Депутат тэрилтэлэр үлэлэрин сүрүн боппуруостарын сиһилии ыйытта, туох проблемалар баалларын, инникигэ, чуолаан кэлэр 2014 сылга туруорсар былааннарын кытары билистэ.

«Таба» компания генеральнай директора Михаил Павлов этэринэн үс сыл анараа өттүгэр 170 эрэ табалаах буоллахтарына, билигин таба төбөтүн ахсаана 1400 дылы элбээбит. Эбээн-Бытантайга, Горнайга, Бүлүүгэ уонна Хатаска переработкалыыр сыахтар былаан быһыытынан этэҥҥэ үлэлии туралларын бэлиэтээтэ. Икки сыл иһинэн тэрилтэ таба панталарыттан БАД уонна косметика оҥорон экспортка таһаарда. Кэлэр сылларга аны таба хааныттан эмп, гематоген, спортсменнар ис туруктарын көтөҕөр иҥэмтиэлээх спрей оҥорор былаан баар эбит. Ити этиллибит инновациялар республика бюджетыттан эрэ буолбакка, федеральнай хааччыйыыга киирэллэрэ буоллар диэн Михаил Михайлович баҕа санаатын биллэрдэ.

 

Саха ынаҕын боруодатын иитэр-үөскэтэр “Тускул” тэрилтэ үлэһиттэрэ этэллэринэн, быйыл хаһаайыстыбаларга уопсай сүөһү ахсаана 590 диэри улаатта, ол да буоллар бу сылга ынаҕы иитиигэ бюджеттан бэриллэр харчыны үрдэтиэх оннугар, сарбыйан кэбистилэр. Ол курдук, былырыын 19 мөл. солк. көрүллүбүт буоллаҕына, быйыл 14 мөл. эрэ бэриллэр буолбут.

 

Түмүккэ, тыа сиригэр уонна аграрнай политикаҕа Ил Түмэн сис кэмитиэтин бэрэссэдээтэлэ Дмитрий Саввин кэпсэтии кыттыылаахтарын барыларын истэн, ити туруорбут боппуруостары барытын бу ый 15 күнүгэр буолуохтаах кэмитиэт мунньаҕар сиһилии бэлэмнээн биэрэллэригэр туһаайда. Итини таһынан инвестиционнай программаҕа киирии боппуруостарын, инновационнай идеялары олоххо киллэрии, 2001 сылга ылыллыбыт ”Саха ынаҕа” сокуон тоҕо толору үлэлээбэтин быһаарар уонна да атын тыа сиригэр аналлаах сүрүн боппуруостарга үлэбитин хаҥатыахпыт диэн эрэннэрдэ.