«Сахатранснефтегаз» ААО генеральнай директора Иван Макаров компания бары салааларыгар үлэлии сылдьар салайааччылары, газовиктары э5эрдэлииригэр компания үрдүк кылаастаах 1800 кадрдардаах, бигэ туруктаах үлэ коллектива буола үүммүтүн бэлиэтээтэ. Манна эдэр специалистар Саха сирин нефтегазовай салаатын ветераннарын кытта тэңңэ үлэлии-хамсыы сылдьаллар.

 

«Сахатранснефтегаз» ААО – Саха сирин гаһын комплексын тиһигэр саамай эдэр уонна кыахтаах компания. Бу компания СР Президенэ 2003 сыллаахха ахсынньы 9 күнүгэр таһаарбыт Ыйаа5ар оло5уран, 2003 сыллаахха ахсынньы 17 күнүгэр тэриллибитэ. Компания үлэтин сүрүн көрүңүнэн газ магистральнай  турбаларынан гаһы тиэрдии, куораттарга, нэһилиэнньэлээх пууннарга уопсайа 2900 км усталаах гаһы үллэрэр ситимнэри көрөн-истэн үлэлэтии буолар.

 

Президент Егор Борисов газ салаатын үлэһиттэрин э5эрдэлииригэр республика «Сахатранснефтегаз» иннигэр туруорбут соруга толоруллубутун бэлиэтээтэ. Президент этэринэн, бүгүңңү күңңэ компания кадрдары үүннэрэн таһаарар кыһанан буолла – манна ветераннары сэргэ Губкин аатынан Россиятаа5ы  Нефть уонна газ университетын, Бауман аатынан Москватаа5ы государственнай университет, ХИФУ уонна да атын Россия уонна республика үрдүк итиэннэ орто үөрэ5ин бүтэрбит эдэр специалистар үлэлииллэр.

 

Кэнники сылларга компания ситиһиилэрэ СР газтааһыңңа государственнай тосхолун толорууга кыттыытын кытта ыкса  сибээстээх. Бу тосхол аан бастаан 2002 сыллаахха ылыллыбыта. Тосхол сүрүн соруктара нэһилиэнньэ социальнай таһымын үрдэтиигэ, олох усулуобуйатын тупсарыыга, олорор сир экологиятын харыстааһыңңа  туһуланаллар. Илин эңэр улуустарга гаһы киллэрии «Сахатранснефтегаз» газ икки улахан магистральнай турбаларын аан дойду биир саамай бөдөң өрүһүн Өлүөнэ аннынан туоратыытын түмүгэр ситиһиллибитэ. Бу тардыллыбыт турба аан дойдуга саамай уһун уонна уһулуччулаах инженернэй тутуунан буолар.

 

Президент Егор Борисов компания бастың улэһиттэригэр государственнай на5араадалары туттарда. Ол курдук республика социальнай-экономическай сайдыытыгар кылааттарын иһин компания улэһиттэрэ Андрей Кротов «СР үтүөлээх геологын», Виталий Дядечка СР норуотун хаһаайыстыбатын үтүөлээх үлэһитин бочуоттаах аатынан, Президент кыһыл көмүс чаһылаах Бочуоттаах грамотатынан Алексей Попов уонна да атыттар на5араадаланнылар.

 

Республика парламенын Бэрэссэдээтэлэ Александр Жирков «Сахатранснефтегаз» салалтатын уонна үлэһиттэрин компания тэриллибитэ 10 сылынан Ил Түмэн аатыттан э5эрдэ тыл эттэ. «Саха сиригэр газ хостонуута, гаһы киллэрии – республика5а айыл5а баайын баһылааһын, туһа5а таһаарыы биир саамай суолталаах түһүмэ5э. Газ дьон-сэргэ оло5ор-дьаһа5ар туттар, быһаччы туһанар, дьиэ5э киирэн, сылытан хас биирдии хаһаайыны, хас биирдии киһини үөрдэр айыл5а баайа буолар. Ол да иһин газовиктар үлэлэрэ, гаһы хостуур уонна бу айыл5а баайын дьоңңо тиэрдэр дьон сыралара тугунан да кэмнэммэт, туохха да тэңнэммэт. Аңардас ол туһугар  да үлэлиэххэ сөп. Бу чахчы да5аны дьоһун идэ бырааһынньыга», -- диэн спикер бэлиэтээтэ. Компания аан бастаан тэриллибит күнүттэн ыла биир улахан сыалга -- Саха Республикатын туһанааччыларыгар айыл5а гаһын харгыһа суох тиэрдиигэ -- сулууспалыыр.

 

«Бүгүн республика5а гаһы киллэрии – производственнай, технологическай хайысха эрэ буолбакка, бастатан туран, республика салалтатынан өйдөнүллэр-өйөнүллэр тутаах социальнай бырайыак буолар. Ол эбэтэр бу хостонор баай бэйэтин ис айылгытынан туһалыыр аналлаах. Государство, республика салалтата, былаас биһиги тыйыс айыл5алаах дойдубутугар дьон-сэргэ олорор усулуобуйатын чэпчэтэр, тупсарар туһугар бу салааны өйүөх тустаахтар. Бүгүңңү күңңэ биһиги республикабытыгар бөдөң производственнай, технологическай тосхоллор ылыныллан үлэлииллэр, оттон республика Президенэ, Правительствота, Ил Түмэнэ ылыммыт социальнай тосхоллоро бүтүннүүтүн кэриэтэ ититиини кытта сибээстээхтэр. Гаһы киллэрии – бу ититии, сылытыы. Гаһы киллэрии – бу сырдык уот. Гаһы киллэрии – экология проблемаларын быһаарыы. Гаһы киллэрии – тиһэ5эр тиийэн, нэһилиэнньэ дьоһуннаах, уйгулаах оло5ун хааччыйыы. Бу – кэскиллээх сайдыыга туһаайыллыбыт тосхол. Саха Республикатын Президенэ республика5а гаһы киллэрии тосхолун иккис түһүмэ5эр балайда улахан үбү угар туһунан быһаарыытын мин, республика парламенын Бэрэссэдээтэлин быһыытынан, биһирээн туран өйүүбүн» – диэн Александр Жирков газовиктары өссө төгүл э5эрдэлээн туран,бастың үлэһиттэргэ республика Ил Түмэнин аатыттан судаарыстыбаннай на5араадалары туттарда.

 

Ол курдук республика социальнай-экономическай сайдыытыгар киллэрбит кылааттарын иһин СР Государственнай Мунньа5ын Бэрэссэдээтэлин үрүң көмүс бэлиэлээх Махталын компания гаһы үллэрэр ситимин сулууспатын начальнигар Ариан Дегтяревка, сүрүн специалиска Ирина Орлова5а, Ил Түмэн кыһыл көмүс чаһылаах Бочуоттаах грамоталарын диспетчер Александра Макаренко5а уонна тутаах үлэһиккэ Леонид Атнашевка үөрүүлээх быһыыга-майгыга туттарда.  Газ эйгэтин үлэһиттэрин урут бу тэрилтэ5э үлэлии сылдьыбыт СР Правительствотын Бэрэссэдээтэлин солбуйааччы Павел Маринычев э5эрдэлээтэ.

 

Бу дьоро күңңэ компания үлэһиттэригэр Саха сиригэр газ промышленноһын сайыннарыыга улахан кылааттарын иһин махтал үтүө  тылларын сэргэ элбэх ба5а санаа этилиннэ.