Былырыын балаҕан ыйыгар СР Ил Түмэнин V ыҥырыылаах мунньаҕын депутаттарын талбыппыт. Саҥа талыллыбыт састаап үс ыйтан ордук үлэлээтэ. Депутаттар бу кэм иһигэр тугу оҥордуларый? Бүгүҥҥү нүөмэргэ Чурапчы улууһуттан талыллыбыт депутат, олимпийскай чемпион Павел Пинигин үлэтин-хамнаһын туһунан биһиги хаһыаппытыгар кэпсиир.
Павел Павлович, эн Ил Түмэн икки улахан комитетын чилиэнэ буолаҕыҥ. Үс ый иһигэр туох үлэ барда, туох хамсааһын таҕыста?
Мин государственнай тутул уонна сокуону оҥоруу, дьиэ кэргэн, оҕо, ыччат дьыалаларын, физкультура уонна спорт комитеттарыгар үлэлиибин. Комитеттар мунньахтарыгар республика олохтоохторун күннээҕи тирээн турар кыһалҕаларын тиһигин быспакка куруутун ырытабыт. Ардыгар ырытыллыбыт боппуруостары хаттаан көрөбүт. Ону таһынан хас биирдии депутат «төгүрүк остуолларга», правительственнай чаастарга кыттан норуотун интэриэһин көмүскэһэр, онно санаатын этэр, баар кыһалҕаны быһаарарга кыттыһар, ырытыһар, үлэлэһэр ытык эбээһинэстээх.
Комитеттар мунньахтарыттан холобур быһыытынан, «Саха республикатыгар арыгыны атыылааһын усулуобуйатыгар, бириэмэтигэр, миэстэтигэр эбии хааччахтары киллэрии туһунан» сокуон барылын этиэм этэ. Бу сокуон дьон-сэргэ ортотугар да, Ил Түмэҥҥэ да элбэхтик дьүүллэһилиннэ, киэҥ сэҥээриини ылла. Манна даҕатан эттэххэ, нэһилиэнньэ бэйэтин санаатын этэрэ, этии киллэрэрэ, салгыы ити этиилэри хомуйан правительство да, Ил Түмэн да сокуону оҥорон таһаарара – бу буолар биир сомоҕо буолан үлэлээһин.
Манна даҕатан, V ыҥырыылаах Ил Түмэн састаабыгар инники ыҥырыыларга депутатынан үлэлээбит уопуттаах дьоммут иккистээн талыллан уонна саҥа депутаттар киирэн сүбэлэрин, күүстэрин, кыахтарын холбоон бастакы мунньахтан үлэтин ньиргиччи саҕалаабытын тоһоҕолоон бэлиэтиэм этэ.
Комитет үлэтин таһынан депутаттар быыбардааччыларгытын кытта көрсөҕүт. Бу туһунан кэпсээ эрэ.
Бу ааспыт үс ый түмүгүнэн миигин кытта сирэй көрсөн уонна суругунан 20 киһи тирээн турар кыһалҕаларын быһаартарбыта. Ону таһынан 14 тэрилтэ бэрэстэбиитэллэрэ кэлэн атах тэпсэн олорон суһал боппуруостары ырытыыга туруордулар. Сүрүннээн олох-дьаһах, дьиэ-уот хаһаайыстыбатыгар, тутууга, дьиэ өрөмүөнүгэр туруорсуулар киирдилэр.
Ону таһынан нэһилиэнньэни кытта көрсүһүүгэ үгүс боппуруос ырытылынна. Холобур, нэһилиэнньэ тыа хаһаайыстыбатыгар эккэ-үүккэ бэриллэр дотациялары уларытарга туруорсар. Бу маннык көрсүһүүлэргэ тыа сирин олохтоохторо Михаил Эверстов, Михаил Седалищев, Роман Барашков, Василий Ершов, Гаврил Адамов сытыы ыйытыылары биэрэн, бэйэлэрин этиилэрин этэн көхтөөхтүк кыттыбыттарын бэлиэтиэхпин баҕарабын.
Уопсайынан ылан эттэххэ, тус бэйэм бу үс ый иһигэр үгүс киһини, тэрилтэни кытта көрүстүм, кэпсэттим. Кинигэ бэчээттээһинигэр, оҕо саадтарыгар оҕону эт-хаан өттүнэн сайыннарарга спортивнай инвентардары ылыыга, аҕа дойду сэриитин ветераннарын балаҕаннарын, музейдарын өрөмүөннээһиҥҥэ бэйэм кыра кылааппын киллэристим дии саныыбын.
Уонна түмүккэ Павел Павлович, ааҕааччыларбытыгар, быыбардааччыларгар туһаайан тугу этиэҥ этэй?
Биир дойдулаахтарым, дьонум-сэргэм итэҕэллэрин ылан депутат быһыытынан үлэлиирим миэхэ үрдүк чиэс, бочуоттаах сорук уонна ытык иэһим буолар. Кэлэр сылларга биһигиттэн, депутаттартан, саҥа суоллары тобулар, аныгы олох ирдэбиллэригэр толору эппиэттиир саҥа сокуоннары бэлэмниир сорук турар. Онуоха Саха сирин олохтоохторун этиилэригэр, санааларыгар олоҕуран, тыа сирин сайыннарыыга, нэһилиэнньэ олоҕо тупсарыгар, тыа сиригэр ыччат олохсуйарыгар үлэлэһиэм дии саныыбын.
Түмүккэ хаһыат ааҕааччыларыгар үүммүт сылга баҕарыам этэ, үгүс үтүөнү, кэрэни, ситиһиини, дьиэ кэргэҥҥитигэр, тус олоххутугар дьолу-соргуну.
Аграфена КУЗЬМИНА, “Саха сирэ” республика сүрүн хаһыата, № 4, тохсунньу 15 күнэ, 2014 с.
Дата последнего изменения: 12 декабря 2018, 15:01