«Норуот фрона» тэриллиэҕиттэн олус кѳхтѳѳхтүк уонна ситиһиилээхтик үлэлиир киһи, бу общественнай хамсааһын биир лидера, Ил Түмэн мунньаҕын депутата Алена Атласова Чурапчыга сылдьан олохтоохтору кытта кѳрүстэ. 

 

Дойдубут Президенэ Владимир Путин норуот ис күүһүн сомоҕолоору «Бүтүн Россиятааҕы норуот фрона» диэн ааттаан партиялар үрдүлэринэн таһымнаах хамсааһын тэриллэрин кѳҕүлээбитэ. Бу общественнай күүстэри түмпүт хамсааһын быыбартан быыбарга эрэ буолбакка, сүрүннээн социальнай хайысхаҕа дьоһуннаахтык ылсан үлэлиирэ кэрэхсэнэр.

 

Бэлиэтээн эттэххэ, Алена Атласова уонна Чурапчы улууһун саҥа баһылыга Андрей Ноговицын дойдубут президенэ Владимир Путин итэҕэллээх дьоно буолаллар. 

 

Сэтинньи 22 күнүгэр улуус дьаһалтатын мунньахтыыр саалатыгар дьон кинилэри кытта кѳрсѳѳрү, кыһалҕаларын тириэрдээри, туруорсууларын ирдэһээри мустуоҕун муһунна. Кэлбит дьон үксэ дойду үрдүнэн ыытыллар политика кѳдьүүстээх буоларыгар нэһилиэнньэ кыттыыта хайаан да ирдэнэрин бэлиэтээтилэр. «Норуот фрона» курдук улахан политическай суолталаах хамсааһын нѳҥүѳ олохпµт тупсуутугар туһуламмыт дьаһаллар олоххо киириилэригэр сомоҕолоһуу, түмсүү баар буолуохтааҕын ыйдылар. Наар кыайыыны уонна ситиһиини эрэ ырыппакка, кыһалҕаларга тохтоон аһаҕас кэпсэтии таҕыста.

 

Улууска ѳр сыл үлэлээн кэлбит, уопуттаах фтизиатр - быраас Ульяна Попова улуус дьоно, чуолаан кыаммат, кырдьаҕас ѳттѳ улаханнык кыһалҕатыйар, эрэйдэнэр боппуруостарын таарыйда. Кини Чурапчыга, дьон – норуот ѳр сылларга ыра санаа ымыыта оҥостон кэлбит санааларын, таас балыыһа тутуутун туруоруста. Инвалидтар ааттарыттан Тамара Дьяконова туран балыыһа тутуллан киириитэ улуус сайдыытыгар, дьон олоҕун таһыма үрдүүрүгэр улахан хардыы буолуоҕун эттэ.

 

Эндокринолог быраас Александра Неустроева: «Аттынааҕы дьиэлэргэ холоотоххо биһиги амбулаториябыт киһи санаата түһэр дьиэтэ буола эргэрдэ. Быраастар уһун сылларга үлэлээн аҕай кэлэн баран, атыттартан итэҕэстээх курдук санананарбыт хомолтолоох. Онон балыыһа тутуллуута улахан тыын боппуруос курдук кѳрѳбүн» - диэн туруорсуутун тириэртэ. Мунньах кыттыылаахтара бу этиини ѳйѳѳн, Алена Николаевнаҕа Ил Түмэн депутата уонна «Норуот фронун» лидера быһыытынан бу боппуруоска улуус дьаһалтатыгар күүс - кѳмѳ буоларыгар кѳрдѳстүлэр. 

 

