, ыал бэйэтин генераторынан уоттанан олорор диэн Варвара Скрыбыкина кэпсээтэ. Уот линията баар буолуоҕунааҕар атын ханнык да инфраструктура суох. Онон Тулагы-Киллэм, Хатас, киин куоракка “Сатал”  сирдэриттэн учаастактарга тиксибит элбэх оҕолоох ыаллар кирэдьиитинэн туһаныыга, инфраструктаран хааччылыыга улахан эрэйи, мэһэйдэри көрсүбүттэрин кэпсээтилэр.

 

Хонтуруоллуур кэмитиэт общественнай чилиэнэ Валентина Кириллина: “Элбэх оҕолоох дьиэ кэргэннэргэ судаарыстыба көмөтө көрүллэр эрээри, ол бырааптарын ирдэһэллэригэр көрдөһөөччү оруолугар кубулуйдулар. Тулагыга олохтоох дьоҥҥо Хатаска баар сиртэн учаастак биэрэллэр эбэтэр Хатаска олорор ыалга Тулагыттан биэрэллэр. Дьиэ тутталларыгар аҥардас айанныыллара да эрэйдээх”, -- диэн бу өттүн эмиэ учуоттуур наадатын ыйда.

 

Урукку кэмнэргэ уоту тардыыттан саҕалаан суолу-ииһи уо.д.а. барытын кэлимник быһаарар биэдэмистибэлэр икки ардыларынааҕы анал хамыыһыйа үлэлээбитин ахтан тураннар, киин куорат элбэх оҕолоох дьиэ кэргэннэрин Союзтарын уонна дьиэ туттарга анаан сир учаастактарын босхо ылбыт ыаллар кээпэрэтииптэрин бэрэстэбиитэллэрэ кинилэргэ саамай сүрүн кыһалҕанан буолар боппуруоһу -- инфраструктураны оҥорууну --  республика парламенын Хонтуруоллуур кэмитиэтэ хонтуруолга ыларыгар эттилэр. “Бу көрсүһүүгэ эһиги саамай сөпкө баар кыһалҕаларгытын иһитиннэрдигит, сокуон юридическай өттүнэн толоруллуутугар болҕомтону туһаайдыгыт. Хатаска, “Сатал” кээпэрэтиипкэ, Тулагы-Киллэмҥэ үөскээбит кэлим боппуруостар сорҕолорун муниципальнай тэриллиилэртэн ыйытыахпыт. Кинилэри кытта кыһалҕалары туоратыыга үлэлиэхпит”, – диэтэ Игорь Никитин.

 

Ил Түмэн Хонтуруоллуур кэмитиэтин бэрэссэдээтэлин солбуйааччы Игорь Никитин мунньах кыттыылаахтарын этиилэрин истэн баран, хас биирдии кээпэрэтиипкэ сир ылбыттар туруорсар кыһалҕаларын түмэн, олору туоратыыга муниципалитеттары кытта бииргэ үлэлиэхпит диэн түмүктээтэ.