— Бу докумуон 2014 сылга үлэлиир хайысханы быһаарарга төрүт суолталаах. РФ субъегын салайааччыта буоларым быһыытынан, Саха Республиката бу Анал этиини олоххо хайдах киллэриэн сөбүй диэн ырыта санаан көрдүм.

 

РФ президенин туруорбут соруктара билигин Саха Республикатыгар олоххо көхтөөхтүк киллэриллэллэр. Холобур, президент ахтыбыт экономическай уонна социальнай политикаҕа сыһыаннаах боппуруостара. Бу чуолаан хамнаһы үрдэтии, Россия президенин 2012 сыл «ыам ыйынааҕы» ыйаахтарын олоххо киллэрии. Бу политика түмүгүн дьон сүргэтэ көтөҕүллүбүтүттэн да билиэххэ сөп.

 

Маны тэҥэ инновационнай технологиялар сайдыыларын кытта ситимнээх үгүс боппуруостар таарылыннылар. Бу хайысхаҕа биһиги элбэҕи үлэлиэхтээхпит, ордук дьоҕус уонна орто предпринимательство эйгэтигэр. Толкуйдуохтаах, болҕомто ууруохтаах хайысхабыт манна элбэх. Россия Дальнай Востокка уонна Сибииргэ тирэҕирэн сайдыахтааҕын туһунан истэргэ үчүгэй. Үлэ сүрүн хайысхалара быһаарылынна, Саха сирэ туох үлэни ыытара чопчуланна.

 

Ыйыллыбыт сорудахтары Саха Республикатыгар олоххо киллэрэр туһугар биһиги бу Анал этиини өссө көрүөхпүт, дьүүллэһиэхпит уонна сиһилии ырытыахпыт. Көтөҕүллүбүт бары боппуруостар тирээн турар суолталаахтар уонна чопчу быһаарыыны ирдииллэр дии саныыбын.

 

Ил Түмэн бэрэссэдээтэлэ Александр Жирков РФ президенин Анал этиитин быһаарарыгар, бастатан, демографическай политика боппуруоһа Саха сиригэр ордук улахан суолталааҕын бэлиэтээтэ:

 

— Государство демографическай политикаҕа болҕомтону уурар буолбута олус улахан суолталаах. Республикаҕа улахан кэскили, оттон регионнааҕы былаастарга үчүгэй кыаҕы биэрэр.

 

Владимир Путин тыа сиригэр олорорго-үлэлииргэ дьону күүскэ тардар туһунан боппуруоһу көтөҕүүтэ биһиги республикабытыгар сытыы суолталаах. Биһиги АПК сайдыытыгар номнуо элбэх үбү көрдүбүт. Бу салаа көрдөрүүтэ түргэнник тупсар. Билигин тыа сиригэр дьону олохсутуу, аныгы, толору хааччыллыылаах инфраструктураны тэрийии бастакы сорукпутунан буолар.

 

Александр Жирков демо­графическай политикат­тан уонна дьону тыа сиригэр олохсутууттан ураты маннык­тары бэлиэтээтэ:

 

— Бу, бастатан туран, Российскай Федерация Конституциятын сүрүн балаһыанньаларын халбаҥа суох тутуһуу. Республикаҕа уонна атын субъектарга бу ураты суолталаах. РФ президенэ өссө биир түгэҥҥэ сиһилии тохтообута түбэспиччэ буолбатах — бу Дальнай Востогу уонна Хотугу сири кэлимник сайыннарыы, РФ правительствотыгар Дальнай Востогу уонна хотугу регионнары баһылааһыҥҥа сокуоннары түргэнник ылынарга сорудахтаата. Республика салалтата бу хайысхаҕа чопчу хардыылары оҥоро сатаабыта ыраатта. Быраапка, бюджекка уонна үпкэ-харчыга сыһыаннаах бигэ тирэх оҥоһулларын туһугар сокуоннар, нормативнай аакталар ылыллыахтаахтар.

 

 

Автор хаартыскаҕа түһэриитэ, Москва.