Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин Миками Норихито Саха сиригэр экологияҕа буортута суох биотуалеты, итиэннэ оҕуруот аһын кыһыннары үүннэрэр технологияны киллэриини кредиттээһин, инвестицияны уонна сайдыыны киллэрии боппуруоһун билсэ, үөрэтэ кэлэ сылдьарын туһунан иһитиннэрдэ.

 

Баан бэрэстэбиитэлистибэтин баһылыга республика депутаттарын кытта көрсүһүүтүгэр Дьокуускайга Японскай быыстапкалыыр-дьыалабыай Арктическай инновационнай технологиялар уонна оборудованиелар кииннэрин тэрийии түгэнигэр Саха Республикатыгар тас дойдулартан киирэр инвестицияҕа сокуон өттүнэн туох мэктиэлэр уонна чэпчэтиилэр баар буолуохтарын туһунан билиэн баҕарар.  

 

 

Анатолий Чомчоев дьон-сэргэ аныгы хааччыллыылаах, чуолаан, туалеттаах дьиэҕэ олорууларын республикаҕа киэҥник тэнитиигэ бу кэлэ сылдьар “Хоккайдо Баан” бэрэстэбиитэлистибэтин баһылыга Миками Норихито улахан көмөлөөх буолуоҕун туһунан бэлиэтээн эттэ. Миками Норихито “Хоккайдо Баан”  Хоккайдо региональнай баана буоларын, бу баан үөһэ этиллибит икки боппуруоһу республикаҕа олоххо киллэриигэ Саха сиригэр филиал аһыан, онно кыра бырыһыаннаах кредит биэриэн сөбүн туһунан кэпсээтэ.

 

Депутат Юрий Николаев баан Россия регионнарын кытта  инвестиция уган бииргэ үлэлээбит уопуттаах дуо диэн ыйыталаһыытыгар тойон Норихито “Хоккайдо Баан” кредит үбүн атын дойду регионнарыгар быһаччы ыытара көҥүллэммэтинэн, кыттыгас тэрилтэ нөҥүө эрэ кыалларын, быһаччы инвестициялааһын уопута суоҕун ыйда.

 

Депутат Александр Уаров Япония баана республикаҕа төһө кэмҥэ уонна төһө бырыһыаҥҥа кредиты биэриэн сөбүн чуолкайдаста. Анатолий Чомчоев этэринэн, баан японецтарга уонна онно баар предприятиеларга кредиты 2-4 эрэ бырыһыаҥҥа биэрэр итиэннэ ону тус сыалынан туһаныыны олус кытаанахтык хонтуруоллуур системалаахтар.

 

Антонина Григорьева Япония баана республика учуонайдарын научнай үлэлэрин олоххо киллэриигэ инвестициянан төһө кыттыан сөбүн туһунан ыйытыытыгар ыалдьыт туһааннаах специалистары кытта хардарыта кэпсэтии бардаҕына, кыаллыаҕын туһунан эттэ. Оттон туалет бары комплектациятынаан 200 тыһыынча солкуобай сыаналаах, ону 45 тыһыынча солкуобайдааҕын кэпсэтэн, Саха сиригэр аҕалан туһаныахха сөп курдук. Депутаттар Анатолий Чомчоевка туһаайан, бастаан ону “Полигон холода” аҕалан туруоран, биһиги усулуобуйабытыгар хайдаҕын боруобалаан көрөн баран, салгыы кэпсэтиэххэ сөбүгэр тохтоотулар.

 

Кэпсэтиилэр кэмнэригэр республикаҕа тыа хаһаайыстыбатын сайыннарыы, тыа сиригэр тутууга, энергетикаҕа уонна  иһэр ууну ыраастааһыҥҥа саҥа технологиялары киллэрии, Саха сиригэр японецтар туристыы кэлиилэрин тэрийии курдук, боппуруостар таарылыннылар.  Дмитрий Саввин Японияны кытта маннык сибээстэри олохтуур үчүгэйин, бу хайысхаҕа инникитин бииргэ үлэлиир, өссө да көрсөр наадатын бэлиэтээтэ.