Чурапчы дьоно таас балыыһа тутуллан олох тупсарыгар туруорсубуттара ыраатта. Чурапчыга мѳлтѳх киһи кыбыллан эчэйэр кыараҕас, кыһынын тымныы, сайынын сылаас амбулатория уонна маны таһынан кырачаан оҕолорбут уонна ийэ буоларга бэлэмнэнэ сылдьар кэрэ аҥардарбыт кѳрдѳрѳр сирдэрэ эмэҕирэ эргэрэн, хаарбах буолбут мас дьиэлэргэ бааллар. Ыарыһахтар онно күнү толору үлэлиир быраастары, сиэстэрэлэри аһынан улаханнык саҥарбат, кыараҕас сиргэ кыйахаммыттарын биллэрбэт, айдаарбат эрэ буоланнар кыһалҕа суох курдук кѳстѳр. Билиҥҥи сайдыылаах кэмҥэ дьон доруобуйата бастакы миэстэҕэ турара саамай сѳптѳѳх политика. Ол политика тыа сиригэр дьоһуннаах кээмэйинэн ыыттыллар кэмэ кэллэ. Онон бүгүн быраастар үлэлиир, ыарыһахтар кѳрдѳрѳр усулуобуйаларын тупсарыыга элбэх киһи баҕа санаатын эттэ, тириэртэ. 

 

Кэпсэтии ыырын кэҥэтэн Римма Дьячковская инвалидтарга туһуламмыт «Хааччаҕа суох эйгэ» программа тыа сиригэр үлэтин туһунан ыйытта. Манна дьүүллэһиигэ үп – харчы кѳрүллэр эрээри кѳдьүүһэ суох ороскуоттанарын бэлиэтээтилэр. Программа салгыы үлэтигэр саҥа хайысхалары тобулан, кырдьык наадалааҕы уонна туһалааҕы ситиһэргэ туһуланыахтааҕын эттилэр. Холобур үгүѳрү үп пандус оҥоруутугар ыытыллан кэллэ. Сорох социальнай объектарга кырдьык олус наадалаах, онтон сорохторго мѳлүйүѳнүнэн сууммаҕа оҥоһуллан баран хаар анныгар сытар. Ол оннугар ити үп инвалидтар кыһалҕалаах олохторун чэпчэтиигэ, хайа эрэ атын хайысхаҕа үлэлиирэ, туһата быдан элбэх буолуоҕун ыйдылар.

 

Улуус киинин биллэр кѳстѳр тумус дьонноро Гурий Монастырев, Герасим Платонов саастаах дьон быһыытынан: «Сыана тоҕо сиэрэ суох үрдүү турарый?» - диэн ыйытыы биэрэн кэпсэтии тэтимин сытыырҕаттылар. «Норуот фрона» бу билиҥҥи кэм сытыы боппуруоһугар дьоһуннаахтык ылсан үлэлииригэр этии киллэрдилэр.

 

Киин балыыһа главнай бырааһа Александр Коркин депутат киһиэхэ, В.Путин итэҕэллээх дьонугар, «Норуот фрона» лидердарыгар туһаайан «Земский доктор» программа олус үчүгэйдик үлэлээн кэлбитин ыйда. Бу программа тыа сиригэр олус туһалаах буоларын кэпсээтэ. Салгыы программа кэлэр сылларга хайаан да үлэлииригэр туруоруста. Маннык хабааннаах программа анны фельшердэри хабан тэриллэн, ѳйѳбүл буолан тыа сиригэр үлэ тэриллиитэ тупсарыгар этии киллэрдэ. Манна, фельдшердар тыа нэһилиэктэригэр биир саамай элбэх үлэлээх медицинскай персонал буолалларын ыйар тоҕоостоох.

 

Алена Николаевна уонна Андрей Тимофеевич бу сотору, итэйэллээх дьон быһыытынан, дойду президенин Владимир Путины кытта кѳрсѳ барыахтаахтар, форумҥа кыттыахтаахтар. Онно тиийэн Саха сирин дьонун – сэргэтин кыһалҕаларын кэпсээн, саҥаны, сайдыылааҕы туруорсан кэлэр дьоһун соруктаахтар. Туруорсуу элбэх, кыһалҕа да хара баһаам, онон дьиҥ норуот сомоҕолоһуутун тэрийэн кэлбит «Норуот фрона» инники үлэтэ кыайыылаах – хотуулаах эрэ буолуон баҕарабыт. Алена Атласоваҕа туһаайан эттэххэ: норуот талбыт тумус дьоно, маннык миэстэтигэр тахсан тыа сирин олохтоохторун кытта кѳрсѳн, кэпсэтэн алгыс ыларгыт үлэҕитигэр кѳмѳлѳѳх буолуо,  сыралаһан ситиспит дьыалаҕыт  куруук дьон махталыгар ахтыллыа.