Антонина Григорьева уруок аһыллыытыгар үөрэнээччилэри Россия судаарыстыбатын Конституциятын 20 сыла ахсынньы 12 күнүгэр туолаары турарынан эҕэрдэлээтэ. Л.А.Колосова аатынан 33 №-дээх орто оскуола директорын солбуйааччы, республика уонна Россия үтүөлээх учуутала, историк Владислав Алексеевич Голованов Россия судаарыстыбатын Төрүт Сокуонун историятын туһунан үөрэнээччилэргэ тиийимтиэ тылынан сиһилии билиһиннэрдэ.

 

Уопуттаах учуутал Россияҕа 1918, 1925, 1937, 1978 уонна 1993 сылларга ылыллыбыт Конституциялар тустарынан оҕолорго кэпсииригэр ол кэмнэргэ үөскүү сылдьыбыт общественнай-политическай быһыыны-майгыны, уларыйыылары кытта ыкса сибээстээн быһаарыытын болҕойон иһиттилэр. Оскуолалар үөрэнээччилэрэ ССРС курдук модун судаарыстыба сууллуутун түмүгэр Российскай Федерация тэриллэн, саҥалыы атаҕар турар кэмигэр РФ саҥа Конституцията ылыллыбытын, ол эрээри ити иннинэ 1993 сыл алтынньытыгар Үрүҥ дьиэни ытыалааһыҥҥа тиийэ дойду үрдүкү ситэриилээх уонна сокуону таһаарар уорганнарын утарыта турсууларын түмүгэр Норуот депутаттарын съеһэ уонна Үрдүкү Сэбиэт үлэлэрэ ууратыллыбыттарын туһунан билиилэригэр эбии билиини хаҥатыннылар.

 

Аһаҕас уруогу ыытааччылар саҥа Конституция обществоҕа хайдыһыыны тохтотор, бигэ туругу олохтуур база быһыытынан ахсынньы 12 күнүгэр 1993 сыллаахха норуот бүттүүнүн куоластааһынынан ылыллыбытын бэлиэтээн кэпсээтилэр. Антонина Григорьева: “Үрүҥ дьиэни ытыалааһын кэмигэр биһиги республикаттан оччолорго Үрдүкү Сэбиэт депутаттарынан талыллан үлэлии сылдьар Зоя Корнилова уонна Андрей Кривошапкин бааллара. Кинилэр ол событиелары илэ көрбүт, кыттыбыт дьоннортон биирдэстэрэ буолаллар”, -- диэн кэпсээтэ.

 

Депутаттар РФ Конституциятын 20 сылыгар анаан ыыппыт аһаҕас уруоктара үөрэнээччилэри кытта бииргэ хаартыскаҕа түһүүнэн түмүктэннэ.