Ыра санаа, эрэл аргыстаах, кэтэһиилээх Саҥа дьыл уонна Ороһооспо бырааһынньыктара тиийэн кэллилэр.Үгүс умнуллубат түгэннэрдээх баай сылы туораатыбыт. Судургута суох, араас ис хоһоонноох сыл бэйэтин ситиһиилэринэн, үөрүүтүнэн-хомолтотунан үйэлээх өйдөбүл буолан өйбүтүгэр-санаабытыгар иҥэн хаалыа.

 

Ааһан эрэр сылга республика олоҕор улахан суолталаах олуктар уурулуннулар. Саха Өрөспүүбүлүкэтин Ил Түмэнин саҥа састааба талылынна. Быыбарга көхтөөх кыттыыгыт, итэҕэлгит, өйөбүлгүт иһин өссө төгүл истиҥник махтанабын.

 

Саха Өрөспүүбүлүкэтин V ыҥырыылаах Ил Түмэнэ өрөспүүбүлүкэ социальнай-экономическай политикатын тупсарыыга туһаайыллыбыт, саҥа ситиһиилэргэ хардыылыыр сокуоннары оҥорор үлэтин салгыы ыытар. Бу кылгас кэм иһигэр бас билии уонна экономическай сайдыы, социальнай политика, тыа хаһаайыстыбатын, айылҕаны туһаныы, сир сыһыаннаһыыларын, предпринимательство, ийэ уонна оҕо харыстабылын, үөрэхтээһин, доруобуйа харыстабылын, культура уонна наука эйгэтин өйүүр тустаах сокуоннар ылылыннылар. Саха сирин олохтоохторуттан киирбит этиилэргэ тирэҕирэн, биллэрдик тупсарыллан, 2014 сылга социальнай хайысхалаах бюджет ылылынна.

 

Үүнэр сылга Саха сирин саҥа, кэскиллээх политическай түгэннэр күүтэллэр. Арктиканы уонна Дальнай Востогу инникитин киэҥ далааһыннаахтык баһылааһын биһигиттэн өрөспүүбүлүкэбит интэриэһин көмүскүүр саҥа суоллары тобулууну, саҥа сокуоннары ылыныыны ирдиир. Ураты болҕомто нэһилиэнньэ олоҕун тупсарыыга, тыа сирин бигэтик сайыннарыыга ууруллуоҕа.

 

2014 сыл эһиэхэ саҥа саҕахтары арыйдын, или-эйэни, дьолу-соргуну, ситиһиини тосхойдун! Хас биирдии дьиэҕэ нус-хас, дьоллоох олох уйаланнын.

 Саҥа дьылынан!